അന്തരീക്ഷത്തിലെ താപം ഉയരുന്നതിനനുസരിച്ച് ശരീരത്തിലെ ചൂടും ഉയര്‍ന്ന് വരികയാണ്. ഫാന്‍ ഇട്ടാല്‍ പോലും കിടന്നുറങ്ങാന്‍ സാധിക്കാത്ത അവസ്ഥയായാണിപ്പോൾ. എന്നാല്‍, നമ്മള്‍ കഴിക്കുന്ന ആഹാരത്തില്‍ കുറച്ച് ശ്രദ്ധിച്ചും നല്ലപോലെ വെള്ളം കുടിച്ചാലും ചൂട് കുറയ്ക്കാന്‍ സാധിക്കും. ഇത് മാത്രമല്ല, നന്നായി വെള്ളം കുടിക്കുന്നതിന്റെ കൂടെ മുളപ്പിച്ച ചിയ സീഡ്സ് കൂടെ ചേര്‍ത്ത് കഴിഞ്ഞാല്‍ ശരീരത്തിന് കൂടുതല്‍ കുളിര്‍മ്മയും ചൂട് ശരീരത്തില്‍ കൂടുമ്പോള്‍ ഉണ്ടാകുന്ന പല ബുദ്ധിമുട്ടുകളും കുറയ്ക്കാനും സാധിക്കുന്നതാണ്.
കസകസ എന്നെല്ലാം വിശേഷിപ്പിക്കുന്ന ചിയ സീഡ്സ് നിരവധി ആരോഗ്യ ഗുണങ്ങളുള്ള ഒരു വിത്താണ്. പൊതുവില്‍ സര്‍ബത്ത്, അല്ലെങ്കില്‍ ഫലൂദ, അല്ലെങ്കില്‍ എന്തെങ്കിലും ജ്യൂസ് എന്നിവ തയ്യാറാക്കുമ്പോള്‍ കുതിര്‍ത്ത് വെച്ചിരിക്കുന്ന ചിയ സീഡ്സ് ചേര്‍ക്കാറുണ്ട്. എന്നാല്‍, കുതിര്‍ത്ത് വെച്ച ചിയ സീഡ്‌സിനേക്കാള്‍ ഒരു പടി മുന്‍പിലാണ് മുളപ്പിച്ചെടുത്ത ചിയ സീഡ്സ്. തടി കുറയ്ക്കാന്‍ ആഗഹിക്കുന്നവര്‍ക്കും പ്രമേഹത്തെ നിയന്ത്രിക്കുന്നതിനും ശരീരത്തിന്റെ ക്ഷീണം മാറ്റി എടുക്കുന്നതിനും ദഹനം കൃത്യമായി നടത്തുന്നതിനുമെല്ലാം തന്നെ ചിയ സീഡ്സ് ഗുണം ചെയ്യുന്നു.
വീട്ടില്‍ തന്നെ ചിയ സീഡ്സ് മുളപ്പിച്ച് എടുക്കാവുന്നതാണ്. ഇതിനായി കുറച്ച് വെള്ളത്തില്‍ ചിയ സീഡ്സ് കുതിരാന്‍ വെക്കുക. നന്നായി കുതിര്‍ന്ന് കഴിയുമ്പോള്‍ ഇത് നന്നായി ചീര്‍ത്ത് ഇരിക്കുന്നത് കാണാം. ഇതിലെ വെള്ളം കളഞ്ഞ് ഈ നനവോടെ തന്നെ ഒരു ചെറിയ പാത്രത്തില്‍ ഇട്ട് മൂടി വെച്ചാല്‍ മതി ചിയ സീഡ്സ് മുളക്കുന്നതായിരിക്കും. ഇതല്ലെങ്കില്‍ നന്നായി കുതിര്‍ത്തതിന് ശേഷം ഒരു തുണിയില്‍ കെട്ടി വെക്കാവുന്നതാണ്. ഇതും ചിയ സീഡ്സ് വേഗത്തില്‍ മുളപ്പിച്ച് കിട്ടുന്നതിന് സഹായിക്കും.
