Nammude Arogyam
FoodGeneralHealthy Foods

ആപ്പിളിന് പുറമേയുള്ള വാക്‌സ് അപകടകാരിയാണോ?

ആപ്പിള്‍ ആരോഗ്യത്തിന് പൊതുവേ ഗുണകരമാണ്. ഒരു ദിവസം ഒരു ആപ്പിള്‍ കഴിച്ചാല്‍ ഡോക്ടറെ അകറ്റി നിര്‍ത്താമെന്ന ചൊല്ലു കൂടിയുണ്ട്. ഏറെ പോഷകങ്ങള്‍ അടങ്ങിയ ആപ്പിള്‍ ഈ ഗുണങ്ങള്‍ നല്‍കണമെങ്കില്‍ കെമിക്കലുകള്‍ അടങ്ങാത്തതാകണം. എന്നാല്‍ ഇന്നത്തെ കാലത്ത് ആപ്പിളിലും മായമെന്ന് പറഞ്ഞാല്‍ തെറ്റില്ല. പ്രത്യേകിച്ചും ചില ആപ്പിളുകളുടെ പുറംഭാഗം തിളങ്ങുന്നത് കാണാം. ഇത് പെട്രോളിയം ഉല്‍പന്നമായ മെഴുക് പുരട്ടിയിട്ടാണെന്നും മറ്റുമുള്ള പല വാര്‍ത്തകളും നാം കേട്ടിട്ടുമുണ്ട്. ഇതിനാല്‍ തന്നെ ഇത്തരം ആപ്പിളുകള്‍ കഴിച്ചാല്‍ ക്യാന്‍സര്‍ അടക്കമുള്ള രോഗങ്ങള്‍ക്ക് സാധ്യതയെന്നും നാം പൊതുവേ കേള്‍ക്കാറുണ്ട്.

പലയിടങ്ങളില്‍ നിന്നും ആപ്പിള്‍ ലഭിയ്ക്കുന്നുണ്ട്. പുറം നാട്ടില്‍ നിന്നും ഇന്ത്യയില്‍ നിന്നും തന്നെ ഇത് ലഭിയ്ക്കും. ആപ്പിളിന്റെ പുറമേ പെപ്റ്റിന്‍ എന്ന സ്വാഭാവിക ആവരണമുണ്ട്. ആപ്പിളില്‍ പുറമേ നിന്നും കീടങ്ങള്‍ പ്രവേശിയ്ക്കാതിരിയ്ക്കാന്‍ പ്രകൃതി തന്നെ നല്‍കുന്ന സംരക്ഷണമാണിത്. എന്നാല്‍ നമ്മള്‍ കൈകാര്യം ചെയ്യുന്ന സമയത്ത് ഇതിന്റെ പെപ്റ്റിന്‍ നഷ്ടപ്പെട്ടു പോകും. ഇതിലൂടെ ഇതിനുളളിലെ ജലാംശം നഷ്ടപ്പെടുകയും. ആപ്പിള്‍ ചുരുങ്ങിപ്പോകുകയും. കേടാകുകയും ചെയ്യും. ആപ്പിള്‍ കയറ്റി അയക്കുമ്പോഴെല്ലാം ഇതാണ് ഉണ്ടാകുന്നത്. പ്രത്യേകിച്ചും പുറം നാട്ടില്‍ നിന്നും കയറ്റി അയക്കുമ്പോള്‍ പെപ്റ്റിന്‍ നഷ്ടപ്പെടുമ്പോള്‍ കയറ്റി അയക്കുന്ന തൂക്കമാകില്ല, തൂക്കം പറഞ്ഞ് പണം നല്‍കി വാങ്ങുന്നവര്‍ക്ക് ലഭിയ്ക്കുക. ഇത് ഒഴിവാക്കാനാണ് ഇതിന് പുറമേ ഇത്തരം ചെറിയ മെഴുക് ആവരണം നല്‍കുന്നത്. ഇത് എഡിബിള്‍ വാക്‌സ് ആണ്. അതായത് കഴിയ്ക്കാന്‍ സാധിയ്ക്കുന്ന തരം വാക്‌സ് അഥവാ മെഴുക്. കഴിച്ചത് കൊണ്ട് ദോഷം വരുന്നില്ലെന്നര്‍ത്ഥം.

