എല്ലാവരും പേടിക്കുന്ന ഒരു രോഗാവസ്ഥയാണ് ക്യാന്‍സര്‍. ക്യാന്‍സര്‍ വന്നാല്‍ ജീവിതം തന്നെ പോയി എന്ന് കരുതുന്നവരും ഉണ്ട്. പലപ്പോഴും തുടക്കത്തില്‍ കണ്ടെത്തിയില്ലെങ്കില്‍ ജീവന്‍ പോലും നഷ്ടപ്പെടുത്തുന്ന രോഗമാണ് ഇത്. എന്നാല്‍ തുടക്കത്തില്‍ കണ്ടെത്തിയാല്‍ ചികിത്സിച്ച് ഭേദമാക്കാനും സാധിക്കും.
ലോകത്തില്‍ പലതരത്തിലുള്ള ക്യാന്‍സര്‍ രോഗങ്ങള്‍ കണ്ടെത്തിയിട്ടുണ്ട്. സ്വകാര്യഭാഗങ്ങളില്‍ മുതല്‍ ചെവിയിലും ചുണ്ടിലും വരെ ഇന്ന് ക്യാന്‍സര്‍ വരുന്നു. ക്യാന്‍സര്‍ വന്നു കഴിഞ്ഞാല്‍ ഇതിന്റെ ഏറ്റവും ഭീകരമായ അവസ്ഥ ഇതിന്റെ ചികത്സാരീതികളും അതിലൂടെ കടന്ന് പോകുന്ന രോഗിയുടെ മാനസികാവസ്ഥയുമാണ്.
ശരീരത്തിന്റെ ഏതെങ്കിലും ഒരു ഭാഗത്ത് അസാധാരണമായ രീതിയില്‍ കോശങ്ങള്‍ വളരുന്നതാണ് ക്യാന്‍സറിലേയ്ക്ക് എത്തുന്നത്. പലപ്പോഴും അസാധാരണമായി ശരീരത്തില്‍ കാണുന്ന മുഴ, അല്ലെങ്കില്‍ തടിപ്പ് എന്നിവ ക്യാന്‍സറിന്റെ ലക്ഷണമാകാം. വായയില്‍ ഉണ്ടാകുന്ന ക്യാന്‍സര്‍ ആണെങ്കില്‍ വ്രണങ്ങളോട് കൂടിയായിരിക്കും കാണപ്പെടുന്നത്. തൊണ്ടയിലും ഗര്‍ഭാശയത്തിലും അതുപോലെ, തല, പ്രോസ്‌റ്റേറ്റ് എന്നിവിടങ്ങളിലെല്ലാം ക്യാന്‍സര്‍ മുഴയായും തടിപ്പായും കാണപ്പെടുന്നു. ചര്‍മ്മത്തില്‍ ഉണ്ടാകുന്ന നിറവ്യത്യാസം, കാക്കപ്പുള്ളി, അറിമ്പാറ എന്നിവ പോലും ക്യാന്‍സറിന്റെ ലക്ഷണമാകാം. മലദ്വാരത്തില്‍ ക്യാന്‍സര്‍ വന്നാല്‍ രക്തസ്രാവവും, മൂക്കില്‍ ക്യാന്‍സര്‍ വന്നാലും ബ്ലഡ് ക്യാന്‍സര്‍ വന്നാലും ശരീരത്തില്‍ നിന്നും രക്തം പോകുന്നത് ഒരു ലക്ഷണമാണ്.
പല കാരണത്താല്‍ കാന്‍സര്‍ വരുന്നു. അതില്‍ പ്രധാനപ്പെട്ട കാരണം, തെറ്റായ ജീവിത രീതികള്‍ തന്നെ. വ്യായാമം ഇല്ലാത്തതും ശരിയായ ആഹാരം കഴിക്കാത്തതുമെല്ലാം ക്യാന്‍സറിലേയ്ക്ക് നയിക്കുന്ന കാര്യമാണ്. ഇന്ന് ചെറുപ്പക്കാരില്‍ മുതല്‍ മദ്യപാനവും പുകവലിയും പുകയില ഉല്‍പന്നങ്ങളുടെ ഉപയോഗവും കണ്ടുവരുന്നുണ്ട്. ഇത്തരം ശീലങ്ങളും ക്യാന്‍സറിനെ വളര്‍ത്തുന്ന പ്രധാന കാരണങ്ങളില്‍ ഒന്നാണ്. അതുപോലെ, പ്രായം കൂടുന്നതും, പാരമ്പര്യമായി കുടുംബത്തില്‍ ആര്‍ക്കെങ്കിലും ക്യാന്‍സര്‍ ഉണ്ടെങ്കിലും എല്ലാം ക്യാന്‍സര്‍ വരാനുള്ള സാധ്യത കൂടുന്നു. അതുപോലെ, കെമിക്കല്‍ റിയാക്ഷന്‍സ്, റേഡിയേഷന്‍ അടിക്കുന്നത് എന്നിവയെല്ലാം ക്യാന്‍സറിലേയ്ക്ക് നയിക്കുന്നുണ്ട്.
