മുതിർന്നവരെ പോലെ തന്നെ കുട്ടികളിലും വളരെ സാധാരണമായി ഇപ്പോൾ കണ്ടു വരുന്ന രോഗമാണ് ക്യാൻസർ അഥവ അർബുദം. ആഗോളതലത്തിൽ ഓരോ വ‍ർഷവും 400,000 കുട്ടികളിലാണ് ക്യാൻസർ രോഗം സ്ഥിരീകരിക്കുന്നതെന്ന് ലോകാരോഗ്യ സംഘടന (WHO) പറയുന്നു. കുട്ടികളിൽ ഏറ്റവും സാധാരണമായി കണ്ടുവരുന്ന ക്യാൻസറുകളാണ് രക്താർബുദം, മസ്തിഷ്ക കാൻസർ, ലിംഫോമകൾ, ന്യൂറോബ്ലാസ്റ്റോമ, വിൽംസ് ട്യൂമറുകൾ എന്നിവ. കുഞ്ഞുങ്ങളിലെ ക്യാൻസർ സ്‌ക്രീനിംഗിലൂടെ കണ്ടെത്താനോ തടയാനോ എളുപ്പത്തിൽ സാധിക്കില്ല.
കുട്ടികളിലെ ക്യാൻസറുകളിൽ ഭൂരിഭാഗവും മരുന്നുകളും ശസ്ത്രക്രിയയും റേഡിയോ തെറാപ്പിയും ഉൾപ്പെടെയുള്ള മറ്റ് ചികിത്സാരീതികളും ഉപയോഗിച്ച് സുഖപ്പെടുത്താവുന്നതാണ്. ക്യാൻസർ എല്ലാ പ്രായത്തിലുമുള്ള ആളുകളിലും കാണപ്പെടുന്നു, ഇത് ശരീരത്തിന്റെ ഏത് ഭാഗത്തെയും ബാധിക്കാം. ഒറ്റ കോശങ്ങളിലെ ജനിതക മാറ്റത്തോടെയാണ് ഇത് ആരംഭിക്കുന്നത്, അത് പിന്നീട് ഒരു ട്യൂമറായി വളരുന്നു. അത് ശരീരത്തിൻ്റെ മറ്റ് ഭാഗങ്ങളെ ആക്രമിക്കുകയും ചികിത്സിച്ചില്ലെങ്കിൽ മരണം വരെ സംഭവിക്കാൻ ഇടയാക്കുകയും ചെയ്യുന്നു. മുതിർന്നവരിലെ ക്യാൻസർ പോലെയല്ല, കുട്ടികളിലെ ക്യാൻസറുകളിൽ ബഹുഭൂരിപക്ഷണത്തിനും കൃത്യമായ കാരണമില്ല.
കുട്ടിക്കാലത്തെ ക്യാൻസറിൻ്റെ കാരണങ്ങൾ തിരിച്ചറിയാൻ പല പഠനങ്ങളും ശ്രമിച്ചിട്ടുണ്ട്, എന്നാൽ കുട്ടികളിൽ വളരെ കുറച്ച് അർബുദങ്ങൾ മാത്രമാണ് പാരിസ്ഥിതിക ഘടകങ്ങൾ അല്ലെങ്കിൽ ജീവിതശൈലി ഘടകങ്ങളുമായി ബന്ധപ്പെട്ട് നിൽക്കുന്നത്. എച്ച്ഐവി, എപ്സ്റ്റൈൻ-ബാർ വൈറസ്, മലേറിയ തുടങ്ങിയ ചില വിട്ടുമാറാത്ത അണുബാധകൾ കുട്ടിക്കാലത്തെ ക്യാൻസറിനുള്ള അപകട ഘടകങ്ങളാണ്. മറ്റ് ചില അണുബാധകൾ ഒരു കുട്ടിക്ക് പ്രായപൂർത്തിയാകുമ്പോൾ ക്യാൻസർ വരാനുള്ള സാധ്യത വർദ്ധിപ്പിക്കും. കുട്ടികൾക്ക് കൃത്യമായി വാക്സിനേഷൻ നൽകേണ്ടത് പ്രധാനമാണ് (ഹെപ്പറ്റൈറ്റിസ് ബിക്കെതിരെ കരൾ അർബുദം തടയാനും ഹ്യൂമൻ പാപ്പിലോമ വൈറസിനെതിരെ സെർവിക്കൽ ക്യാൻസർ തടയാനും) കൂടാതെ നേരത്തെ രോഗം കണ്ടെത്താനുള്ള മറ്റ് മാർഗ്ഗങ്ങൾ പിന്തുടരുക. ക്യാൻസറിലേക്ക് നയിച്ചേക്കാവുന്ന വിട്ടുമാറാത്ത അണുബാധകളുടെ ചികിത്സയും കുട്ടികൾക്ക് ഉറപ്പാക്കണം
