Nammude Arogyam
General Healthy Foods Woman

അലര്‍ജി: ഈ ഭക്ഷണങ്ങൾ ഒഴിവാക്കാം

ഓരോ ആളുകൾക്കും അവർക്ക് പ്രീയപ്പെട്ട ഭക്ഷണങ്ങൾ കാണും, അല്ലേ? എന്നാൽ ചില തരം ഭക്ഷണങ്ങൾ ചില ആളുകൾക്ക് യോജിച്ചതാകില്ല. ഇത്തരം ഭക്ഷണങ്ങൾ അലർജിക്ക് കാരണമാകും. ഭക്ഷണത്തിലെ പ്രോട്ടീൻ ഒരു ഭീഷണിയായി തെറ്റിദ്ധരിച്ച് ശരീരം അതിനെതിരെ പ്രതികരിക്കുമ്പോഴാണ് അലർജി ഉണ്ടാകുന്നത്. ഇത് ചർമ്മത്തിൽ ചൊറിച്ചിൽ, ചെരങ്ങ്, ചുണ്ടുകൾ, നാവ് അല്ലെങ്കിൽ തൊണ്ട എന്നിവിടങ്ങളിൽ വീക്കം, ശ്വാസംമുട്ടൽ, വയറുവേദന, വയറിളക്കം, ഛർദ്ദി, തുടങ്ങിയ ആരോഗ്യപ്രശ്നങ്ങൾ ഉണ്ടാക്കുന്നു. ഭക്ഷണ അലർജികൾ ചില സമയങ്ങളിൽ ജീവന് തന്നെ ഭീഷണി വരുത്തിയേക്കാവുന്ന ഗുരുതരമായ പ്രശ്നമാണ്.

ഇമ്മ്യൂണോഗ്ലോബുലിൻ ഇ (IgE) : ഇത്തരത്തിലുള്ള ഭക്ഷണ അലർജിയിൽ, ശരീരത്തിന്റെ രോഗപ്രതിരോധ സംവിധാനം ഇമ്യൂണോഗ്ലോബുലിൻ ഇ (IgE) ആന്റിബോഡികൾ നിർമ്മിക്കുന്നതിന്റെ ഫലമായിട്ടാണ് രോഗലക്ഷണങ്ങൾ കാണിക്കുന്നത്.

നോൺ – ഇമ്മ്യൂണോഗ്ലോബുലിൻ ഇ : ഈ ഭക്ഷണ അലർജിയിൽ, ഇമ്മ്യൂണോഗ്ലോബുലിൻ ഇ ആന്റിബോഡികൾ ഉൾപ്പെടുന്നുമില്ല, അവ രോഗലക്ഷണങ്ങൾക്ക് ഉത്തരവാദികളാവുന്നുമില്ല. ഒരു വ്യക്തിക്ക് ഈ പറഞ്ഞ രണ്ട് തരത്തിലുള്ള ഭക്ഷണ അലർജികളും ഉണ്ടാകാം.

അലർജിക്ക് കാരണമാകുന്ന ഭക്ഷണങ്ങളെ അലർജൻസ് എന്ന് വിളിക്കുന്നു. ഏറ്റവും സാധാരണമായി അലർജിക്ക് കാരണമാകുന്ന ഭക്ഷ്യ പദാർത്ഥങ്ങൾ ഏതൊക്കെയെന്ന് ഇനി നമുക്ക് പരിശോധിക്കാം.

