Nammude Arogyam
Cancer

സ്തനങ്ങളിൽ ഉണ്ടാകുന്ന മാറ്റങ്ങളെല്ലാം സ്തനാർബുദ ലക്ഷണങ്ങളാണോ?

സ്തനങ്ങളെ ബാധിക്കുന്ന ഏതൊരു ചെറിയ കാര്യം പോലും സ്ത്രീകളെ സംബന്ധിച്ച് ആശങ്കയും അസ്വസ്തതയുമുണ്ടാക്കുന്നതാണ്. അസാധാരണമായ ഏതൊരു ലക്ഷണവും സ്തനാര്‍ബുദ സൂചനയാണോ എന്ന ഭയം സ്ത്രീകള്‍ക്കിടയില്‍ വര്‍ധിച്ചു വരുന്നുണ്ട്. എന്നാല്‍ സമാന ലക്ഷണങ്ങള്‍ പ്രകടിപ്പിക്കുന്ന 10 കേസുകളില്‍ 9 എണ്ണവും സ്തനാര്‍ബുദം മൂലമല്ല എന്നാണ് വിദഗ്‌ധർ പറയുന്നത്. എന്നാല്‍ തീര്‍ച്ചയായും ഏത് ലക്ഷണവും ശ്രദ്ധിക്കുകയും അതിന്‍റെ കാരണം കണ്ടെത്തുകയും ചെയ്യേണ്ടത് അനിവാര്യമാണ്.

സ്തനാര്‍ബുദം മാത്രമല്ല, ഏത് തരം രോഗവസ്ഥയാണെങ്കിലും പ്രാരംഭ ഘട്ടത്തില്‍ തിരിച്ചറിയുന്നത് ചികിത്സ ഫലപ്രദമാക്കാന്‍ സഹായിക്കും.

പിരീഡ് തുടങ്ങുന്നതിന് തൊട്ടു മുന്‍പുള്ള ദിവസങ്ങളില്‍ എല്ലാ സ്ത്രീകളിലും കണ്ടുവരുന്ന ഒന്നാണ് സ്തനങ്ങളില്‍ വേദനയും അമിതമായ മൃദുത്വവും. ആര്‍ത്തവ സമയത്ത് ഹോര്‍മോണ്‍ സന്തുലനാവസ്ഥയില്‍ മാറ്റം സംഭവിക്കുന്നതും സ്തനങ്ങള്‍ക്കുള്ളില്‍ ഫ്ലുയിഡിന്റെ അളവ് കൂടുന്നതുമാണ് ഈ അവസ്ഥയ്ക്ക് കാരണം. ചിലരില്‍ പിരീഡ് തുടങ്ങുന്നതിന് തൊട്ടു മുന്‍പും ചിലരില്‍ പിരീഡ് അവസാനിച്ച ശേഷം അല്‍പ ദിവസം കൂടിയും ഈ വേദന നിലനില്‍ക്കാറുണ്ട്. ഈ വേദന ഏതെങ്കിലും അസുഖത്തിന്റെ സൂച്ചനയല്ലാത്തതിനാല്‍ തന്നെ ഭയപ്പെടേണ്ടതില്ല. സ്തനങ്ങള്‍ക്ക് മുകളില്‍ ഐസ് പാക്ക് വെയ്ക്കുന്നത് വേദന കുറയ്ക്കാന്‍ സഹായിക്കും. കൂടാതെ കഫീന്‍ അടങ്ങിയ പാനീയങ്ങള്‍, ഉപ്പ്, പഞ്ചസാര, എന്നിവ ഉപയോഗിക്കുന്നത് പൂര്‍ണമായും ഒഴിവാക്കുക.

സ്തന കലകളില്‍ കാണപ്പെടുന്ന നാരുകളുള്ള പിണ്ഡങ്ങളാണ് ഫൈബ്രോ അഡിനോമ. റബ്ബര്‍ പോലെ ഉറപ്പുള്ളതോ ചിലരില്‍ അല്പം മൃദുവായോ ഇത് കാണപ്പെടാം. സാധാരണ 15 നും 30 നും ഇടയില്‍ പ്രായമുള്ളവരിലാണ് ഈ അവസ്ഥ കണ്ടുവരുന്നത്. ചിലരില്‍ ദീര്‍ഘകാലത്തേക്ക് ഈ അവസ്ഥ നീണ്ടു നില്‍ക്കാനും സാധ്യതയുണ്ട്. ചില ഘട്ടങ്ങളില്‍ ഇത് വലിപ്പം വര്‍ദ്ധിക്കുകയും സ്പര്‍ശിക്കുന്ന സമയത്ത് വേദന ഉണ്ടാക്കുകയും ചെയ്യും. അതിനാല്‍ എത്രയും വേഗം ഒരു ഡോക്ടറെ സമീപിക്കുകയും ആവശ്യമെങ്കില്‍ മാമ്മോഗ്രഫി അല്ലെങ്കില്‍ അള്‍ട്രാ സൗണ്ട് സ്കാനിംഗ്‌ ചെയ്യുകയും ചെയ്യുന്നത് നല്ലതാണ്. ഇതോടൊപ്പം സമീകൃതാഹാരം കഴിക്കാനും ശ്രദ്ധിക്കണം. നല്ല ഭക്ഷണം ഒരു പരിധി വരെയുള്ള രോഗവസ്തകളെ ചെറുക്കും.

