Nammude Arogyam
Heart Disease

സ്ത്രീകളിലും, പുരുഷന്മാരിലും ഹൃദ്രോഗ ലക്ഷണങ്ങൾ ഒരു പോലെയാണോ?

ഭക്ഷണം, ജീവിതശൈലി എന്നിവയിലെല്ലാം വലിയ മാറ്റങ്ങൾ സംഭവിക്കുന്ന കാലത്താണ് നമ്മൾ ജീവിക്കുന്നത്. അതുകൊണ്ട് തന്നെ രോഗങ്ങളും അത്ര തന്നെ മനുഷ്യ ജീവിതത്തിൻറെ നിറം കെടുത്തുന്നുണ്ട്. അമിതവണ്ണവും അതിനോട് അനുബന്ധിച്ചുള്ള അസുഖങ്ങളും അനുഭവിക്കുന്നവരുടെ എണ്ണം ദിനപ്രതി വർധിച്ചുവരികയാണ്. അതിൽ മുൻപന്തിയിൽ തന്നെയുണ്ട് ഹൃദ്രോഗം. ശരീരത്തിന് ഹൃദയം എത്രത്തോളം പ്രധാനമാണോ, അത്ര തന്നെ അപകടകരവുമാണ് ഹൃദയ സംബന്ധമായ പ്രശ്നങ്ങൾ അനുഭവിക്കുന്നതും.

ഹൃദയത്തെ ആരോഗ്യത്തോടെ സൂക്ഷിക്കേണ്ടതിന്റെ ആവശ്യകത വ്യക്തമാക്കുന്നതിനാണ് എല്ലാ വർഷവും സെപ്റ്റംബർ 29 -ന് ലോക ഹൃദയദിനം ആഘോഷിക്കുന്നത്. പ്രത്യേകിച്ച് ഈ പുതിയ ജീവിതരീതിയിൽ കാർഡിയോവാസ്കുലർ രോഗാവസ്ഥകളെക്കുറിച്ച് (സിവിഡി) അവബോധം ഉണ്ടായിരിക്കേണ്ടത് അനിവാര്യമാണ്. ഹൃദയ സംബന്ധമായ അസുഖങ്ങളുടെ നിരന്തരമായ വളർച്ചാ നിരക്കിന്റെ ഒരു പ്രധാന കാരണം ശാരീരിക പ്രവർത്തനങ്ങളുടെ അഭാവം, തെറ്റായ ഭക്ഷണരീതികൾ, പഞ്ചസാര, ഉപ്പ്, ട്രാൻസ് ഫാറ്റുകൾ എന്നിവയുടെ അമിത ഉപയോഗം തന്നെയാണ്. നേരത്തെ പുരുഷന്മാരിലാണ് ഹൃദ്രോഗം കൂടുതലായി കണ്ടിരുന്നത്, എന്നാൽ നിലവിൽ സ്ത്രീ പുരുഷ വ്യത്യാസമില്ലാതെ എല്ലാവരിലും തന്നെ ഈ അവസ്ഥ കണ്ടു വരുന്നുണ്ട്. എന്നാൽ പുരുഷന്മാരിലും സ്ത്രീകളിലും വ്യത്യസ്ത ലക്ഷണങ്ങളാണ് പ്രകടമാകാറുള്ളത് എന്ന കാര്യം എടുത്ത് പറയേണ്ടതാണ്.

