ഗര്‍ഭകാലം പല ചിട്ടകളും, പല അരുതുകളും പിന്‍തുടരേണ്ട കാലം കൂടിയാണ്. അമ്മയെ ബാധിയ്ക്കുന്ന മിക്കവാറും എല്ലാം തന്നെ കുഞ്ഞിനേയും ബാധിയ്ക്കുന്നതാണ്. അതാണ് ഇത്തരം ചിട്ടകൾക്ക് പിന്നിലെ പ്രധാന കാരണം. അത് കൊണ്ട് തന്നെ ഭക്ഷണത്തിന്റെ കാര്യത്തില്‍ പോലും ഏറെ ശ്രദ്ധ വയ്ക്കണം. കുഞ്ഞിന് ദോഷം വരുത്താനും, ഗുണം വരുത്താനുമെല്ലാം തന്നെ ഭക്ഷണങ്ങള്‍ കാരണമാകും. ചില നല്ല ഭക്ഷണങ്ങള്‍ പോലും ഗര്‍ഭകാലത്തു ദോഷം വരുത്തുമെന്നു പറയാം. അമ്മയ്ക്കല്ലെങ്കില്‍ കുഞ്ഞിന്. ഗര്‍ഭകാലത്ത് ഗര്‍ഭിണി കഴിയ്‌ക്കേണ്ടതും ഒഴിവാക്കേണ്ടതുമായ പല ഭക്ഷണ വസ്തുക്കളുമുണ്ട്. ഇതില്‍ ചിലതിനെ കുറിച്ചറിയാം.
ഗര്‍ഭിണി കഴിയ്‌ക്കേണ്ട ഭക്ഷണങ്ങള്‍
1.മുട്ട-ഗർഭിണികളുടെ സൂപ്പർ ഫുഡ് ആയ മുട്ട ധാതുലവണങ്ങൾ, അമിനോ ആസിഡ് തുടങ്ങിയവയുടെ കലവറയാണ്. മുട്ട കഴിക്കുന്നതിലൂടെ ഉയർന്ന അളവിൽ കാത്സ്യവും പ്രോട്ടീനും ശരീരത്തിലെത്തുന്നു. ഗർഭസ്ഥശിശുവിന്റെ ആരോഗ്യത്തിനും പ്രോട്ടീന്റെ അളവ് അമ്മയുടെ ശരീരത്തിലെത്തേണ്ടത് ആവശ്യമാണ്. മുട്ടയിൽ ധാരാളമായി അടങ്ങിയിരിക്കുന്ന കോളിൻ ഗർഭസ്ഥശിശുവിന്റെ തലച്ചോറിന്റെ വളർച്ചയ്ക്കും നാഡീവ്യൂഹങ്ങളുടെ പ്രവർത്തനക്ഷമതയ്ക്കും അത്യാവശ്യമാണ്. മുട്ട നല്ലതു പോലെ വേവിച്ചു വേണം, കഴിയ്ക്കുവാന്‍. ഇല്ലെങ്കില്‍ സാല്‍മൊണെല്ല ബാക്ടീരിയ ബാധയുണ്ടാകാന്‍ സാധ്യതയേറെയാണ്.
2.പാലുത്‌പന്നങ്ങള്‍-പ്രോട്ടീനും കാത്സ്യവും കൂടുതലായി ശരീരത്തിലെത്തേണ്ട സമയമാണ് ഗർഭകാലം. പാലും പാലുത്പന്നങ്ങളും കഴിക്കുന്നത് വഴി ഇവ ധാരാളമായി അമ്മയുടെ ശരീരത്തിലെത്തുന്നു. ഗർഭിണികൾ ദിവസവും രണ്ട് ഗ്ലാസ് പാലെങ്കിലും കുടിക്കേണ്ടത് അത്യാവശ്യമാണ്.
