ഒരു പെണ്‍കുട്ടി പ്രായപൂര്‍ത്തിയാകുന്നത് മുതല്‍ മാസമുറ നിന്ന് മെനോപോസ് ആകുന്നതു വരേയും ഇന്നത്തെ കാലത്ത് സാര്‍വത്രികമായി ഉപയോഗിച്ച് വരുന്ന ഒന്നാണ് സാനിറ്ററി പാഡുകള്‍. പണ്ട് കാലത്ത് ഉപയോഗിച്ചു വന്നിരുന്ന തുണി പാഡിനേക്കാള്‍ സൗകര്യപ്രദമായതു കൊണ്ട് തന്നെയാണ് സാനിറ്ററി പാഡുകള്‍ ഏറെ ജനപ്രിയമായതും. പണം ചിലവാക്കേണ്ടി വരുന്നുവെങ്കിലും പഴയ ആ തലമുറ പെട്ടെന്ന് തന്നെയാണ് പാഡിലേയ്ക്ക് മാറിയതും. പാഡിന് പകരം ഇപ്പോള്‍ ടാമ്പൂണുകള്‍, മെന്‍സ്ട്രല്‍ കപ് തുടങ്ങിയ വഴികള്‍ പലരും ഉപയോഗിയ്ക്കുന്നു.
പാഡിനേക്കാള്‍ എന്തു കൊണ്ടും ആരോഗ്യകരമാണ് മെന്‍സ്ട്രല്‍ കപ്പുകള്‍ എന്ന് പറയാം. കാരണം പാഡുകള്‍ ഏറെ ജനപ്രിയമാണെങ്കിലും ഇത് വരുത്തുന്ന പാര്‍ശ്വ ഫലങ്ങളുമുണ്ട്. നിശ്ചിത സമയത്തില്‍ മാറ്റിയില്ലെങ്കില്‍ ഇവ അണുബാധ പോലുള്ള പ്രശ്‌നങ്ങള്‍ക്ക് ഇടയാക്കും. മാത്രമല്ല, സാനിറ്ററി പാഡുകളില്‍ പലപ്പോഴും കെമിക്കലുകള്‍ ഉപയോഗിയ്ക്കുന്നുണ്ട്. ഇവയാണ് നനവ് വലിച്ചെടുക്കുന്നത്. മാത്രമല്ല, ചില പാഡുകള്‍ സുഗന്ധമുള്ളവയാണ്. ഇതിന് കാരണമായി വരുന്നതും കെമിക്കലുകള്‍ തന്നെയാണ്. ആരോഗ്യത്തിന് തന്നെ ഹാനികരമായേക്കാവുന്ന പല കെമിക്കലുകളും ഇതിലുണ്ട്. ഇതിനാല്‍ തന്നെ പാഡുകള്‍ പൂര്‍ണമായും ആരോഗ്യകരമാണെന്ന് പറയാനാകില്ല.
മാത്രമല്ല, പരിസ്ഥിതിയ്ക്ക് തന്നെ ഏറെ ദോഷകരമാണ് ഇവയെന്ന് പറയാം. ഇവയുടെ പുറംപാളി പ്ലാസ്റ്റിക് ആയതിനാല്‍ തന്നെയും ഭൂമിയ്ക്ക് ഇവ ദോഷം വരുത്തുന്നവയാണ്. ഇത് നശിപ്പിയ്ക്കുകയെന്നത് അത്ര എളുപ്പവുമല്ല. ഇതു മാത്രമല്ല, ഇവ അത്ര വില കുറവുള്ളതുമല്ല. വീണ്ടും ഉപയോഗിയ്ക്കാന്‍ പാടില്ലാത്തതിനാല്‍ തന്നെ ചെലവുള്ള ഒന്നാണ്. മാത്രമല്ല, സാനിറ്ററി പാഡ് ലാഭിയ്ക്കാന്‍ വേണ്ടി ദീര്‍ഘസമയം ഉപയോഗിയ്ക്കുന്നത് മറ്റ് പല ആരോഗ്യ പ്രശ്‌നങ്ങള്‍ക്കും അണുബാധകള്‍ക്കും തുട ഭാഗത്ത് മുറിവുണ്ടാകുന്നതിനുമെല്ലാം കാരണമാകുന്നു.
ഇതിന് പരിഹാരമായി ഉളളതാണ് മെന്‍സ്ട്രല്‍ കപ്പ്. 30-50 എംഎല്‍ ബ്ലഡ് വരെ ഒരു സ്ത്രീയുടെ ഒരു മാസമുറ സമയത്ത് പുറത്തു പോകുന്നു. അനേകം പാഡുകള്‍ ഉപയോഗിയ്ക്കുന്നതിന് പകരം ഒന്നോ രണ്ടോ കൊണ്ട് ഇവ ഉപയോഗിയ്ക്കാം. ഇതും ഏറെക്കാലം ഇത് കഴുകി വൃത്തിയാക്കി ഉപയോഗിയ്ക്കാന്‍ സാധിയ്ക്കും. ഉപയോഗിയ്ക്കാന്‍ ഇത് പാഡുകളേക്കാള്‍ സുരക്ഷിതമാണ്. കറ പറ്റുമെന്ന ഭയം വേണ്ട. ഇടയ്ക്കിടെ ഇത് മാറ്റേണ്ട കാര്യമില്ല. ദീര്‍ഘനേരം ഇത് ഉപയോഗിയ്ക്കാന്‍ സാധിയ്ക്കും. ഉള്ളില്‍ വയ്ക്കുന്നതിനാല്‍ തന്നെയും ആര്‍ത്തവമെന്ന തോന്നല്‍, ഇതു കൊണ്ടുണ്ടാകുന്ന നനവും മറ്റും വരാതിരിയ്ക്കാനുള്ള വഴി കൂടിയാണ് മെന്‍സ്ട്രല്‍ കപ്പ്.