കൊറോണറി ആർട്ടറി രോഗം മുതൽ രക്താതിമർദ്ദം, ഹൃദയാഘാതം വരെയുള്ള അവസ്ഥകളെ ചേർത്താണ് ഹാർട്ട് ഡിസീസ് എന്ന പേരിൽ അറിയപ്പെടുന്നത്. ഹൃദ്രോഗത്തിലേയ്ക്ക് നയിക്കുന്ന ഒരു സാധാരണ കാരണം ഹൃദയത്തിലേക്കുള്ള സുഗമമായ രക്തയോട്ടം നിയന്ത്രിക്കുന്ന ധമനികളിൽ കൊളസ്ട്രോൾ വർദ്ധിക്കുന്നതാണ്. കാലക്രമേണ, ഹൃദയത്തിന് ആവശ്യത്തിന് ഓക്സിജനും പോഷക സമ്പുഷ്ടമായ രക്തവും ലഭിക്കാതെ വരും. ഇസ്കെമിയ എന്നറിയപ്പെടുന്ന ഈ അവസ്ഥ നെഞ്ചുവേദനയ്ക്ക് കാരണമാകുന്നു. എന്നാൽ പലപ്പോഴും ഇത്തരത്തിലുള്ള നെഞ്ചുവേദന അനുഭവപ്പെടുന്നത് അസിഡിറ്റിയുടെ ഭാഗമാണെന്ന് വിശ്വസിച്ചുകൊണ്ട് ഒറ്റമൂലികൾ പരീക്ഷിക്കുന്നവരാണ് കൂടുതൽ ആളുകളും. ഹൃദയത്തിൽ ഒളിഞ്ഞിരിക്കുന്ന വലിയ അപകടത്തെ തിരിച്ചറിയാതെ പോകുന്നതിനും ഇത് കാരണമാകും.

ഹൃദയ സംബന്ധമായ രോഗാവസ്ഥകൾ അനുഭവിക്കുന്ന പുരുഷന്മാരിൽ താരതമ്യേന നേരത്തെ തന്നെ രോഗ ലക്ഷണങ്ങൾ കണ്ടു തുടങ്ങാറുണ്ട്‌, എന്നാൽ സ്ത്രീകളിൽ വളരെ വൈകിയാണ് രോഗലക്ഷണങ്ങൾ പ്രകടമാകുന്നത്. അതുകൊണ്ട് തന്നെ അപകട സാധ്യതയും വളരെ വലുതാണ്‌. എന്നാൽ പുരുഷന്മാരിൽ കടുത്ത നെഞ്ചുവേദനയാണ് സാധാരണയായി കണ്ടു വരുന്ന രോഗ ലക്ഷണം. എന്നാൽ സ്ത്രീകളിൽ മറ്റ് പല ലക്ഷണങ്ങളും കണ്ടുവരാറുണ്ട്. അവ എന്തൊക്കെയാണെന്ന് നോക്കാം.

1.പുറകിലോ കൈകളിലോ വേദന

2.ഓക്കാനം

3.ക്ഷീണം

4.ശ്വാസം മുട്ടൽ

5.തലകറക്കം

6.അസാധാരണമായ വേഗത്തിലുള്ള ഹൃദയമിടിപ്പ്

7.ഹൃദയമിടിപ്പ്

8.താടിയെല്ലിലും കഴുത്തിലും വേദന

9.അങ്ങേയറ്റത്തെ ബലഹീനത

10.തണുത്ത വിയർപ്പ്

11.ശ്വാസം മുട്ടൽ

12.അസാധാരണമായ ക്ഷീണം

13.ക്രമരഹിതമായ ഹൃദയമിടിപ്പ്

ചില ഭക്ഷണങ്ങൾ പതിവായി കഴിക്കുന്നത് നമ്മുടെ ഹൃദയാരോഗ്യം മെച്ചപ്പെടുത്തും. എല്ലാ ദിവസവും നിയന്ത്രിതമായ അളവിൽ ഉപയോഗിക്കുമ്പോൾ ശരീരത്തിലെ ചീത്ത കൊളസ്ട്രോൾ ഇല്ലാതാക്കുകയും നല്ല കൊളസ്ട്രോൾ വർധിപ്പിക്കുകയും ചെയ്തുകൊണ്ട് ശരീരത്തെ കാർഡിയോവാസ്കുലർ രോഗാവസ്ഥകളിൽ നിന്ന് സംരക്ഷിയ്ക്കും. അത്തരം ഭക്ഷണങ്ങൾ ഏതൊക്കെയാണെന്ന് നോക്കാം.

