ഹെർണിയയെക്കുറിച്ച് അറിയാം

ഇന്നത്തെ ജീവിത സാഹചര്യത്തിന് അനുബന്ധമായി കൂടുതൽ ആളുകളിലും കണ്ടുവരുന്ന ഒരു ആരോഗ്യ പ്രശ്നമാണ് ഹെർണിയ രോഗം. നമ്മുടെ വയറിൻ്റെ ഭാഗത്തുള്ള പേശികൾ ദുർബലമാകുമ്പോൾ ഉള്ളിലെ ശാരീരിക അവയവങ്ങൾ അതിൻ്റെ യഥാസ്ഥാനത്ത് നിന്നും അസാധാരണമാം പുറത്തുകടക്കുന്നത് മൂലമാണ് ഹെർണിയ രോഗം ഉണ്ടാവുന്നത് എന്ന് പറയപ്പെടുന്നു. ഈ രോഗത്തിൻറെ ആദ്യലക്ഷണം വയറുവേദനയിൽ നിന്നും ആരംഭിക്കുന്നു.

പ്രധാനമായും ഭാരം ഉയർത്തുന്ന ജോലികൾ ഏർപ്പെടുമ്പോഴും മറ്റും വലിയ രീതിയിൽ വേദനകൾ അനുഭവപ്പെടാൻ തുടങ്ങും. ഒരു അവയവം അല്ലെങ്കിൽ ഏതെങ്കിലും ഒരു കോശം ദുർബലമായ പേശികളിലൂടെ പുറത്തു വരുന്നത് വഴി ഹെർണിയ രോഗം വികസിക്കുന്നു. അടിവയറിൻ്റെ ഭാഗത്തായാണ് ഇത് കൂടുതലായും കണ്ടുവരുന്നത്. ഹെർണിയ രോഗം നമ്മുടെ ജീവനെ അപകടപ്പെടുത്തുന്ന ഒരു രോഗാവസ്ഥ അല്ലെങ്കിൽ പോലും സങ്കീർണതകൾ ഒഴിവാക്കാനായി ശസ്ത്രക്രിയകൾ അത്യാവശ്യമായി വന്നേക്കാം.

ഹെർണിയകൾ ഏതെല്ലാം

ഇൻഗ്വയ്നൽ ഹെർ‌ണിയ ( Inguinal Hernia )

ഏറ്റവും സാധാരണയായി കാണപ്പെടുന്ന ഒന്നാണ് ഇൻഗ്വയ്നൽ ഹെർ‌ണിയ. വയറിൻ്റെ അടിഭാഗത്ത് പ്രത്യേകിച്ചും കുടൽ അല്ലെങ്കിൽ മൂത്രസഞ്ചിയുടെ ഭാഗത്ത് മുഴച്ചു വരുന്നത് ഇതിൻറെ ലക്ഷണമായി കാണേണ്ടതുണ്ട്. ബലഹീനതകൾ മൂലം പുരുഷന്മാരിൽ ഇത് ഉണ്ടാവുന്നത് സാധാരണമാണ്. ഏതാണ്ട് 96% ഹെർണിയയും ഈ വിഭാഗത്തിൽ പെട്ടതാണെന്ന് കണ്ടെത്തിയിരിക്കുന്നു.

ഇൻ‌സിഷണൽ ഹെർ‌ണിയ ( Incisional Hernia)

ഏതെങ്കിലും മുറിവുകളുടെ ഭാഗങ്ങളിൽ പ്രത്യേകിച്ചും ശസ്ത്രക്രിയയോ മറ്റു ചെയ്യുമ്പോൾ ഉണ്ടാവുന്ന പാടുകളിൽ നിന്നും ഉണ്ടാവുന്ന ഹെർണിയയാണ് ഇൻ‌സിഷണൽ ഹെർ‌ണിയ. മുൻപ് ശസ്ത്രക്രിയയുടെ നടന്ന ഭാഗത്തെ കുടൽഭാഗം വയറിലെ ഭിത്തികൾ വഴി പുറന്തള്ളപ്പെടുന്നു. ശസ്ത്രക്രിയ കഴിഞ്ഞ ശേഷം ശാരീരികമായി നിഷ്‌ക്രിയരായവരിലും പ്രായമായവരിലും അമിതവണ്ണമുള്ളവരിലും ഒക്കെയാണ് ഇത് ഏറ്റവും സാധാരണയായി കണ്ടുവരുന്നത്. ഇത്തരം ഹെർണിയ കാലക്രമേണ കൂടുതൽ വലുതാകുന്നു.

ഫെമറൽ ഹെർണിയ ( Femoral Hernia)

നിങ്ങളുടെ തുടയുടെ ഭാഗത്തിന് മുകളിലായി ഉണ്ടാവുന്ന ഒന്നാണിത്. മുകൾ തുടയുടെ ഭാഗങ്ങളിലേക്ക് കുടലിൻ്റെ ഭാഗം പ്രവേശിക്കുന്നത് വഴിയാണ് ഈ ഹെർണിയ വികസിക്കുന്നത്. ഭാരമുള്ള പ്രവൃത്തികൾ ചെയ്യുമ്പോഴും നിന്നുകൊണ്ട് ജോലി ചെയ്യുമ്പോഴുമെല്ലാം ഈ ഹെർണിയ പുറത്തേക്ക് തള്ളി വരുന്നതിന് കാരണമാകാറുണ്ട്. ഗർഭിണികളിലും അമിതവണ്ണമുള്ള സ്ത്രീകളിലും ഇത് സാധാരണമായി കണ്ടുവരാറുണ്ട്.

