നല്ല ശോധന ലഭിയ്ക്കാത്തത്, മലബന്ധം തുടങ്ങിയവ പലരേയും അലട്ടുന്ന പ്രശ്‌നമാണ്. ചിലര്‍ക്കിത് നിത്യവുമുള്ള പ്രശ്‌നം തന്നെയായിരിയ്ക്കും. എന്നാൽ ചിലര്‍ക്ക്, ലാക്‌സേറ്റീവ് പോലുള്ളവ കഴിയ്ക്കാതെ വയറ്റില്‍ നിന്നും പോകില്ലെന്ന അവസ്ഥയുമുണ്ട്. ഇതിന് ഒരു പരിഹാരമെന്നോണം വാഴപ്പഴമാണ് നല്ല ശോധനയ്ക്കായി പലരും ഉപയോഗിയ്ക്കുന്ന സാധാരണ വഴി. ഇതിനായി ദിവസവും നാലഞ്ച് വാഴപ്പഴം വരെ കഴിയ്ക്കുന്നവരുമുണ്ട്. എന്നാല്‍ മലബന്ധത്തിന് ശരിയായ കാരണം മനസിലാക്കാതെ വാഴപ്പഴം കഴിച്ചത് കൊണ്ടു മാത്രം ഗുണം ലഭിയ്ക്കില്ല എന്നാണ് പറയുന്നത്.
മലബന്ധത്തിന്റെ കാരണങ്ങൾ പലതാണ്. കുടലില്‍ നല്ല ദഹനം നടക്കാന്‍ നല്ല ബാക്ടീരിയകള്‍ വേണം. ഇവയാണ് ദഹനത്തിന് സഹായിക്കുന്നത്. ഇതു പോലെ ഇവ തന്നെയാണ് ശരീരത്തില്‍ നിന്നും വിസര്‍ജ്യം പുറത്തു പോകുവാന്‍ സഹായിക്കുന്നതും. ചില മരുന്നുകളും, വെള്ളം കുടിയ്ക്കാത്തതും എല്ലാം ശോധന കുറയുന്നതിന് കാരണമാകും. വെള്ളം കുടി കുറയുന്നത് ശോധന കുറയുന്നതിന് പ്രധാന കാരണമാണ്.
ഇതു പോലെ സ്‌ട്രെസ് മലബന്ധമുണ്ടാകുന്നതിന് പ്രധാനപ്പെട്ടൊരു കാരണമാണ്. സ്‌ട്രെസ് ഹോര്‍മോണ്‍ ഉണ്ടാകുന്നത് കുടലിലാണ്. ഇത് ശോധന കുറയ്ക്കാന്‍ കാരണമാകും. പലരും കൊഴുപ്പ് പേടിച്ച് അത്തരം ഭക്ഷണങ്ങൾ കഴിക്കാറില്ല. പകരം കാര്‍ബോഹൈഡ്രേറ്റുകള്‍ കൂടുതല്‍ കഴിയ്ക്കും. ഇത് ബൈല്‍ ഉല്‍പാദനത്തെ സഹായിക്കില്ല. ബൈല്‍ ഉല്‍പാദനം നടന്നില്ലെങ്കില്‍ കുടലിന്റെ പെരിസ്റ്റാള്‍റ്റിക് മൂവ്‌മെന്റ് നല്ലതു പോലെ നടക്കില്ല. ഇത് ശോധന കുറയ്ക്കുന്ന മറ്റൊരു ഘടകമാണ്. അത്കൊണ്ട് ആരോഗ്യകരമായ കൊഴുപ്പ് കഴിയ്ക്കാം. അതിനോടൊപ്പം തന്നെ മുട്ട, തൈര് എന്നിവയെല്ലാം നല്ലതാണ്. മുട്ട കഴിച്ചാല്‍ മുട്ടയുടെ മഞ്ഞക്കുരുവും കഴിയ്ക്കണം. ഇത് നല്ല ഫാറ്റാണ്. കൊളസ്‌ട്രോള്‍ ഭയമുള്ളവരെങ്കില്‍ ഇതിന് അനുസരിച്ച് കപ്പ, ചോറ് തുടങ്ങിയ മറ്റ് കൊഴുപ്പുകള്‍ കുറയ്ക്കുക.
ചപ്പാത്തി ഗ്ലൂട്ടെന്‍ ഫുഡ് ആണ്. ഇതിനാല്‍ തന്നെ ചിലര്‍ക്ക് ചപ്പാത്തി മലബന്ധമുണ്ടാക്കും. പകരം മറ്റു ധാന്യങ്ങള്‍, അരി ദോശ എന്നിവയെല്ലാം മിതമായി കഴിയ്ക്കാം. ഇതിനൊപ്പം ധാരാളം പച്ചക്കറികളും പഴങ്ങളുമെല്ലാം ഉള്‍പ്പെടുത്താം. നാരുകള്‍ വല്ലാതെ കൂടുതല്‍ കഴിയ്ക്കണമെന്നില്ല. മിതമായി കഴിയ്ക്കാം. പഴ വര്‍ഗങ്ങള്‍ രാത്രി കഴിയ്ക്കുന്നത് പ്രമേഹ രോഗികള്‍ക്കും മറ്റും ദോഷം വരുത്തുന്നത് കൊണ്ട്, ഇവ രാവിലെയോ മറ്റോ കഴിക്കുന്നതാണ് കൂടുതൽ നല്ലത്.
ഇതിനൊപ്പം സ്‌ട്രെസ് പോലുള്ളവ കുറയ്ക്കാന്‍ തനിയെ വഴി കണ്ടെത്താം. ധാരാളം വെള്ളം കുടിയ്ക്കാം. വ്യായാമം ചെയ്യാം. ഇതെല്ലാം തന്നെ ശോധന നന്നാകാന്‍ സഹായിക്കുന്നു. വറുത്തവയും പ്രോസസ് ചെയ്ത ഭക്ഷണങ്ങളുമെല്ലാം തന്നെ നല്ല ശോധനയ്ക്ക് തടസം നില്‍ക്കുന്നവയാണ്. ഇതിനാല്‍ ഇതെല്ലാം തന്നെ മിതമായി മാത്രം കഴിയ്ക്കുക. രാത്രി കിടക്കുന്നതിന് മൂന്നു നാല് മണിക്കൂര്‍ മുന്‍പേ കഴിയ്ക്കുക. ഇത് നല്ല ദഹനത്തിന് സഹായിക്കും. നല്ല ശോധന നല്‍കും. ഇത്തരം കാര്യങ്ങളെല്ലാം ശ്രദ്ധിയ്ക്കണം. അല്ലാതെ ദിവസവും കുറേ വാഴപ്പഴം കഴിച്ചത് കൊണ്ടു മാത്രം നല്ല ശോധന ലഭിയ്ക്കില്ലെന്നോര്‍ക്കുക.
അതികഠിനമായ മലബന്ധ പ്രശ്നങ്ങൾ നേരിടുന്നുണ്ടെങ്കിൽ വൈദ്യ സഹായം തേടുന്നതാണ് കൂടുതൽ നല്ലത്. അല്ലാത്ത പക്ഷം അത് കൂടുതൽ സങ്കീര്ണതകളിലേക്ക് എത്തിക്കും.
