Nammude Arogyam
General Health & Wellness

വിറ്റാമിൻ സിയുടെ അഭാവമെങ്കിൽ ഈ രോഗങ്ങൾ പിന്നാലെ

മനുഷ്യ ശരീരത്തിൽ വിറ്റാമിൻ-സി യുടെ കുറവ്, വിട്ടുമാറാത്ത രോഗങ്ങൾ ഉണ്ടാകാനുള്ള സാധ്യതയ്ക്ക് വഴിയൊരുക്കുമെന്ന് നിരവധി പഠനങ്ങൾ ചൂണ്ടിക്കാണിക്കുന്നു. വിറ്റാമിൻ-സി യുടെ കുറവ് ഉയർന്ന രക്തസമ്മർദ്ദം, ഹൃദ്രോഗ സാധ്യതകൾ, പ്രതിരോധശേഷി നഷ്ടപ്പെടൽ, ഓർമ്മക്കുറവ് മറവിരോഗം തുടങ്ങിയവയെല്ലാം ഉണ്ടാകാനുള്ള സാധ്യത ഉയർത്തുന്നു. ചർമവുമായി ബന്ധപ്പെട്ട കൊളാജന്റെ ശരിയായ രൂപവത്കരണത്തിൽ തുടങ്ങി അസ്ഥികളുടെ വികാസത്തിനും രക്തക്കുഴലുകളുടെ ശരിയായ പ്രവർത്തനത്തിനും ശരീരത്തിലെ മുറിവ് ഉണക്കുന്നതിനും വരെയുള്ള കാര്യങ്ങൾക്ക് വിറ്റാമിൻ-സി ഏറ്റവും ആവശ്യകമായ ഒരു പോഷകം ആണ്. ഇത്തരം കാരണങ്ങൾ കൊണ്ടെല്ലാം തന്നെ വിറ്റാമിൻ-സി യുടെ ലഭ്യതക്കുറവ് പല ആളുകളിലും രോഗങ്ങൾക്കും, സങ്കീർണതകൾക്കും കാരണമായേക്കാം. വിറ്റാമിൻ-സി യുടെ കുറവ് മൂലം മനുഷ്യ ശരീരത്തിൽ ഉണ്ടാകാൻ സാധ്യതയുള്ള ആരോഗ്യ പ്രശ്നങ്ങൾ ഏതൊക്കെയാണെന്ന് നോക്കാം.

വിറ്റാമിൻ-സിയുടെ കുറവുമായി ബന്ധപ്പെട്ട് മുൻകാലങ്ങളിൽ ഏറ്റവും പ്രത്യക്ഷമായി അനുഭവപ്പെട്ടിരുന്ന ഒരു സുപ്രധാന രോഗമാണ് സ്കർവി. അമിതമായ ക്ഷീണം, മോണകളിൽ കാണപ്പെടുന്ന രക്തസ്രാവം, പല്ലിന്റെ ബലം കുറയുക, മുടി കൊഴിയുക, വിശപ്പു കുറയൽ, സന്ധിവേദന, ചർമത്തിലെ ചുണങ്ങ് തുടങ്ങിയവയാണ് ഈ രോഗത്തിൻറെ മുന്നറിയിപ്പ് അടയാളങ്ങൾ. രോഗത്തെ തിരിച്ചറിയുക എളുപ്പമാണെങ്കിലും ചികിത്സ തേടാതിരുന്നാല്‍ ലക്ഷണങ്ങൾ കൂടുതൽ ഗുരുതരമാകും. ദൈനംദിന ഭക്ഷണ ശീലത്തിൽ നിന്ന് ലഭിക്കുന്ന വിറ്റാമിൻ-സിയുടെ അഭാവത്തെ ആണ് ഈ രോഗം സൂചിപ്പിക്കുന്നത്. വിറ്റാമിൻ-സി കൂടുതൽ അടങ്ങിയ ഭക്ഷണങ്ങൾ കഴിച്ചുകൊണ്ടും സപ്ലിമെൻ്റുകൾ എടുത്തു കൊണ്ടും ഈ രോഗത്തെ നേരിടാൻ കഴിയും.

തൈറോയ്ഡ് ഗ്രന്ഥിയിൽ നടക്കുന്ന ഹോർമോണുകളുടെ സ്രവ ഉൽപാദനം അനിയന്ത്രിതമായി വർദ്ധിക്കുന്നതാണ് ഹൈപ്പർതൈറോയിഡിസം എന്ന അവസ്ഥ. വിറ്റാമിൻ-സി അടക്കമുള്ള നിരവധി പ്രധാന പോഷകങ്ങൾ തൈറോയ്ഡ് ആരോഗ്യ പരിപാലനത്തിനും സന്തുലനാവസ്ഥയ്ക്കും ഏറെ പ്രധാനമാണ്. നീണ്ടു നിൽക്കുന്ന വിറ്റാമിൻ-സി യുടെ ലഭ്യത കുറവ് തൈറോയ്ഡ് ഗ്രന്ഥികളിൽ നിന്ന് അധികമായി ഹോർമോണുകൾ സ്രവിക്കുന്നതിലേക്ക് നയിക്കുകയും ഇത് ഹൈപ്പർതൈറോയിഡിസം എന്ന രോഗത്തിലേക്ക് കൊണ്ടെത്തിക്കുകയും ചെയ്യുന്നു. ഇതുമായി ബന്ധപ്പെട്ട് അനിയന്ത്രിതമായ ശരീരഭാര വർദ്ധനവ്, ഹൃദയമിടിപ്പ് കൂടൽ, അമിത വിശപ്പ്, ശാരീരിക അസ്വസ്ഥതകൾ, വിറയൽ, സ്ത്രീകളിലെ ആർത്തവ ക്രമത്തിലുള്ള മാറ്റങ്ങൾ എന്നിവ അനുഭവപ്പെടാറുണ്ട്.