സ്തന കലകള്‍ക്കിടയില്‍ ദ്രാവകം നിറച്ച സഞ്ചികള്‍ പോലെ രൂപപ്പെടുന്നതാണ് സിസ്റ്റുകള്‍. 30 വയസിനും 50 വയസിനും ഇടയില്‍ പ്രായമുള്ള സ്ത്രീകളിലാണ് ഇത് കൂടുതലായി കണ്ടുവരുന്നത്. എന്നാല്‍ പ്രായം കുറഞ്ഞവരിലും ഈ അവസ്ഥ ബാധിക്കാറുണ്ട്. ആര്‍ത്തവ സമയത്ത് ഇവ വികസിക്കുകയും അതിനു ശേഷം ഇത് ചുരുങ്ങി പോകുകയും ചെയ്യും. സാധാരണഗതിയില്‍ ഈ സിസ്റ്റുകള്‍ അത്ര അപകടകാരികളല്ലെങ്കിലും വേദനയോ അസ്വസ്ഥതയോ തോന്നുന്നുവെങ്കില്‍ തീര്‍ച്ചയായും ഒരു വിദഗ്‌ധനെ സമീപിക്കുകയും ഈ സിസ്റ്റുകള്‍ നീക്കം ചെയ്യുകയും വേണം. വേദന കുറയ്ക്കാന്‍ ചൂടുള്ളതോ തണുത്തതോ ആയ വെള്ളം ഉപയോഗിച്ച് തടവുന്നതും പതിവായി വ്യായാമം ചെയ്യുന്നതും നല്ലതാണ്.

ഇരു സ്തനങ്ങളുടെയും നിപ്പിളുകളില്‍ നിന്ന് ഏതെങ്കിലും തരത്തിലുള്ള ദ്രാവകം പുറത്തേക്ക് ഒഴുകുന്നത് അമിതമാകുന്നുവെങ്കില്‍ ശ്രദ്ധിക്കേണ്ടതാണ്. ഈ ദ്രാവകം വെള്ള, തെളിഞ്ഞ, മഞ്ഞ, പച്ച, തവിട്ട് അല്ലെങ്കിൽ രക്തത്തിന്‍റെ കടുത്ത നിറവും കട്ടിയുള്ളതോ നേര്‍ത്തതോ ആയിരിക്കും. ചില ഡിസ്ചാര്‍ജുകള്‍ സ്തനാര്‍ബുദ ലക്ഷണമാകാം, എന്നാല്‍ ചിലത് തീര്‍ത്തും വ്യത്യസ്തമായ മറ്റൊരു അവസ്തയുമാകാന്‍ സാധ്യതയുണ്ട്. അപകട സാധ്യതകള്‍ ഇല്ലാത്തതാണെങ്കില്‍ ഇതിനു പ്രത്യേക ചികിത്സയൊന്നും ആവശ്യമില്ല.

സ്തന കലകളില്‍ പിണ്ഡങ്ങളും സിസ്റ്റുകളും ഉണ്ടാകുകയും അവ കൂടിച്ചേരുകയും ചെയ്യുന്ന അവസ്ഥയാണ് ബിനൈൻ ഫൈബ്രോസിസ്റ്റിക് ഡിസീസ്. പ്രായം കൂടുന്നതിന് അനുസരിച്ച് വേദനയും അസ്വസ്ഥതകളും കൂടാം. എന്നാല്‍ ഇത് കാന്‍സര്‍ സാധ്യതകള്‍ ഇല്ലാത്തതാണ്. ആര്‍ത്തവ വിരാമത്തിന് ശേഷം ഇത് അപ്രത്യക്ഷമാകുകയും ചെയ്യാറുണ്ട്. മരുന്നും പരിചരണവും കൊണ്ട് ഇത് മാറ്റിയെടുക്കാന്‍ സാധിക്കും. മാത്രമല്ല,

സ്തനങ്ങള്‍ക്ക് ചുറ്റിലും വീക്കം ഉണ്ടാകുന്ന അവസ്ഥയാണ്‌ മാസ്റ്റൈറ്റിസ്. സ്തന കലകളില്‍ വീക്കം, ചുവപ്പ് നിറം, വേദന, ചൂട്, മുഴകൾ എന്നിവ ഉണ്ടാകുന്നത് ഇതിനു കാരണമാകുന്നു. മുലയൂട്ടുന്ന അമ്മമാരിലാണ് ഈ അവസ്ഥ കൂടുതലായി കണ്ടു വരുന്നത്. കാരണം പാൽ നാളത്തില്‍ ഏതെങ്കിലും തരത്തിലുള്ള തടസ്സം അല്ലെങ്കിൽ ബാക്ടീരിയകൾ സ്തനങ്ങളിൽ പ്രവേശിക്കുക എന്നിവയെല്ലാം കാരണമാകാം. ആൻറിബയോട്ടിക്കുകൾ ഉപയോഗിക്കുന്നത് വേഗത്തില്‍ പരിഹാരം നല്‍കും. ഓരോ തവണ മുലയൂട്ടിയതിന് ശേഷവും പാല്‍ പൂര്‍ണമായും നീക്കം ചെയ്യാന്‍ ശ്രമിക്കണം. ഇത് ഈ പ്രശനം ഒരു പരിധി വരെ കുറയ്ക്കാന്‍ സഹായിക്കും.

സ്തനാരോഗ്യം സ്ത്രീകളെ സംബന്ധിച്ചിടത്തോളം ഒരു സെൻസിറ്റീവ് വിഷയമാണ്. എന്നിരുന്നാലും, മികച്ച സാങ്കേതികവിദ്യയും കൂടുതൽ അവബോധവും ഉണ്ടെങ്കിൽ, സ്തനാർബുദം ഇപ്പോൾ ഭേദമാക്കാവുന്ന തരത്തിലുള്ള അർബുദമാണ്. ഗുരുതരമായ രോഗാവസ്ഥ തടയുന്നതിന്, ആരോഗ്യകരമായ ഭക്ഷണക്രമവും, പതിവായി വ്യായാമം ചെയ്യുന്നതും, പ്രധാനമാണ്.

Related posts