മിക്കപ്പോഴും, ജനിച്ച് ആറുമാസം പ്രായമാകുന്നതിന് മുമ്പ് പശുവിൻ പാൽ കുടിക്കുന്ന കൊച്ചുകുട്ടികളിലാണ് പശുവിൻ പാൽ അലർജി കാണപ്പെടുന്നത്. മിക്ക കുട്ടികളും അലർജിയെ മറികടക്കുമ്പോൾ, മുതിർന്നവർക്ക് മലബന്ധം അല്ലെങ്കിൽ വയറിളക്കം, ഛർദ്ദി, കുടലിന്റെ മതിൽ വീക്കം തുടങ്ങിയ രോഗലക്ഷണങ്ങളുള്ള നോൺ – ഇമ്മ്യൂണോഗ്ലോബുലിൻ ഇ അലർജി ഉണ്ടാകാം. ഇതിനായി രക്തപരിശോധന ഇല്ലാത്തതിനാൽ നോൺ – ഇമ്മ്യൂണോഗ്ലോബുലിൻ ഇ പാൽ അലർജി നിർണ്ണയിക്കാൻ പ്രയാസമാണ്. അതിനുള്ള പരിശോധനയും ലക്ഷണങ്ങളും ഭക്ഷണത്തോടുള്ള അസഹിഷ്ണുതയ്ക്ക് തുല്യമാണ്. പാൽപ്പൊടി, വെണ്ണ, മാർജറിൻ, തൈര്, ചീസ്, ക്രീം, ഐസ്ക്രീം തുടങ്ങിയ പാൽ ഉൽപ്പന്നങ്ങൾ ഒഴിവാക്കുന്നത് ഇതിനുള്ള ചികിത്സയിൽ ഉൾപ്പെടുന്നു.

മരങ്ങളിൽ നിന്ന് ലഭിക്കുന്ന കശുവണ്ടി, ബദാം, പിസ്ത, വാൾനട്ട്, പൈൻ നട്ട്സ്, മക്കാഡാമിയ നട്ട്സ്, ബ്രസീൽ നട്ട്സ് എന്നിങ്ങനെയുള്ള നട്ട്സ്, വിത്തുകൾ എന്നിവ മൂലമുള്ള അലർജിയാണ് ട്രീ നട്ട് അലർജി. ട്രീ നട്ട് അലർജിയുള്ള വ്യക്തികൾ നട്ട് കൊണ്ട് തയ്യാറാക്കുന്ന ഭക്ഷ്യ വിഭവങ്ങളായ നട്ട് ബട്ടർ, ചോക്ലേറ്റ്, മധുരപലഹാരങ്ങൾ എന്നിവ ഉണ്ടാക്കുന്നതോ കഴിക്കുന്നതോ ഒഴിവാക്കണം.

നട്ട്സിനോടുള്ള അലർജികൾ പലപ്പോഴും ആജീവനാന്തം നിലനിൽക്കുന്ന അവസ്ഥയാണ്. ഇതിന്റെ ലക്ഷണങ്ങളിൽ അനാഫൈലക്റ്റിക് ഷോക്ക് ഉൾപ്പെടുന്നു, ഇത് മരണത്തിലേക്ക് വരെ നയിച്ചേക്കാവുന്ന പ്രശ്നമാണ്. ചിലതരം നട്ട്സിനോട് അലർജിയുള്ള വ്യക്തികൾ മരങ്ങളിൽ നിന്ന് ലഭിക്കുന്ന എല്ലാത്തരം നട്ട്സും വിത്തുകളും കഴിക്കുന്നത് പൂർണ്ണമായും ഒഴിവാക്കണം. അല്ലെങ്കിൽ, ഇത് മറ്റ് നട്ട്സുകൾ മൂലം അലർജി ഉണ്ടാകാനുള്ള സാധ്യത വർദ്ധിപ്പിക്കും.

മാരകമായ അലർജി പ്രതിപ്രവർത്തനങ്ങളിൽ നിലക്കടല അഥവാ കപ്പലണ്ടിയോടുള്ള അലർജിയും സാധാരണമാണ്. എന്നിരുന്നാലും നിലക്കടല പയർ വർഗ്ഗങ്ങളാണ്. എന്നാൽ, നിലക്കടല അലർജിയുടെ കുടുംബചരിത്രം ഉള്ളവർക്ക് ഇത് മൂലം കൂടുതൽ അപകടസാധ്യതയുണ്ട്. കുഞ്ഞിലെ തന്നെ ഭക്ഷണത്തിൽ കപ്പലണ്ടി ഉൾപ്പെടുത്തുന്നത് അവയോടുള്ള അലർജിയുടെ വളർച്ചയെ തടയുമെന്നും പഠനങ്ങൾ വ്യക്തമാക്കുന്നു.