3.സാല്‍മണ്‍ മത്സ്യം-ഗർഭിണിയായ സ്ത്രീകൾ മത്സ്യം കഴിക്കുന്നത് കഞ്ഞിന്റെ കാഴ്ചശക്തി വർദ്ധിക്കുന്നതിനും തലച്ചോറിന്റെ വളർച്ചയ്ക്കും ഏറെ സഹായിക്കുമെന്നാണ് പഠനങ്ങളിൽ പറയുന്നത്. സാല്‍മണ്‍ പോലുള്ള മീനുകള്‍ പ്രത്യേകിച്ചും ഗുണം നല്‍കും. സാല്‍മണ്‍ മത്സ്യത്തിൽ ഒമേഗ 3 ഫാറ്റി ആസിഡ് ധാരാളമടങ്ങിയിരിക്കുന്നു. ഇത് എല്ലുകളെയും സന്ധികളെയും കൂടുതൽ ബലപ്പെടുത്തും. ഇത് കുഞ്ഞിന്റെ തലച്ചോറിന്റെ വളര്‍ച്ചയ്ക്കും ഹൃദയത്തിനുമെല്ലാം ഏറെ നല്ലതാണ്. കൂടാതെ പ്രോട്ടീൻ, വിറ്റാമിൻ B, D തുടങ്ങിയവയുടെ സ്രോതസ്സായതിനാൽ സാല്‍മണ്‍ മത്സ്യം ആഹാരത്തിൽ ഉൾപെടുത്തുമ്പോൾ ഗർഭിണികൾക്കും ഗർഭസ്ഥശിശുവിനും കൂടുതൽ ആരോഗ്യ ഗുണങ്ങൾ ലഭിക്കും.
4.അവൊക്കാഡോ-അവൊക്കാഡോ അല്ലെങ്കില്‍ ബട്ടര്‍ ഫ്രൂട്ട് എന്നൊക്കെ അറിയപ്പെടുന്ന ഈ പഴം ഗർഭകാല ഡയറ്റിന്റെ ഭാഗമാക്കുന്നതിലൂടെ ഗർഭകാലത്ത് സ്ത്രീകൾ അനുഭവിക്കുന്ന പല ആരോഗ്യപ്രശ്‌നങ്ങൾക്കും പരിഹാരമാകും. നാരുകൾ, പൊട്ടാസ്യം, മഗ്നീഷ്യം, ഫോളേറ്റ്, വിറ്റാമിൻ C, E, K, B5, B6 തുടങ്ങിയവയുടെ സ്രോതസ്സായതിനാൽ അവൊക്കാഡോ ഗർഭകാലത്തെ ഒഴിച്ചുകൂടാനാവാത്ത പഴങ്ങളിലൊന്നാണ്. ഗർഭകാലത്ത് അനുഭവപ്പെടുന്ന കോച്ചിവലിക്കൽ, ഛർദ്ദി തുടങ്ങിയ അസ്വസ്ഥതകൾക്ക് ആശ്വാസം നൽകാൻ ഈ പഴത്തിനു കഴിയും. വയറ്റിലെ കുഞ്ഞിനും ഏറെ നല്ലതാണ് പഴം.
5.ചുവന്ന ചീര-ഇതിലടങ്ങിയിരിക്കുന്ന വിറ്റാമിൻ A, C, E തുടങ്ങിയവ ഗർഭിണികളിലുണ്ടാകുന്ന കൊളസ്‌ട്രോൾ തടയാൻ സഹായിക്കും. ഫോളിക് ആസിഡ് കൂടുതലായി ചുവന്ന ചീരയിൽ അടങ്ങിയിരിക്കുന്നതിനാൽ ഗർഭിണികളിലുണ്ടാകുന്ന വിളർച്ചയ്ക്കും, ക്ഷീണത്തിനും ഒരു പരിഹാരവുമാകും. കൂടാതെ കുഞ്ഞിനെ ജനിതകപരമായ പ്രശ്നങ്ങളിൽ നിന്ന് സംരക്ഷിക്കുകയും ചെയ്യും. കൂടാതെ, ഗർഭിണികളിലുണ്ടാകുന്ന അമിത രക്തസമ്മർദ്ദം, മാസം തികയാതെയുള്ള പ്രസവം തുടങ്ങിയ പ്രശ്നങ്ങൾക്ക് ചുവന്ന ചീര കഴിക്കുന്നതിലൂടെ പരിഹാരം കണ്ടെത്താം. ചുവന്ന ചീരയിലടങ്ങിയിരിക്കുന്ന മഗ്നീഷ്യം രക്തത്തിൽ പഞ്ചസാരയുടെ അളവിനെ നിയന്ത്രിക്കുന്നു.