1.ബദാം-ദിവസവും അഞ്ചോ ആറോ ബദാം പരിപ്പ് കുതിർത്തത് കഴിച്ചുകൊണ്ട് ദിവസം ആരംഭിക്കുക. കാരണം അവ പലതരം പോഷകങ്ങളുടെ ഉറവിടമാണ് കൂടാതെ ഹൃദയത്തിന് ആരോഗ്യകരമായ ലഘുഭക്ഷണമായും ഇത് പരിഗണിക്കാം. പോഷകാഹാര ഗവേഷണമനുസരിച്ച്, ഓരോ ദിവസവും 1.5 സെർവിംഗ്സ് (43 ഗ്രാം) ബദാം പോലുള്ള പോഷകസമൃദ്ധമായ ഭക്ഷണങ്ങൾ അടങ്ങിയ ഹൃദയാരോഗ്യകരമായ ഭക്ഷണക്രമം, മൊത്തത്തിലുള്ള കൊളസ്ട്രോളും, എൽഡിഎൽ കൊളസ്ട്രോളും കുറയ്ക്കുകയും ഹൃദയത്തെ ദോഷകരമായി ബാധിക്കുന്ന വീക്കം കുറയ്ക്കുകയും ചെയ്യും. ഇത് ഹൃദ്രോഗ സാധ്യത തടയാൻ പ്രയോജനം ചെയ്യും.

2.ചെറു മത്സ്യങ്ങൾ-മത്തി അല്ലെങ്കിൽ അയല പോലുള്ള മത്സ്യം കഴിക്കുന്നത് ഹൃദയത്തിന് ഗുണം ചെയ്യും, കാരണം അവ ഒമേഗ-3ന്റെ നല്ല ഉറവിടമാണ്.

3.വ്യായാമം പതിവാക്കാം-നല്ല ഭക്ഷണ ശീലങ്ങൾക്ക്‌ പുറമേ നിർബന്ധമായും ചെയ്യേണ്ട മറ്റൊരു കാര്യമാണ് വ്യായാമം. എല്ലാ ദിവസവും കുറഞ്ഞത് 30 മിനിറ്റെങ്കിലും പതിവായി വ്യായാമം ചെയ്യാനായി ശ്രദ്ധിക്കണം. ഇത് രക്തത്തിലെ പഞ്ചസാരയുടെയും കൊളസ്ട്രോളിന്റെയും അളവ് നിരീക്ഷിച്ച്, നിയന്ത്രിത പരിധിക്കുള്ളിൽ അളവ് നിലനിർത്താൻ സഹായിക്കും. ശരീരത്തിൻറെ ആരോഗ്യകരമായ അവസ്ഥ നിലനിർത്താൻ ശാരീരിക വ്യായാമങ്ങൾ അനിവാര്യമാണ്.

ഹൃദ്രോഗ ലക്ഷണങ്ങൾ സ്ത്രീകളിലും പുരുഷന്മാരിലും ഒരുപോലെയല്ല എന്നാണ് ആദ്യം മനസിലാക്കേണ്ടത്. ചികിത്സാ രീതികൾ ഒന്നാണെങ്കിലും ലക്ഷണങ്ങൾ, അപകട സാധ്യതകൾ എന്നിവ ഏറെ വ്യത്യാസപ്പെട്ടിരിക്കുന്നു. ഇവ തിരിച്ചറിഞ്ഞെങ്കിൽ മാത്രമേ കൃത്യമായ സമയത്ത് രോഗാവസ്ഥ കണ്ടെത്താനും ചികിത്സാ മാർഗങ്ങൾ സ്വീകരിക്കാനും സാധിക്കൂ.

Related posts