Nammude Arogyam
Maternity

പ്രഗ്നന്‍സി കിറ്റിലെ ഗര്‍ഭധാരണം സൂചിപ്പിയ്ക്കുന്ന രണ്ടാമത്തെ വര മങ്ങിയതാണെങ്കിൽ അര്‍ത്ഥമെന്ത്?

ഗര്‍ഭധാരണം (pregnancy) ഉറപ്പിയ്ക്കുന്നത് ഗര്‍ഭപരിശോധനയിലൂടെയാണ്. മൂത്ര, രക്ത പരിശോധനയും തുടര്‍ന്നുള്ള സ്‌കാനിംഗുമെല്ലാം ഇത് ഉറപ്പിയ്ക്കുന്നു. പണ്ടു കാലത്ത് ലാബുകളായിരുന്നു ഇത്തരം പരിശോധനകള്‍ക്ക് ആശ്രയമെങ്കില്‍ ഇന്നത്തെ കാലത്ത് വീട്ടില്‍ തന്നെ ടെസ്റ്റു ചെയ്യാവുന്ന പ്രഗ്നന്‍സി കിറ്റുകള്‍ ലഭ്യമാണ്. ഇതിലെ നിര്‍ദേശങ്ങള്‍ കൃത്യമായി അനുസരിച്ചാല്‍ ലഭിയ്ക്കുന്ന ഫലവും ഏതാണ്ട് കൃത്യം തന്നെയായിരിയ്ക്കും. സാധാരണ ഗതിയില്‍ മൂത്രപരിശോധന നടത്തുമ്പോള്‍ രണ്ട് വരകള്‍ പ്രത്യക്ഷപ്പെട്ടാന്‍ ഗര്‍ഭധാരണം നടന്നതായും ഒരു വര മാത്രമെങ്കില്‍ ഇല്ലെന്നുമാണ് അര്‍ത്ഥമാക്കുന്നത്.

എന്നാല്‍ ചിലപ്പോള്‍ പരിശോധനയില്‍ അവ്യക്തത ഉണ്ടാക്കും വിധം രണ്ടു വര പ്രത്യക്ഷപ്പെടും. ഒന്ന് സാധാരണ വരയായിരിയ്ക്കും. ഗര്‍ഭധാരണം സൂചിപ്പിയ്ക്കുന്ന രണ്ടാമത്തേത് തികച്ചും മങ്ങിയ വരയുമാകും. ഇത് ഗര്‍ഭധാരണം നടന്നതായാണോ അല്ലാത്തതാണോ, പരിശോധന ശരിയായോ, ഫലം ശരിയാണോ തുടങ്ങിയ പല ആശയക്കുഴപ്പങ്ങളുമുണ്ടാക്കുന്നു. ഇത്തരത്തിലെ തീരെ മങ്ങിയ വര സൂചിപ്പിയ്ക്കുന്നത് എന്താണ്, എന്തു കൊണ്ടാണ് ഇത്തരം തീരെ മങ്ങിയ വര വരുന്നത് എന്നതിനെ കുറിച്ച് കൂടുതൽ അറിയാം.

ഗര്‍ഭധാരണം, അതായത് അണ്ഡ ബീജ സംയോഗം നടക്കുന്നത് ഫെലോപിയന്‍ ട്യൂബിലാണെങ്കിലും ഈ ഭ്രൂണം ഫെലോപിയന്‍ ട്യൂബിലൂടെ സഞ്ചരിച്ച് ഗര്‍ഭപാത്ര ഭിത്തിയില്‍ പറ്റിപ്പിടിച്ച് വളരാന്‍ തുടങ്ങുമ്പോളാണ് ശരിയായ അല്ലെങ്കിൽ ഉറപ്പായ ഗര്‍ഭധാരണം എന്നു പറയാന്‍ സാധിക്കുക. യൂട്രസ് ഭിത്തിയില്‍ ഇത് പറ്റിപ്പിടിച്ച് വളരുന്ന പ്രക്രിയ ഇംപ്ലാന്റേഷന്‍ എന്നാണ് അറിയപ്പെടുന്നത്. ഈ സമയത്ത്, അതായത് ഇംപ്ലാന്റേഷന്‍ നടന്നാല്‍ ബിഎച്ച്‌സിജി എന്ന ഹോര്‍മോണ്‍ ഉല്‍പാദിപ്പിയ്ക്കപ്പെടുന്നു. ഈ ഹോര്‍മോണ്‍ സ്ത്രീ ശരീരത്തില്‍ എല്ലായിടത്തും, അതായത് മൂത്രത്തിലും രക്തത്തിലുമെല്ലാം എത്തുന്നു. ഈ ഹോര്‍മോണാണ് ഗര്‍ഭ പരിശോധന ഉറപ്പിയ്ക്കുന്നത്. ഈ ഹോര്‍മോണ്‍ മൂത്രത്തിലുള്ളപ്പോഴാണ് ഗര്‍ഭപരിശോധന പൊസറ്റീവാക്കുന്ന രണ്ടാമത്തെ വര പ്രത്യക്ഷപ്പെടുന്നത്.