മാത്രമല്ല, ഇവ അലര്‍ജി പോലുള്ള പ്രശ്‌നങ്ങളുണ്ടാക്കുന്നില്ല. ഇത് മെഡിക്കല്‍ സിലിക്കോണും ലാറ്റെക്‌സുമെല്ലാം ഉപയോഗിച്ചുണ്ടാകുന്നതാണ്. ഇതിനാല്‍ തന്നെയും ഇത് 99 ശതമാനം സുരക്ഷിതമാണ്. ഇടയ്ക്കിടെ മാറ്റേണ്ട കാര്യമില്ല, കൃത്യമായി വച്ചാല്‍ ഇത് ലീക്കാകുമോ, കറ പറ്റുമോയെന്ന രീതിയിലെ ആശങ്കയും വേണ്ട. പുറമേയ്ക്ക് വരുന്ന ഫ്‌ളൂയിഡ് തടഞ്ഞ് ഉള്ളില്‍ നിന്നു തന്നെ ഇത് ശേഖരിയ്ക്കുന്നത് കൊണ്ട്, അതായത് സെര്‍വിക്‌സ് മുഖത്തു നിന്നു തന്നെ മാസമുറ രക്തം ശേഖരിയ്ക്കുന്നതിനാല്‍ പുറത്തേയ്ക്ക് രക്തം വരുന്നില്ലെന്നത് സ്ത്രീകളെ സംബന്ധിച്ചിടത്തോളം ഏറെ ആശ്വാസരമാണ്.
ഇത് വൃത്തിയാക്കാനും എളുപ്പമാണ്. സാധാരണ ടാപ്പ് വെള്ളത്തില്‍ കഴുതി ഉണക്കി വൃത്തിയാക്കി സൂക്ഷിയ്ക്കാം. സാധാരണ രീതിയിലെ ആര്‍ത്തവമുള്ളയാള്‍ക്ക് 10-12 മണിക്കൂര്‍ വരെ ഇത് വയ്ക്കാം. രാത്രിയില്‍ ഇത് ഏറെ ഉപയോഗ പ്രദമാണ്. ഇടയ്ക്കിടെ പാഡ് മാറ്റേണ്ട കാര്യം വരുന്നില്ല. ഓരോരുത്തര്‍ക്കും കൃത്യമായ അളവിലെ മെന്‍സ്ട്രല്‍ കപ്പുകള്‍ ലഭ്യമാണ്. സ്‌മോള്‍, മീഡിയം, ലാര്‍ജ് എന്നിങ്ങനെ മൂന്ന് സൈസുകളുണ്ട്. പ്രായമനുസരിച്ചും ആര്‍ത്തവ രക്തത്തിന്റെ കണക്കനുസരിച്ചും വേണ്ട സൈസ് വാങ്ങാം.
പ്രസവിച്ച സ്ത്രീകള്‍ക്കും അല്ലാത്തവര്‍ക്കും ഇത് രണ്ടു രീതിയില്‍ വയ്ക്കാം. പ്രസവം കഴിഞ്ഞ സ്ത്രീകള്‍ക്ക് ഈ ഭാഗത്ത് വിസ്താരം കൂടിയതിനാല്‍ തന്നെ, അതായത് വജൈനല്‍ പ്രസവം നടന്നവരില്‍, ഒരു വശം മാത്രം മടക്കി സി ഷേപ്പില്‍ ഇത് ഉള്ളിലേയ്ക്ക് വയ്ക്കാം. വിവാഹം കഴിയാത്തവര്‍ക്ക് ഇത് രണ്ടു വശവും മടക്കിയ രീതിയിലും ഉപയോഗിയ്ക്കാം. ഊരിയെടുക്കാന്‍ ഇത് ഉള്ളിലേയ്ക്ക് മടക്കി തന്നെയാണ് പുറത്തേയ്ക്ക് എടുക്കേണ്ടത്. അറ്റത്തുള്ള നീണ്ട ഭാഗത്ത് വലിച്ചാല്‍ ഇത് പുറത്തേയ്ക്ക് പോന്നെന്ന് വരില്ല.
ചിലവ് വളരെയധികം കുറവായതിനാലും, അണുബാധയുണ്ടാകില്ല എന്നതിനാലും സാനിറ്ററി പാഡിനേക്കാൾ എന്ത്കൊണ്ടും മെന്‍സ്ട്രല്‍ കപ്പ് ഉപയോഗിക്കുന്നതാണ് നല്ലത്.
