അടിക്കടി മൂത്രം ഒഴിക്കണമെന്ന് തോന്നുക, മൂത്രമൊഴിക്കുമ്പോൾ പുകച്ചിൽ അനുഭവപ്പെടുക, അടിവയറ്റിൽ അസഹനീയമായ വേദന, മൂത്രത്തിൽ രക്തത്തിന്റെ അംശം തുടങ്ങിയവയെല്ലാം യൂറിനറി ട്രാക്ട് ഇൻഫെക്ഷന്റെ ലക്ഷണങ്ങളാണ്. പുരുഷമാരെ അപേക്ഷിച്ച് സ്ത്രീകളിലാണ് ഇത് കൂടുതലായി കാണപ്പെടുന്നത്. സ്ത്രീ ജനസംഖ്യയുടെ പകുതിയോളം പേർക്ക് ജീവിതത്തിൽ ഒരിക്കലെങ്കിലും മൂത്രാശയ അണുബാധ ഉണ്ടാകാനുള്ള സാധ്യതയുണ്ടെന്ന് പഠനങ്ങൾ തെളിയിച്ചിട്ടുണ്ട്. വൃക്ക, മൂത്രനാളി, മൂത്രസഞ്ചി എന്നിവ ഉൾപ്പെടെ ഏത് ഭാഗത്തെയും ബാധിക്കുന്ന മൂത്രവ്യവസ്ഥയുടെ അണുബാധയാണ് യൂറിനറി ട്രാക്റ്റ് ഇൻഫെക്ഷൻ (യുടിഐ).
പല കാരണങ്ങൾ മൂത്രാശയ അണുബാധയ്ക്ക് കാരണമാകാം. കൃത്യമായി മൂത്രം ഒഴിക്കാതിരിക്കുന്നതും ശരിയായ ശുചിത്വം പാലിക്കാത്തതും ആന്തരിക അണുബാധയുമെല്ലാം മൂത്രാശയ അണുബാധയ്ക്ക് കാരണമാകുന്നു. പരമ്പരാഗതമായി, മൂത്രാശയ അണുബാധ ചികിത്സിക്കാൻ ആൻറിബയോട്ടിക്കുകൾ ഉപയോഗിക്കുന്നു, എന്നാൽ ചില വീട്ടുവൈദ്യങ്ങൾ ഉപയോഗിക്കുന്നത് ഇതിന്റെ രോഗലക്ഷണങ്ങൾ കുറയ്ക്കാൻ സഹായിക്കും. അവ എന്തൊക്കെയാണെന്ന് നോക്കാം.
1.വെള്ളം കുടിക്കുക-മൂത്രാശയ അണുബാധകൾ ഒഴിവാക്കാൻ ദിവസവും കൂടുതൽ വെള്ളം കുടിക്കാൻ ശ്രദ്ധിക്കണം. ഇൻഫെക്ഷ്യസ് ഡിസീസസ് സൊസൈറ്റി ഓഫ് അമേരിക്കയിൽ പ്രസിദ്ധീകരിച്ച ഒരു പഠനമനുസരിച്ച്, യുടിഐ അടിക്കടി വരുന്ന സ്ത്രീകൾ കൂടുതൽ വെള്ളം കുടിച്ചാൽ അപകടസാധ്യത കുറയ്ക്കാൻ കഴിയും എന്നാണ്. അസുഖം പിടിപെടാതിരിക്കാൻ ദിവസവും 6-8 ഗ്ലാസ് വെള്ളം കുടിക്കുന്നത് ഉറപ്പാക്കുക.
2.നീര കഴിക്കുക-മൂത്രാശയ അണുബാധകൾ ബാധിച്ചവരെ നീര അല്ലെങ്കിൽ പനയുടെ സ്രവം സഹായിക്കുന്നു. പലതരം കള്ള് കിട്ടുന്ന ഈന്തപ്പനകളുടെ പൂങ്കുലയിൽ നിന്ന് ശേഖരിച്ച സ്രവം കൊണ്ട് ഉണ്ടാക്കുന്ന പാനീയമാണിത്.
