ഇന്ന് സ്ത്രീകളില്‍ അമിതമായി കണ്ടുവരുന്ന കാന്‍സറാണ് സ്തനാര്‍ബുദം. പല കാരണങ്ങളാല്‍ ഇന്ന് സ്തനാര്‍ബുദം സ്ത്രീകളില്‍ കണ്ട് വരുന്നുണ്ട്. സ്തനത്തിലെ കോശങ്ങള്‍ അസാധാരണമായി വളരുന്നത് മൂലം ഉണ്ടാകുന്നതാണ് സ്തനാര്‍ബുദം സ്ത്രീകളിലും പുരുഷന്മാരിലും സ്തനാര്‍ബുദം വരുന്നുണ്ട്. എന്നാല്‍, സ്ത്രീകളിലാണ് ഏറ്റവുമധികം ഇത് വരാനുള്ള സാധ്യത കൂടുതല്‍. അമിതമായി തടി ഉള്ളവരിലും പ്രായം കൂടുന്നതുമെല്ലാം സ്തനാര്‍ബുദത്തിന്റെ സാധ്യത സ്ത്രീകളില്‍ കൂട്ടുന്നുണ്ട്.
സ്തനാര്‍ബുദം വരാതിരിക്കാന്‍ സ്ത്രീകള്‍ ശ്രദ്ധിക്കേണ്ട കുറച്ച് കാര്യങ്ങളുണ്ട്. അതില്‍ പ്രധാനപ്പെട്ടതാണ് ഡയറ്റ്. സ്തനാര്‍ബുദം വരാതിരിക്കാന്‍ സ്ത്രീകള്‍ പിന്തുടരേണ്ട ഭക്ഷണരീതികള്‍ ഏതെല്ലാമെന്ന് നോക്കാം.
1.ശരീരഭാരം ശ്രദ്ധിക്കണം-നമ്മളുടെ ബോഡി മാസ്സിനേക്കാള്‍ കൂടുതല്‍ തടി ഉണ്ടാകുന്നത് ആരോഗ്യത്തിന് നല്ലതല്ല. അമിതമായി വണ്ണം ഉള്ളത് സ്തനാര്‍ബുദത്തിന്റെ സാധ്യത കൂട്ടുന്ന ഘടകമാണ്. 18 വയസ്സിന് മുകളിലുള്ള സ്ത്രീകള്‍ ശരീരഭാരം കൃത്യമായ രീതിയില്‍ നിലനിര്‍ത്താന്‍ എല്ലായാപ്പോഴും ശ്രദ്ധിക്കണം. 10% വരെ ശരീരഭാരം അമിതമായി കൂടുന്നത് കാന്‍സറിലേയ്ക്ക് നയിക്കുന്നുണ്ട്. അതിനാല്‍ തന്നെ, നല്ല ഹെല്‍ത്തി ഡയറ്റും വ്യായാമവും പിന്തുടര്‍ന്ന് ശരീരഭാരം നിയന്ത്രിക്കാന്‍ ശ്രദ്ധിക്കുക. കൊഴുപ്പ് കുറഞ്ഞ ഭക്ഷണങ്ങള്‍ ഇവര്‍ കഴിക്കുന്നത് നല്ലതാണ്. നാഷ്ണല്‍ കാന്‍സര്‍ ഇന്‍സ്റ്റിറ്റ്യൂട്ടിന്റെ അഭിപ്രായത്തില്‍ ആഴ്ച്ചയില്‍ നാലോ അതില്‍ കൂടുതലോ മണിക്കൂര്‍ വ്യായാമം ചെയ്യുന്നത് കാന്‍സര്‍ സാധ്യത കുറയ്ക്കുന്നു എന്നാണ് പറയുന്നത്.