മുട്ടയോടുള്ള അലർജി സാധാരണമായി കാണപ്പെടുന്ന ഭക്ഷണ അലർജികളിൽ ഒന്നാണ്. പക്ഷേ പലപ്പോഴും, മുട്ടകളോട് അലർജിയുള്ള കുട്ടികൾ കൗമാരപ്രായത്തിൽ ഈ അലർജിയെ മറികടക്കുന്നു. മുട്ടയുടെ മഞ്ഞക്കരു, വെള്ള എന്നിവയിലെ പ്രോട്ടീനുകൾ വ്യത്യസ്തമായതിനാൽ ഓരോ വ്യക്തിക്കും ഇവയിൽ ഏതെങ്കിലും ഒന്നിനോടാവാം ഒന്നുകിൽ അലർജിയുണ്ടാകുക. മുട്ടയുടെ വെള്ളയോടുള്ള അലർജിയാണ് ഏറ്റവും സാധാരണമായത്. രസകരമെന്നു പറയട്ടെ, മുട്ടകൾ ചൂടാക്കുന്നത് പ്രോട്ടീനുകളുടെ ആകൃതി മാറ്റുന്നു. അതിനാൽ തന്നെ അലർജിയുള്ള ചില ആളുകൾക്ക് മുട്ട അടങ്ങിയ ബിസ്കറ്റ് അല്ലെങ്കിൽ കേക്കുകൾ പോലുള്ള ഭക്ഷ്യ വസ്തുക്കൾ പ്രശ്‌നം കൂടാതെ തന്നെ കഴിക്കാൻ സാധിക്കുന്നു.

കഴിക്കാൻ ഏറെ രുചികരമാണെങ്കിലും സോയാബീൻ പല ആളുകളിലും അലർജിക്ക് കാരണമായേക്കാം. സോയാബീനിലെ ഒരു പ്രോട്ടീൻ മൂലമാണ് സോയ അലർജിയുണ്ടാകുന്നത്. സോയാബീനും സോയ പാൽ അല്ലെങ്കിൽ സോയ സോസ് പോലുള്ള ഉൽപ്പന്നങ്ങളും സോയ അലർജി ഉണ്ടാക്കുന്നവയിൽ ഉൾപ്പെടുന്നു. നിങ്ങൾക്ക് സോയ അലർജിയുണ്ടെങ്കിൽ പ്രോസസ് ചെയ്ത ഏതെങ്കിലും ഭക്ഷണസാധനങ്ങൾ വാങ്ങുന്നതിന് മുമ്പ് ലേബലുകൾ ശ്രദ്ധാപൂർവ്വം വായിക്കേണ്ടത് പ്രധാനമാണ്, കാരണം നിരവധി ഭക്ഷണങ്ങളിൽ സോയ ഉപയോഗിക്കുന്നുണ്ട്.

സമാനമായ ദഹന സംബന്ധമായ ലക്ഷണങ്ങളാൽ പലപ്പോഴും സീലിയാക് രോഗം അല്ലെങ്കിൽ നോൺ-സീലിയാക് ഗ്ലൂറ്റൻ സംവേദനക്ഷമത എന്നിവയാണെന്ന് തെറ്റിദ്ധരിക്കപ്പെടുന്ന തരം അലർജിയാണ് ഗോതമ്പ് അലർജി. എന്നിരുന്നാലും, മേൽപ്പറഞ്ഞ രണ്ട് ആരോഗ്യ പ്രശ്‌നങ്ങളെ പോലെയല്ല ഗോതമ്പ് അലർജി. ഇത് ജീവൻ തന്നെ അപകടത്തിലാക്കുന്ന പ്രശ്നമാണ്. ഗോതമ്പിലെ നൂറുകണക്കിന് പ്രോട്ടീനുകളിൽ ഏതെങ്കിലും ഒന്നിനോട് രോഗപ്രതിരോധ സംവിധാനം നടത്തുന്ന പ്രതികരണമാണ് ഗോതമ്പ് അലർജി ഉണ്ടാക്കുന്നത്. മറുവശത്ത്, സീലിയാക് രോഗവും നോൺ-സീലിയാക് ഗ്ലൂറ്റൻ സംവേദനക്ഷമതയും ഗ്ലൂറ്റൻ എന്ന നിർദ്ദിഷ്ട പ്രോട്ടീനിന്റെ രോഗപ്രതിരോധ പ്രതികരണമാണ്

Related posts