എന്നാല്‍ ശരീരത്തില്‍ ഈ ഹോര്‍മോണ്‍ ഉല്‍പാദിപ്പിച്ചാലും മറ്റു ഭാഗങ്ങളിലേയ്ക്ക് പെട്ടെന്ന് എത്തിപ്പെടുന്നില്ല. എച്ച്‌സിജി മൂത്രത്തില്‍ എത്തിച്ചേര്‍ന്നിട്ടില്ല, എന്നാല്‍ ഗര്‍ഭധാരണം നടക്കുകയും ചെയ്തിട്ടുണ്ടെങ്കില്‍ ഈ കാലയളവില്‍ നടക്കുന്ന ഗര്‍ഭ പരിശോധന ഫലം ശരിയാകില്ല. ഇതു തീരെ കുറവാകുമ്പോഴും രണ്ടാമത്തെ വര മങ്ങിയതായി കാണപ്പെടും. ഇതിനാല്‍ തന്നെ ആര്‍ത്തവം തെറ്റിയതിന് തൊട്ടടുത്തായോ ഇല്ലെങ്കില്‍ ഇതിനു മുന്‍പോ ആയി ഗര്‍ഭധാരണ പരിശോധനകള്‍ നടത്തുന്നുവെങ്കില്‍ ഇത്തരം ലൈന്‍ കാണപ്പെടും. അതായത് മങ്ങിയ ലൈന്‍.

ഗര്‍ഭപരിശോധനാഫലം ഇതിനാല്‍ തന്നെ കൃത്യമറിയാന്‍ ആര്‍ത്തവ ശേഷം ഓവുലേഷന്‍ കഴിഞ്ഞ് രണ്ടാഴ്ച ശേഷം പരിശോധന നടത്തുന്നതാണ് നല്ലത്. ഓവുലേഷന്‍ സമയത്താണ് ഗര്‍ഭധാരണം സാധ്യമാകുന്നത്. ഈ സമയത്ത് ഗര്‍ഭധാരണം സംഭവിച്ചിട്ടുണ്ടെങ്കില്‍ രണ്ടാഴ്ചയ്ക്കുള്ളില്‍ എച്ച്‌സിജി ഹോര്‍മോണ്‍ നല്ല രീതിയില്‍ ഉല്‍പാദനം ആരംഭിച്ച് മൂത്രത്തിലും ഇതിന്റെ സാന്നിധ്യം നല്ല രീതിയില്‍ ഉണ്ടാകും. ഇതിനാല്‍ തന്നെ ഗര്‍ഭപരിശോധനയില്‍ ഇത് കൃത്യമായി അറിയുകയും ചെയ്യാം.

ഇതു പോലെ പരിശോധന നടത്തുന്നതില്‍ വരുത്തുന്ന പിഴവുകളും ഇത്തരം മങ്ങിയ വരയ്‌ക്കോ തെറ്റായ ഫലത്തിനോ ഇടയാക്കാറുണ്ട്. രാവിലെ ആദ്യത്തെ മൂത്രമെടുത്ത് പരിശോധിയ്ക്കുന്നതാണ് ഫലം കൃത്യമാകാന്‍ കൂടുതല്‍ നല്ലത്. പ്രത്യേകിച്ചും ഗര്‍ഭത്തുടക്കത്തില്‍. കാരണം തുടക്കത്തില്‍ ഇതിന്റെ അളവ് കുറവായിരിയ്ക്കും. ഇതിനാല്‍ തന്നെയും വെള്ളം കുടിച്ചാലോ മറ്റോ ഇതിന്റെ സാന്ദ്രതയും കുറയും. അപ്പോള്‍ പരിശോധനാഫലവും കൃത്യമായില്ലെന്ന് വരാം. എന്നാല്‍ ഗര്‍ഭം ഒരു മാസം പിന്നിട്ടാല്‍ പിന്നെ ഏത് സമയത്തും ഇതിന്റെ സാന്നിധ്യം ഉണ്ടാകും. മാത്രമല്ല, പരിശോധന നടത്തി ഉടന്‍ തന്നെ ഫലം നോക്കുകയും വേണം.

Related posts