2.പച്ചക്കറികള്‍ നന്നായി കഴിക്കാം-പച്ചക്കറികളില്‍ ധാരാളം നാരുകള്‍ അടങ്ങിയിട്ടുണ്ട്. കൂടാതെ, ആന്റിഓക്‌സിഡന്റ്‌സും ഫിറ്റോകെമിക്കല്‍സും അടങ്ങിയിരിക്കുന്നു. ഇവ കാന്‍സര്‍ സാധ്യത കുറയ്ക്കുന്നുണ്ട്. കൂടാതെ, പ്രമേഹം, ഹൃദയ സംബന്ധമായ രോഗങ്ങള്‍ എന്നിവയില്‍ നിന്നെല്ലാം സംരക്ഷണം നല്‍കാന്‍ സഹായിക്കുന്നുണ്ട്. അതിനാല്‍, നല്ലപോലെ പച്ചക്കറികൾ, പ്രത്യേകിച്ച് നിറം ഉള്ള പച്ചക്കറികൾ ദിവസേന കഴിക്കുന്നത് നല്ലതാണ്. പച്ചക്കറികള്‍ കഴിക്കുമ്പോള്‍ അതില്‍ ഒരു കപ്പ് ഇലകളും, അര കപ്പ് നുറുക്കിയ പച്ചക്കറികളും അര കപ്പ് പഴങ്ങളും കാല്‍കപ്പ് ഡ്രൈ ഫ്രൂട്‌സ്, 6 ഔണ്‍സ് ഫ്രൂട് ജ്യൂസ് എന്നിവ ഉള്‍പ്പെടുത്താന്‍ ശ്രദ്ധിക്കുക.
3.കൊഴുപ്പ് അടങ്ങിയ ആഹാരം കുറയ്ക്കാം-വെണ്ണ, ഫുള്‍ ഫാറ്റ് മില്‍ക്ക്, കോഴി, താറാവ് എന്നിവയുടെ സ്‌കിന്‍ അടക്കം ഉപയോഗിക്കുന്നത്, നന്നായി കൊഴുപ്പടങ്ങിയ മാംസം, ഹൈഡ്രജനേറ്റഡ് ഓയില്‍ എന്നിവയെല്ലാം ഉപയോഗിക്കുന്നത് കുറയ്ക്കുക. ഇതിന് പകരം, ഒലീവ് ഓയില്‍, അവോകാഡോ, നട്‌സ്, സീഡ്‌സ്, ഫാറ്റി ഫിഷ് എന്നിവയെല്ലാം ആഹാരത്തില്‍ ഉള്‍പ്പെടുത്തുക.
4.സോയ്-അനവധി പ്രോട്ടീന്‍, ഫൈബര്‍, വിറ്റമിന്‍ ബി, അയേണ്‍, കാല്‍സ്യം എന്നിവയാല്‍ സമ്പന്നമാണ് സോയ്. ഇത് ഈസ്ട്രജന്‍ നിയന്ത്രിക്കുന്നതിനും അതുപോലെ, ഹോര്‍മോണ്‍ വ്യതിയാനം ബാലന്‍സ് ചെയ്യുന്നതിനും സഹായിക്കുന്നുണ്ട്. ഇത് സ്തനങ്ങളുടെ ആരോഗ്യം നിലനിര്‍ത്താന്‍ സഹായിക്കുന്നു. അതുപോലെ, എല്ലുകളുടെ ആരോഗ്യത്തിനും സോയ് നല്ലതാണ്. സോയ് ബീന്‍, തോഫൂ, സോയ് മില്‍ക്ക് എന്നിവയെല്ലാം കഴിക്കുന്നത് സ്തനങ്ങളുടെ ആരോഗ്യം മെച്ചപ്പെടുത്താന്‍ സഹായിക്കുന്നതായി വിമണ്‍സ് ഹെല്‍ത്തി ഈറ്റംഗ് ആന്റ് ലിവിംഗ് പ്രസിദ്ധീകരിച്ച പഠനത്തില്‍ പറയുന്നുണ്ട്.
5.ഗ്രീന്‍ ടീ*ഗ്രീന്‍ ടീയില്‍ ആന്റികാന്‍സര്‍ ഘടകങ്ങള്‍ അടങ്ങിയിരിക്കുന്നു. അതിനാല്‍ തന്നെ. ഗ്രീന്‍ ടീ ദിവസേന കുടിക്കുന്നത് നല്ലതാണ്. മധുരം ചേര്‍ക്കാതെ വേണം ഇവ കഴിക്കാന്‍. ദിവസേന ഒന്നോ നാലോ കപ്പ് ഗ്രീന്‍ ടീ കുടിക്കുന്നത് നല്ലതാണ്.