3.ചില പാനീയങ്ങൾ-കാലാവസ്ഥയെ ആശ്രയിച്ച്, മൂത്രവ്യവസ്ഥയിൽ നിന്ന് അനാവശ്യ ഉൽപ്പന്നങ്ങൾ പുറന്തള്ളാൻ സഹായിക്കുന്നതിന് തേങ്ങാവെള്ളം, നാരങ്ങ വെള്ളം അല്ലെങ്കിൽ കരിമ്പ് ജ്യൂസ് കുടിക്കുക. സുപ്രധാന വിറ്റാമിനുകൾ, ധാതുക്കൾ, ഇലക്ട്രോലൈറ്റുകൾ, ആന്റിഓക്‌സിഡന്റുകൾ എന്നിവ കൂടുതലുള്ള കോകം, ബെൽ, നെല്ലിക്ക, ബുറാഷ്, റോഡോഡെൻഡ്രോൺ ജ്യൂസുകൾ എന്നിവ യുടിഐകൾക്ക് സാധ്യതയുള്ള ആളുകൾ കുടിക്കുന്നത് നല്ലതാണ്.
4.കഞ്ഞി കുടിക്കാം-കഞ്ഞി ശരീരത്തിലെ നല്ല ബാക്ടീരിയകളെ ശക്തിപ്പെടുത്താൻ സഹായിക്കുന്ന പ്രീബയോട്ടിക് ആണെന്ന് വിദഗ്ദ്ധൻ അഭിപ്രായപ്പെടുന്നു, ഇത് മൂത്രാശയ അണുബാധയുടെ ആവർത്തനം കുറയ്ക്കും.
5.മുതിര ഉൾപ്പെടുത്തുക-മൂത്രാശയ അണുബാധ ഉണ്ടെങ്കിൽ മുതിര ഭക്ഷണത്തിൽ ഉൾപ്പെടുത്തുന്നത് നല്ലൊരു മാർഗമാണ്. ഇത് നാരുകളാൽ നിറഞ്ഞിരിക്കുന്നു എന്നതിനാൽ ശരീരത്തിൽ നിന്ന് വിഷവസ്തുക്കളെ പുറന്തള്ളാൻ സഹായിക്കുന്നു, അതിലൂടെ യുടിഐ യുടെ അപകടസാധ്യത കുറയ്ക്കുന്നു.
യുടിഐ ഒഴിവാക്കാൻ ജീവിതശൈലിയിൽ വരുത്തേണ്ട ചില മാറ്റങ്ങളുണ്ട്. അവ എന്തൊക്കെയാണെന്ന് നോക്കാം.
1.ശുചിത്വം പാലിക്കുക. മൂത്രമൊഴിക്കുന്നതിനോ മലമൂത്ര വിസർജ്ജനത്തിനോ മുമ്പും ശേഷവും കൈ കഴുകുക.
2.വൃത്തിയുള്ള അടിവസ്ത്രം ധരിക്കുക.
3.മൂത്രം ഒഴിക്കാൻ തോന്നുമ്പോൾ പിടിച്ചുവയ്ക്കരുത്, കാരണം ഇത് മൂത്രവ്യവസ്ഥയിൽ സമ്മർദ്ദമുണ്ടാക്കും, ഇത് അണുബാധ ഉണ്ടാകാൻ കാരണമാകും.
4.മൂത്രം സ്വാഭാവികമായി കടന്നുപോകട്ടെ, ആയാസം കൊടുക്കരുത്.
5.മൂത്രമൊഴിക്കാനുള്ള ആഗ്രഹത്തെ ചെറുക്കരുത്, കാരണം ഇത് ബാക്ടീരിയ വളരുന്ന മൂത്രനാളി പ്രദേശത്തെ ഈർപ്പം വർദ്ധിപ്പിക്കും.
6.വ്യായാമം ചെയ്യുമ്പോൾ, മൂത്രനാളി പ്രദേശത്തിന് ചുറ്റും അമിതമായ ഈർപ്പമുണ്ടാകാത്ത ഉചിതമായ വസ്ത്രങ്ങൾ ഉപയോഗിക്കുക.
7.വ്യായാമം ചെയ്ത ശേഷം ശരീരം കുളിച്ചു വൃത്തിയാക്കുക.
8.ഉറക്കം പ്രധാനമാണ്.
മുകളിൽ പറഞ്ഞ ഈ വീട്ടുവൈദ്യങ്ങൾ പരീക്ഷിക്കുന്നത് നല്ലതാണ്.എങ്കിലും ഇവ പരീക്ഷിക്കുന്നതിന് മുമ്പ് ഒരു വിദഗ്ധന്റെ ഉപദേശം തേടുന്നത് നല്ലതാണ്.