മുളപ്പിച്ചെടുത്ത ചിയ സീഡ്‌സില്‍ കാല്‍സ്യം, മഗ്നീഷ്യം, അയേണ്‍, ഫൈബര്‍, ഒമേഗ- 3, ആന്റിഓക്‌സിഡന്റ്‌സ് എന്നിവയെല്ലാം തന്നെ ധാരാളം കാണാന്‍ സാധിക്കും. കുതിര്‍ത്ത് എടുക്കുന്ന ചിയ സീഡ്‌സില്‍ ഉള്ളതിനേക്കാള്‍ കുറച്ച് ഗുണം അതിനാല്‍ ഇത് നല്‍കുന്നു. ശരീരത്തിലേയ്ക്ക് അയേണും, ആന്റിഓക്‌സിഡന്റ്‌സും ഒമേഗ- 3 എത്തുന്നതെല്ലാം തന്നെ ചര്‍മ്മത്തിന്റേയും മുടിയുടേയും ആരോഗ്യം സംരക്ഷിക്കുന്നു. ഇതില്‍ ഫൈബര്‍ അടങ്ങിയിരിക്കുന്നതിനാല്‍ തന്നെ ദഹനം നല്ല രീതിയില്‍ നടക്കുന്നതിനും ഇത് സഹായിക്കുന്നു.
ശരീരത്തില്‍ ദഹനം നല്ലരീതിയില്‍ നടന്നാല്‍ തന്നെ പകുതി അസുഖങ്ങളും കുറയും. ശരീരത്തിലെ ചൂടിനെ നിയന്ത്രിക്കാനും അതുപോലെ, വയര്‍ തണുപ്പിക്കാനും ചിയ സീഡ്സ് സഹായിക്കുന്നുണ്ട്. അതുപോലെ, ചൂട് കുറയ്ക്കുന്നതിനാല്‍, വയറ്റില്‍ നിന്നും പോകാന്‍ ബുദ്ധിമുട്ട് അനുഭവിക്കുന്നവര്‍ക്ക് ഇത് നല്ലൊരു ആശ്വാസമാണ് നല്‍കുന്നത്. ഒപ്പം തന്നെ രക്തത്തിലെ പഞ്ചസ്സാരയുടെ അളവ് നിയന്ത്രിക്കാനും ഇത് സഹായിക്കുന്നുണ്ട്.
മുളപ്പിച്ചെടുത്ത ചിയ സീഡ്സ് സാലഡില്‍ ചേര്‍ത്തും കഴിക്കാവുന്നതാണ്. അല്ലെങ്കില്‍ കുറച്ച് ഓട്‌സ് എടുത്ത് അതിലേയ്ക്ക് കുറച്ച് പഴം ഉടച്ചതും ചേര്‍ത്ത് നല്ല പാലും ചേര്‍ത്ത് മിക്‌സ് ചെയ്യുക. ഓട്‌സ് എടുക്കുമ്പോള്‍ രണ്ട് ടീസ്പൂണില്‍ കൂടരുത്. ഇതിലേയ്ക്ക് തയ്യാറാക്കി വെച്ചിരിക്കുന്ന മുളപ്പിച്ച ചിയ സീഡ്സ് ചേര്‍ക്കാവുന്നതാണ്. അതുപോലെ, നല്ലപോലെ ഫ്രൂട്‌സും ചേര്‍ക്കുക. മധുരത്തിനായി തേന്‍, അല്ലെങ്കില്‍ ഈന്തപ്പഴം പാലും ചേര്‍ത്ത് അടിച്ച് ചേര്‍ക്കാവുന്നതാണ്. പഞ്ചസ്സാര ചേര്‍ക്കാതിരിക്കാന്‍ ശ്രദ്ധിക്കുക.
നാരങ്ങ വെള്ളം തയ്യാറാക്കുമ്പോള്‍, സ്മൂത്തി തയ്യാറാക്കുമ്പോള്‍ എല്ലാം തന്നെ മുളപ്പിച്ച ചിയ സീഡ്സ് ചേര്‍ക്കാവുന്നതാണ്. അതുപോലെ, കുടിക്കാന്‍ എടുക്കുന്ന വെള്ളത്തിലും ഇത് ചേര്‍ത്ത് കുടിക്കാം. ഇതും ശരീരത്തിന് നല്ല തണുപ്പ് നല്‍കാന്‍ സഹായിക്കും.
ഈ കടുത്ത വേനലിൽ ഇത്തരത്തിൽ ചിയാ സീഡ് മുളപ്പിച്ച് കഴിച്ചാൽ ചൂടിന് ശമനം ഉണ്ടാകുന്നതിനോടൊപ്പം തന്നെ നിരവധി ആരോഗ്യ ഗുണങ്ങളും ലഭിക്കുന്നതാണ്.