ജീവിതശൈലി ഘടകങ്ങൾ ക്യാൻസർ അപകടസാധ്യതയെ സ്വാധീനിക്കാൻ സാധാരണയായി വർഷങ്ങളെടുക്കും. കുട്ടിക്കാലത്തെ ക്യാൻസറുകളിൽ അവ വലിയ പങ്ക് വഹിക്കുമെന്ന് കരുതുന്നില്ല. റേഡിയേഷൻ എക്സ്പോഷർ പോലുള്ള ചില പാരിസ്ഥിതിക ഘടകങ്ങൾ ചില തരത്തിലുള്ള കുട്ടിക്കാലത്തെ ക്യാൻസറുകളുമായി ബന്ധപ്പെട്ടിരിക്കുന്നു.
നേരത്തെ തിരിച്ചറിഞ്ഞാൽ, ക്യാൻസർ ഫലപ്രദമായ ചികിത്സയോട് പ്രതികരിക്കാനുള്ള സാധ്യത കൂടുതലാണ്. അർബുദം നേരത്തേ കണ്ടു പിടിക്കുകയും പരിചരണത്തിലെ കാലതാമസം ഒഴിവാക്കുകയും ചെയ്യുന്നതിലൂടെ ക്യാൻസർ ബാധിച്ച കുട്ടികളുടെ ജീവിതത്തിൽ കാര്യമായ പുരോഗതി കൈവരിക്കാനാകും. ക്യാൻസർ ബാധിച്ച കുട്ടികളെ ചികിത്സിക്കാൻ ശരിയായ രോഗ നിർണയം അത്യാവശ്യമാണ്. കാരണം ഓരോ ക്യാൻസറിനും ശസ്ത്രക്രിയ, റേഡിയോ തെറാപ്പി, കീമോതെറാപ്പി എന്നിവ ഉൾപ്പെടുന്ന ഒരു പ്രത്യേക ചികിത്സാ സമ്പ്രദായം ആവശ്യമാണ്.
രോഗത്തിൻ്റെ തരത്തിനും വ്യാപ്തിക്കും അനുയോജ്യമായ തെറാപ്പി നിർദ്ദേശിക്കുന്നതിന് ശരിയായ രോഗനിർണയം അത്യാവശ്യമാണ്. സ്റ്റാൻഡേർഡ് തെറാപ്പികളിൽ കീമോതെറാപ്പി, സർജറി കൂടാതെ റേഡിയോ തെറാപ്പി എന്നിവ ഉൾപ്പെടുന്നു. ക്യാൻസർ ബാധിച്ച 80% കുട്ടികൾക്കും ചികിത്സ സാധ്യമാണ്. ഉദാഹരണത്തിന്, ഫാർമക്കോളജിക്കൽ ചികിത്സയിൽ, കുട്ടികൾക്കുള്ള അവശ്യ മരുന്നുകളുടെ WHO പട്ടികയിൽ ഉൾപ്പെടുത്തിയിരിക്കുന്ന വിലകുറഞ്ഞ ജനറിക് മരുന്നുകൾ ഉൾപ്പെടുന്നു. ചികിത്സ പൂർത്തിയാക്കുന്ന കുട്ടികൾക്ക് ക്യാൻസർ വീണ്ടും വരുന്നുണ്ടോയെന്ന് നിരീക്ഷിക്കാനും ചികിത്സയുടെ ദീർഘകാല ആഘാതം നിയന്ത്രിക്കാനും നിരന്തരമായ പരിചരണം ആവശ്യമാണ്.