6.മധുരക്കിഴങ്ങ്-മധുരക്കിഴങ്ങിലടങ്ങിയിരിക്കുന്ന ബീറ്റാ കരോട്ടിൻ ഗർഭസ്ഥശിശുവിന്റെ ആരോഗ്യത്തിന് വളരെ ഗുണകരമാണ്. ഇതിലുള്ള കൊഴുപ്പിന്റെ അളവ് താരതമ്യേന കുറവായതിനാൽ ഗർഭിണികളുടെ ഡയറ്റിൽ വളരെ എളുപ്പത്തിൽ ഉൾപ്പെടുത്താം. ഭൂമിയ്ക്കടിയിൽ വളരുന്നതിനാൽ മധുരക്കിഴങ്ങ് നിരവധി ധാതുക്കളാലും വിറ്റാമിനുകളാലും സമ്പുഷ്ടമാണ്. ഭ്രൂണവളർച്ചയ്ക്കാവശ്യമായ വിറ്റാമിൻ A, ഗർഭിണികൾക്കാവശ്യമായ മറ്റ് ഫൈബറുകൾ, ഫോളിക് ആസിഡ്, വിറ്റാമിൻ C, വിറ്റാമിൻ B6, പൊട്ടാസ്യം തുടങ്ങിയവയുടെ ഒരു കലവറ തന്നെയാണ് മധുരക്കിഴങ്ങ്.
ഗർഭിണികൾ ഒഴിവാക്കേണ്ട ഭക്ഷണങ്ങൾ
1.കാപ്പി-പലർക്കും ഒഴിച്ച്‌ കൂടാനാകാത്ത പാനീയങ്ങളിലൊന്നാണ് കാപ്പി. ഇതിലടങ്ങിയിരിക്കുന്ന കഫീൻ ഗർഭസ്ഥശിശുവിന്റെ തൂക്കം കുറയാൻ കാരണമാകും. ചില സന്ദർഭങ്ങളിൽ ഗർഭം അലസിപ്പോകാനും സാധ്യതയുണ്ട്. കഫീൻ അമിതമായ അളവിൽ ശരീരത്തിലെത്തിയാൽ ഗർഭിണികളിൽ ഹൃദയമിടിപ്പ് കൂടുന്നതിനും അസിഡിറ്റി ഉണ്ടാകുന്നതിനും സാധ്യതയുണ്ട്. അതുകൊണ്ട്, കാപ്പി മാത്രമല്ല, കഫീൻ അടങ്ങിയ എല്ലാ പാനീയങ്ങളുടെയും ഉപയോഗം ഗർഭാവസ്ഥയിൽ ഒഴിവാക്കണം.