അംബ്ലിക്കല്‍ ഹെർണിയ ( Umbilical Hernia )

നിങ്ങളുടെ പൊക്കിൾക്കൊടിയുടെ ഭാഗത്ത് ഉണ്ടാവുന്ന ഹെർണിയയാണിത്. ചെറുകുടലിന്റെ ഒരു ചെറിയ ഭാഗം നാഭിക്ക് സമീപമുള്ള വയറിലെ ഭിത്തിയിലൂടെ കടന്നുപോകുന്നുണ്ട്. ഇതാണ് ഈ രോഗം ഉണ്ടാകുന്നതിനു കാരണം. നവജാതശിശുക്കളിലും അമിതവണ്ണമുള്ള സ്ത്രീകളിലും ധാരാളം കുട്ടികളുള്ള സ്ത്രീകളിലുമെല്ലാം ഇത് കാണപ്പെടുന്നു.

രോഗമുണ്ടാകാനുള്ള കാരണങ്ങൾ

പേശികളുടെ മർദ്ദം അല്ലെങ്കിൽ ബലഹീനത മൂലമാണ് സാധാരണയായി ഹെർണിയ രോഗം ഉണ്ടാകുന്നത്. ഏതെങ്കിലും ഒരു അവയവത്തിൻ്റ ഭാഗത്ത് ഉണ്ടാവുന്ന സമ്മർദ്ദം ഇവിടുത്തെ കോശങ്ങളെ ദുർബലമാക്കി മാറ്റുന്നു. ചില വ്യക്തികളിൽ ജനിക്കുമ്പോൾ തന്നെ അപൂർവ്വമായി പേശികളിൽ ബലഹീനതകൾ ഉണ്ടാകാറുണ്ട്. പിന്നീടുള്ള ജീവിത സാഹചര്യങ്ങളോട് അനുബന്ധിച്ച് ഇത് പലപ്പോഴും വികസിക്കുന്നു. അടിവയറിൻ്റെ ഭാഗങ്ങളിലെ അമിതമായ മർദ്ദം രോഗം മൂർച്ഛിക്കുന്നതിന് വഴിയൊരുക്കുന്നു. ഇനിപ്പറയുന്ന ചില കാരണങ്ങൾ മൂലം ഹെർണിയ രോഗം വികസിക്കുന്നതിന് സാധ്യതയുണ്ട്.

1.ഭാരമുള്ള വസ്തുക്കൾ എടുത്ത് ഉയർത്തുന്നത്.

2.വയറിളക്കം അല്ലെങ്കിൽ മലബന്ധം അമിതമായി ഉണ്ടാവുമ്പോൾ

3.തുടർച്ചയായ ചുമ അല്ലെങ്കിൽ തുമ്മൽ പ്രശ്നങ്ങൾ

4.സിസ്റ്റിക് ഫൈബ്രോസിസ്

5.മൂത്രമൊഴിക്കാൻ ബുദ്ധിമുട്ടുണ്ടാകുമ്പോൾ

6.വയറിലെ ദ്രാവകം ഉൽപ്പാദനം അമിതമാകുമ്പോൾ

ഇവ കൂടാതെ, അമിതവണ്ണം, മോശം ഭക്ഷണരീതി, പുകവലി എന്നിവ പേശികളെ ദുർബലപ്പെടുത്തുകയും ഹെർണിയ രോഗത്തിൻ്റെ സാധ്യത വർദ്ധിപ്പിക്കുകയും ചെയ്യുന്നു.

ലക്ഷണങ്ങൾ

1.ഒരു ഇൻ‌ജുവൈനൽ‌ ഹെർ‌ണിയ പലപ്പോഴും കടുത്ത വയറുവേദനയുടെ പ്രശ്‌നങ്ങൾ‌ക്ക് കാരണമാകാറുണ്ട്.

2.ചുമയ്ക്കുമ്പോൾ അല്ലെങ്കിൽ വ്യായാമം ചെയ്യുമ്പോഴെല്ലാം അടിവയറ്റിൽ ഉണ്ടാവുന്ന കടുത്ത വേദന.