തുടക്കത്തില്‍ തന്നെ കണ്ടെത്തിയാല്‍ ക്യാന്‍സര്‍ ചികിത്സിച്ച് ഭേദമാക്കാന്‍ സാധിക്കും. ക്യാന്‍സര്‍ ഓരോ സ്‌റ്റേജില്‍ എത്തും തോറും അത് ഭേദമാകാനുള്ള സാധ്യതയും കുറയുകയാണ്. ഡോക്ടര്‍മാർ പറയുന്നത് പ്രകാരം, ക്യാന്‍സര്‍ രോഗം കണ്ടെത്തിയാല്‍, അത് ശരീരത്തിന്റെ മറ്റ് ഭാഗങ്ങളിലേയ്ക്ക് പടരാന്‍ എത്രത്തോളം സമയം എടുക്കും എന്ന് ആദ്യം നോക്കുന്നു. ഇതിലൂടെയാണ് രോഗി ഏത് സ്‌റ്റേജില്‍ ആണ് എത്തി നില്‍ക്കുന്നത് എന്ന് മനസ്സിലാക്കുന്നത്. അതിനുശേഷമാണ് ചികിത്സാരീതികള്‍ നിര്‍ണ്ണയിക്കുന്നത്. സര്‍ജറിയാണ് ചെയ്യുന്നതെങ്കില്‍ ഡോക്ടര്‍ ക്യാന്‍സര്‍ ബാധിച്ച ടിഷ്യൂ നീക്കം ചെയ്യുന്നു. അല്ലെങ്കില്‍ കീമോതെറാപ്പി ചെയ്ത് ക്യാന്‍സര്‍ കോശങ്ങളെ ഇല്ലാതാക്കുന്നു.
ഇവ ചെയ്യുന്നതിന് മുന്‍പ് രോഗികള്‍ക്ക് മരുന്നും അതുപോലെ, ഇഞ്ചക്ഷനും ഉണ്ടായിരിക്കും. പിന്നീട് ഉള്ളതാണ് റേഡിയേഷന്‍ തെറാപ്പി. ഇതില്‍ നല്ല ഹൈ എനര്‍ജി റേയ്‌സ് ഉപയോഗിച്ച് ക്യാന്‍സര്‍ കോശങ്ങളെ ഇല്ലാതാക്കുന്നു. അടുത്തതാണ് ടാര്‍ഗറ്റഡ് തെറാപ്പി. ഇത് ക്യാന്‍സറിന്റെ വളര്‍ച്ച തടയുന്നതിനായി ഉപയോഗിക്കുന്നതാണ്. ഇത് ചെയ്യുന്നതിന് മുന്‍പ് ക്യാന്‍സര്‍ രോഗത്തിന് ചേരുന്നതാണോ ഈ തെറാപ്പി എന്ന് കൂടി ഉറപ്പ് വരുത്തണം. ഈ ട്രീറ്റ്‌മെന്റ് ചെയ്യുന്നതിന് മുന്‍പ് മരുന്ന് നല്‍കും. അടുത്തതാണ് ഇമ്മ്യൂണോ തെറാപ്പി. നമ്മളുടെ രോഗപ്രതിരോധശേഷി വര്‍ദ്ധിപ്പിച്ച് ക്യാന്‍സറിനെ ചെറുക്കാന്‍ സഹായിക്കുന്ന ചികിത്സാ രീതിയാണ് ഇത്.
ക്യാന്‍സറിന് കാരണമാകുന്ന കാര്യങ്ങള്‍ ഒഴിവാക്കുക എന്നതാണ് പ്രധാനപ്പെട്ടത്. മദ്യപാനം, പുകയില ഉപയോഗം, പുകവലി എന്നിവയെല്ലാം മനുഷ്യനെ ക്യാന്‍സറിലേയ്ക്ക് തള്ളിവിടുന്നു. അതുപോലെ, നല്ല ആരോഗ്യകരമായ ഭക്ഷണങ്ങള്‍ കഴിക്കാത്തതും ഡയറ്റ് പിന്തുടരാത്തതും വ്യായാമം ചെയ്യാത്തതുമെല്ലാം ക്യാന്‍സറിന് കാരണമാണ്. ചിലര്‍ക്ക് പാരമ്പര്യമായും ക്യാന്‍സര്‍ ലഭിക്കാം. ഇതിന് ഫാമിലി ഹിസ്റ്ററി നോക്കി ഒരു ഡോക്ടറെ കണ്ട് അഭിപ്രായം തേടാവുന്നതാണ്.