2.പപ്പായ-പപ്പായയ്ക്കുള്ള ആരോഗ്യ ഗുണങ്ങൾ വളരെയേറെയാണ്. എന്നാൽ ഗർഭിണികൾ ഒഴിവാക്കേണ്ട ഒരു പ്രധാന ഭക്ഷണമാണിത്. ഗർഭം അലസാൻ സാധ്യതയുള്ള ചില എൻസൈമുകൾ പപ്പായയിലടങ്ങിയിരിക്കുന്നു. പച്ച പപ്പായയിൽ അടങ്ങിയിരിക്കുന്ന പപ്പൈൻ എന്ന രാസപദാർത്ഥം ഗർഭപാത്രം സങ്കോചിപ്പിക്കാൻ കാരണമാകും. അതുവഴി ഗർഭമലസുകയും ചെയ്തേക്കാം. പ്രസവസമയത്തെന്നപോലെയുള്ള വേദന ഗർഭിണികളിൽ അനുഭവപ്പെടാം. മറ്റൊന്നു കൂടിയുണ്ട്. പാപ്പെയ്ന്‍ കൂടുതലായി ഉള്ളത് പച്ചപ്പപ്പായയിലാണ്. ഇതാണ് കൂടുതല്‍ പ്രശ്‌നം. നല്ലതു പോലെ പഴുത്ത പപ്പായയില്‍ ഇതിന്റെ സ്വാധീനം കുറവാണ്. അതിനാൽ പഴുത്ത പപ്പായ വേണമെങ്കില്‍ മിതമായ അളവില്‍ കഴിയ്ക്കാം.
3.പൈനാപ്പിൾ-പ്രോട്ടീനും വിറ്റാമിനുകളും കൊണ്ട് സമ്പുഷ്ടമാണ് പൈനാപ്പിൾ. എന്നാൽ ഗർഭകാലത്ത് പൈനാപ്പിൾ കഴിക്കുന്നത് അബോർഷനുണ്ടാകാനുള്ള സാധ്യത വർദ്ധിപ്പിക്കുമെന്നാണ് പഠനങ്ങളിൽ പറയുന്നത്. ഇതിലടങ്ങിയിരിക്കുന്ന ബ്രോമിലെയിൻ എന്ന എൻസൈം ഗർഭപാത്രം സങ്കോചിക്കാൻ കാരണമാകുകയും ഗർഭം അലസാൻ സാധ്യത വർധിപ്പിക്കുകയും ചെയ്യും. എന്നാല്‍ ഇത് മിതമായ അളവില്‍ കഴിച്ചാല്‍ കുഴപ്പമുണ്ടാകാന്‍ സാധ്യതയില്ല. അമിതമായി കഴിച്ചാല്‍ ഒരു പക്ഷേ പ്രശ്‌നമുണ്ടാകാം.
4.മുളപ്പിച്ച പയറുവർഗ്ഗങ്ങൾ-മുളപ്പിച്ച പയറുവർഗ്ഗങ്ങൾക്ക് ആരോഗ്യഗുണങ്ങൾ ഏറെയാണെന്ന് നിസ്സംശയം പറയാം. എന്നാൽ പയറുവർഗ്ഗങ്ങൾ മുളപ്പിക്കാൻ വെയ്ക്കുമ്പോൾ സാല്‍മോണല്ല എന്ന ബാക്ടീരിയ ഉണ്ടാകാനുള്ള സാധ്യത കൂടുതലാണ്. ശരീരത്തിൽ ഈ ബാക്റ്റീരിയയുടെ സാന്നിധ്യം അണുബാധയുണ്ടാകാൻ കാരണമാകും. ഇത് കുഞ്ഞിനും ദോഷം വരുത്തും. ഈ ഒരു പ്രശ്‌നമൊഴിച്ചാൽ പൂര്‍ണ്ണമായും ആരോഗ്യകരമാണ് മുളപ്പിച്ച പയര്‍ വര്‍ഗങ്ങള്‍.
ഗർഭക്കാലത്ത് ഗർഭിണികളെ ബാധിക്കുന്ന എല്ലാ പ്രശ്നങ്ങളും കുഞ്ഞിനെ കൂടി ബാധിക്കുമെന്നതിനാൽ, ഈ കാലഘട്ടത്തിൽ ആരോഗ്യകരമായ ജീവിതശൈലി പിന്തുടരേണ്ടത് അത്യാവശ്യമാണ്.