3.ഭക്ഷണം കഴിക്കുമ്പോൾ നെഞ്ചുവേദന, ആസിഡ് റിഫ്ലക്സ് ലക്ഷണങ്ങൾ, നെഞ്ചെരിച്ചിൽ

മിക്ക സാഹചര്യങ്ങളിലും ഹെർണിയ ശരീരഭാഗങ്ങൾ വീർത്തു വരുന്നതിൻ്റെ ലക്ഷണങ്ങളെ പ്രകടമാകാറുണ്ടെങ്കിലും വേദനയില്ലാത്ത രീതിയിലാണ് ഇത് വികസിക്കുന്നത്. അതുകൊണ്ടുതന്നെ ആദ്യകാലഘട്ടങ്ങളിൽ ആരും വൈദ്യസഹായം തേടി പോകാറില്ല. കാലക്രമേണ പലപ്പോഴും കൂടുതൽ സമയം നിന്നുകൊണ്ട് ജോലി ചെയ്യുകയോ ഭാരമുള്ള വസ്തുക്കൾ ഉയർത്തുകയോ ചെയ്യുമ്പോഴാണ് വേദനയും അസ്വസ്ഥതയും പ്രകടമാകാൻ തുടങ്ങുന്നത്. സാധാരണയായി, ഇത്തരം വേദന കടുക്കുമ്പോൾ ആളുകൾ ഒരു ഡോക്ടറെ സമീപിക്കുന്നു. ഹെർണിയ രോഗത്തിൻ്റെ വ്യാപ്തി അനുസരിച്ച് ശസ്ത്രക്രിയകൾ ആവശ്യമായി വന്നേക്കാം.

രോഗനിർണയം

പൂർണ്ണമായ ശാരീരിക പരിശോധനയിലൂടെയാണ് ഡോക്ടർമാർ ഹെർണിയ രോഗനിർണയം നടത്തുന്നത്. പ്രത്യേകിച്ചും നിങ്ങൾ നിൽക്കുമ്പോഴും, അല്ലെങ്കിൽ ചുമയ്ക്കുമ്പോഴും എല്ലാം ഉണ്ടാവുന്ന വയറുവേദനയും ഞരമ്പുകളുടെ ഭാഗത്ത് ഉണ്ടാവുന്ന വീക്കവുമെല്ലാം ഡോക്ടർമാർ നിരീക്ഷിക്കുന്നു. കൂടാതെ, CT സ്കാൻ, MRI സ്കാൻ എന്നിവ പോലുള്ള ഇമേജിംഗ് പരിശോധനകൾ രോഗനിർണയത്തിന് സഹായികമാണ് വയറ്റിലെ അവയവങ്ങളുടെ യഥാസ്ഥാഥാനം കൃത്യമാണോ എന്ന് പരിശോധിക്കാൻ ബേരിയം എക്സ്-റേ, എൻഡോസ്കോപ്പി എന്നീ ടെസ്റ്റുകളും നടത്താറുണ്ട്.

ചികിത്സ

സാധാരണയായി, രോഗലക്ഷണങ്ങൾ പ്രകടമാകാത്ത ഹെർണിയയ്ക്ക് ചികിത്സ ആവശ്യമില്ല. എന്നിരുന്നാലും, രോഗസാധ്യത വർദ്ധിക്കുകയാണെങ്കിൽ ശസ്ത്രക്രിയ തന്നെ ആശ്രയം. പ്രധാനമായും ഹെർണിയ വികസിക്കുമ്പോൾ ഇത് ഉണ്ടാവുന്ന ഭാഗത്തേക്കുള്ള രക്ത വിതരണം പതിയെ വിഛേദിക്കപ്പെടുന്നു. ശസ്ത്രക്രിയും ലാപ്രോസ്കോപ്പിക് എന്ന് വിളിക്കുന്ന ചികിത്സാരീതിയും ഹെർണിയ രോഗത്തിനുള്ള പ്രതിവിധിയായി കണക്കാക്കിയിരിക്കുന്നു.

പ്രതിരോധിക്കാനായി

ലളിതമായ ജീവിതശൈലി പരിഷ്ക്കരണങ്ങൾ ഉണ്ടാക്കിയെടുക്കുന്നത് വഴി ഹെർണിയ രോഗലക്ഷണങ്ങളെ ഒരു പരിധിവരെ ഒഴിവാക്കാൻ സഹായിക്കും.

1.അനുയോജ്യമായ ശരീരഭാരം നിലനിർത്തുക

2.പുകവലി ഉപേക്ഷിക്കുക

3.മൂത്രമൊഴിക്കുമ്പോൾ അല്ലെങ്കിൽ മലവിസർജ്ജനം നടത്തുമ്പോൾ ഉണ്ടാകാൻ സാധ്യതയുള്ള ബുദ്ധിമുട്ടുകളെ ഒഴിവാക്കുക.

4.മലബന്ധം തടയാനായി നാരുകളടങ്ങിയ ഭക്ഷണങ്ങൾ ധാരാളം കഴിക്കുക.

5.കുടൽ പേശികളെ ശക്തിപ്പെടുത്തുന്നതിനായി അനുയോജ്യമായ വ്യായാമങ്ങൾ ചെയ്യുക

6.ഭാരമുള്ള എന്തെങ്കിലും വസ്തുക്കൾ കഴിവതും ഉയർത്താതിരിക്കാൻ ശ്രമിക്കുക

ശരീരത്തിൽ ഉണ്ടാകുന്ന ഏത് അസാധാരണ മാറ്റങ്ങളും സ്വയം ചികിത്സിക്കാൻ നിൽക്കാതെ ഡോക്ടറുടെ സഹായം തേടുന്നതാണ് നല്ലത്.