6.മദ്യപാനം-പുരുഷന്മാരില്‍ മാത്രമല്ല, സ്ത്രീകളിലും മദ്യപാനം ഇന്ന് സര്‍വ്വസാധാരണമായിരിക്കുകയാണ്. ഇത് സ്ത്രീകളില്‍ കാന്‍സര്‍ സാധ്യത വളരെയധികം കൂട്ടുന്നുണ്ട്. പ്രത്യേകിച്ച് സ്തനാര്‍ബുദം. ചിലര്‍, വൈന്‍ മാത്രം കഴിക്കുന്നവരുമായിരിക്കും. എന്നാല്‍, വൈന്‍ അമിതമായി കഴിക്കുന്നതും കാന്‍സര്‍ സാധ്യത കൂട്ടുന്നുണ്ട്.
7.വിറ്റമിന്‍ ഡിയും-കാല്‍സ്യം അടങ്ങിയതും വിറ്റമിന്‍ ഡി അടങ്ങിയതുമായ ആഹാരങ്ങള്‍ കൃത്യമായി കഴിക്കണം. എന്നാല്‍ മാത്രമാണ് എല്ലുകള്‍ നല്ല ആരോഗ്യത്തോടെ ഇരിക്കൂ. പ്രത്യേകിച്ച് ആര്‍ത്തവ വിരാമം ആരംഭിച്ച സ്ത്രീകളില്‍ ഓസ്റ്റിയോപൊറോസീസ് വരാന്‍ സാധ്യത കൂടുതലാണ്. ഇത് ഒഴിവാക്കാന്‍ വിറ്റമിന്‍ ഡി അടങ്ങിയ ആഹാരങ്ങള്‍ കഴിക്കാം. കൊഴുപ്പ് കുറഞ്ഞ പാല്‍ ഉല്‍പന്നങ്ങള്‍, സോയ്മില്‍ക്ക് എന്നിവയും കഴിക്കാവുന്നതാണ്. അതുപോലെ, സാല്‍മണ്‍ ഫിഷ് കഴിക്കുന്നതും വിറ്റമിന്‍ ഡി ശരീരത്തില്‍ എത്തുന്നതിന് സഹായിക്കുന്നു. എന്നും രാവിലെ 10 മുതല്‍ 15 മിനിറ്റ് വെയില്‍ കൊള്ളുന്നതും വിറ്റമിന്‍ ഡി ശരീരത്തില്‍ എത്തുന്നതിന് സഹായകമാണ്.
8.മധുരം കുറയ്ക്കാം-ആഹാരത്തില്‍ നിന്നും പഞ്ചസ്സാര ഒഴിവാക്കുന്നത് നല്ലതാണ്. അമിതമായി പ്രോസസ്സിംഗ് കഴിഞ്ഞ് എത്തുന്ന ഭക്ഷ്യവസ്തുവാണ് പഞ്ചസ്സാര. അമിതമയി പഞ്ചസ്സാര കഴിക്കുന്നത് ഇന്‍സുലിന്‍ കൂടുന്നതിന് കാരണമാണ്. ഇത് ശരീരഭാരം കൂടുന്നതിലേയ്ക്കും നയിക്കും. ഇതും കാന്‍സറിന് കാരണമാകും.
നല്ല ആരോഗ്യകരമായ ഡയറ്റ് പിന്തുടരുകയും ജീവിതരീതി മെച്ചപ്പെടുത്തുകയും ചെയ്യുന്നത് സ്തനാര്‍ബുദത്തിന്റെ സാധ്യത കുറയ്ക്കുന്നുണ്ടെന്ന് വിവിധ പഠനങ്ങളിൽ പറയുന്നുണ്ട്. അതിനാൽ തന്നെ മുകളിൽ പറഞ്ഞ രീതികൾ പിന്തുടരുന്നത് നല്ലതാണ്.