ഭക്ഷണത്തിൽ നിന്ന് ലഭിക്കുന്ന ദൈനംദിന വിറ്റാമിൻ-സി അളവ് കുറഞ്ഞാൽ അത് അനിമിയ എന്നറിയപ്പെടുന്ന വിളർച്ചയുടെ ലക്ഷണങ്ങളിലേക്ക് നയിക്കും. നമ്മുടെ ശരീരത്തിൽ അയൺ ജീവകത്തെ ആഗിരണം ചെയ്യാൻ വിറ്റാമിൻ-സി സഹായിക്കുന്നുണ്ട്. അതുകൊണ്ടു തന്നെ ഇതിൻറെ കുറവ് ശരീരത്തിലെ ചുവന്ന രക്താണുക്കളുടെ എണ്ണം കുറയ്ക്കാൻ കാരണമാകും. അനീമിയ പോലുള്ള രോഗങ്ങൾ തടയാൻ അത്യന്താപേക്ഷിതമാണ് വിറ്റാമിൻ-സി എന്ന പോഷകം. ക്ഷീണം, ശ്വാസതടസ്സം, തലകറക്കം, ശരീരഭാരം കുറയ്ക്കൽ എന്നിവയടക്കമുള്ള ലക്ഷണങ്ങൾ ഇതുമായി ബന്ധപ്പെട്ട് അനുഭവപ്പെട്ടേക്കാം.

നമ്മുടെ ഓരോരുത്തരുടെയും പല്ലിന്റെ ആരോഗ്യത്തിന് അത്യന്താപേക്ഷിതമാണ് വിറ്റാമിൻ-സി എന്നത് പലർക്കും അറിയാത്ത ഒരു വസ്തുതയാണ്. ഈയൊരു വിറ്റാമിൻ പല്ലുകളെ ശക്തിപ്പെടുത്തുക മാത്രമല്ല, മോണകളെ സംരക്ഷിക്കുകയും ചെയ്യുന്നുണ്ട്. അതിനാൽ തന്നെ വിറ്റാമിൻ-സി യുടെ കുറവ് മോണയിൽ രക്തസ്രാവത്തിനും, മോണ രോഗങ്ങൾക്കും ഒക്കെ കാരണമാകും.

നമ്മുടെ ചർമ്മത്തിന്റെ ആരോഗ്യം നിലനിർത്തുന്നതിൽ വിറ്റാമിൻ-സി ഒരു പ്രധാന പങ്ക് വഹിക്കുന്നുണ്ട്. ഇതിന് ചർമ്മത്തെ പരിപോഷിപ്പിക്കുന്ന ആന്റിഓക്‌സിഡന്റൽ ഗുണങ്ങളുണ്ട് എന്ന് പറയാം. ചർമത്തിൻ്റെ കൊളാജൻ ഉൽപാദനത്തിനും ഇത് ഒരു പ്രധാന പങ്ക് വഹിക്കുന്നു, ആരോഗ്യമുള്ള ചർമ്മത്തിന് നിർണായകമാണ് ഈ പോഷകം. അതായത്, വിറ്റാമിൻ-സിയുടെ കുറവ്, ചർമവുമായി ബന്ധപ്പെട്ട അനവധി അനാരോഗ്യതകൾക്ക് വഴിയൊരുക്കി കൊടുക്കും. മുറിവുകൾ ഉണങ്ങുന്നതിനും, പാടുകൾ അവശേഷിപ്പിക്കുന്നതിനും ഒക്കെ ഇത് പ്രധാന കാരണമാകും.

ഭക്ഷണത്തിൽ വിറ്റാമിൻ-സി അടങ്ങിയ കൂടുതൽ ഭക്ഷണങ്ങൾ ഉൾപ്പെടുത്തുന്നത് മുകളിൽ പറഞ്ഞ രോഗങ്ങൾ പരിഹരിക്കുന്നതിനുള്ള ഏറ്റവും സ്വാഭാവിക മാർഗ്ഗമാണ്. സിട്രസ് പഴങ്ങൾ, വിറ്റാമിൻ സി ധാരാളം അടങ്ങിയ പച്ചക്കറികൾ എന്നിവ കൂടുതൽ കഴിക്കണം. അതോടൊപ്പം പുകവലി ശീലം ഉണ്ടെങ്കിൽ അത് ഒഴിവാക്കണം, കാരണം പുകവലിക്കാരുടെ ശരീരത്തിൽ വിറ്റാമിൻ സി യുടെ അളവ് ഗണ്യമായി കുറയുമെന്ന് പഠനങ്ങൾ തെളിയിച്ചിട്ടുണ്ട്. വിറ്റാമിൻ സി സപ്ലിമെന്റുകളും കഴിക്കുന്നത് പരിഗണിക്കാം. എന്നാൽ ഇത് സ്വയമേ തിരഞ്ഞെടുക്കുന്നതിന് മുമ്പ് ഒരു ഡോക്ടറെ സമീപിച്ച് അഭിപ്രായം തേടേണ്ടത് പ്രധാനമാണ്.

Related posts