ഇത്തരം വാക്‌സ് രണ്ടു തരമുണ്ട്. ബ്രസീലില്‍ കാണുന്ന കര്‍ണോബാ എന്ന വൃക്ഷത്തിന്റെ ഇലകളില്‍ നിന്നുണ്ടാക്കുന്നത്. ഇതാണ് കൂടുതലായി ലോകത്ത് ഉപയോഗിയ്ക്കുന്നത്. ബീ വാക്‌സും ഇതിനായി ഉപയോഗിയ്ക്കുന്നുണ്ട്. ലിപ്സ്റ്റിക്കിലും പല ക്രീമുകളിലും ഇത്തരം വാക്‌സുകളില്‍ ഉപയോഗിയ്ക്കുന്നുണ്ട്. ശരീരത്തില്‍ ഇടുന്ന സ്റ്റിച്ചുകളുടെ നൂലിലും ഇത് ഉപയോഗിയ്ക്കുന്നുണ്ട്. കര്‍ണോബാ മരത്തിന്റെ വാക്‌സിന് വലിയ വിലയുമില്ല. മഞ്ഞ നിറമുള്ള ഇതിനെ പ്രോസസ് ചെയ്ത് നിറമില്ലാത്തതാക്കിയാണ് ആപ്പിളിന് പുറമേ പുരട്ടുന്നത്. നേരിയ അളവിലേ ഇത്തരം വാക്‌സ് ആപ്പിളിന് മുകളില്‍ പുരട്ടുന്നുള്ളൂ. ഇത്തരം വാക്‌സ് ഭക്ഷണത്തില്‍ ചേര്‍ക്കാന്‍ സാധിയ്ക്കുന്ന ഇ 903 എന്ന നമ്പര്‍ നല്‍കിയിട്ടുള്ള ഒന്നാണ്.

ഇത്തരം വാക്‌സ് അല്‍പം മാത്രം മതി. ഇത് ആപ്പിള്‍ കേടാകാതെ സംരക്ഷണം നല്‍കുന്നു. പുറമേ നിന്നും ദോഷകരമായ ബാക്ടീരിയകളോ, മറ്റു കീടങ്ങളോ ഇതില്‍ കയറുന്നില്ല. ആപ്പിളിന്റെ ഗുണം കളയാതെ സംരക്ഷിയ്ക്കുന്നവയാണ് ഇത്തരം വാക്‌സ്. ഇത് ആരോഗ്യത്തിന് യാതൊരു ദോഷവും വരുത്തുന്നുമില്ല. ഇത്തരം ആപ്പിള്‍ 20 ദിവസത്തോളം കേടാകാതെ ഇരിയ്ക്കുന്നു. ആപ്പിള്‍ വാങ്ങി ഇത്തരം ദിവസം കേടാകാതെയിരുന്നാല്‍ പേടിയ്‌ക്കേണ്ടതില്ലെന്നര്‍ത്ഥം. ഇനി ഇത്തരം വാക്‌സ് ദോഷം വരുത്തുമെന്ന് പേടിയുണ്ടെങ്കില്‍ തൊലി നീക്കി കഴിയ്ക്കാം. ഇതൊരിയ്ക്കലും ഉള്ളിലേയ്ക്ക് കടക്കുന്ന ഒന്നല്ല.

വാസ്തവത്തില്‍ ഇത്തരം വാക്‌സിനൊപ്പം ചിലപ്പോള്‍ കെമിക്കലുകള്‍ കൂടി ചേര്‍ത്തിളക്കി വരുമ്പോഴാണ് ആരോഗ്യത്തിന് ദോഷം വരുത്തുന്നത്. ഇത്തരം ആപ്പിളുകള്‍ ചിലപ്പോള്‍ മാസങ്ങളോളം അനക്കം കൂടാതെ ഇരിയ്ക്കുകയും ചെയ്യും. എന്നാല്‍ ആപ്പിളിന്റെ മുകളില്‍ കാണുന്ന ഇത്തരം മെഴുക് ക്യാന്‍സര്‍ പോലുള്ള പല രോഗങ്ങളും വരുത്തുമെന്ന പേരിലുള്ള പല വാര്‍ത്തകളിലും വാസ്തവമില്ല.

Related posts