മനുഷ്യരാശി ഏറെ ഭയത്തോടെ കാണുന്ന ഒരു രോഗാവസ്ഥയാണ് ക്യാൻസർ. കുട്ടികളെയും മുതിർന്നവരെയും എപ്പോൾ വേണമെങ്കിലും കാർന്നു തിന്നാൻ ശേഷിയുള്ള ഒരു അസുഖം. വ്യത്യസ്ത തരത്തിലുള്ള ക്യാൻസറുകൾ ഉണ്ടെങ്കിലും, ശ്വാസകോശ അർബുദമാണ് അതിൽ ഏറ്റവും മാരകമായത് എന്ന് വേണമെങ്കിൽ പറയാം. ഇന്ന്, ലോകമെമ്പാടുമുള്ള ക്യാൻസറുമായി ബന്ധപ്പെട്ട മൊത്തം മരണങ്ങളിൽ ഏതാണ്ട് 19 ശതമാനത്തോളവും ശ്വാസകോശ ക്യാൻസർ മൂലമാണ് സംഭവിക്കുന്നത്.
സ്ഥിരമായി പുകവലിക്കുന്നവരിൽ അല്ലെങ്കിൽ ഹാനികരമായ രാസവസ്തുക്കളുമായി സമ്പർക്കം പുലർത്തുന്നവരിൽ ശ്വാസകോശ ക്യാൻസർ ഉണ്ടാകാനുള്ള സാധ്യത കൂടുതലാണ്. പ്രാരംഭ ഘട്ടത്തിൽ, ശ്വാസകോശ ക്യാൻസറിന്റെ ലക്ഷണങ്ങൾ (Lung Cancer Symptoms) തിരിച്ചറിയുന്നത് സാധാരണഗതിയിൽ ബുദ്ധിമുട്ടാണ്, ചിലപ്പോൾ രോഗാവസ്ഥ കൂടുന്ന ഘട്ടത്തിൽ എത്തുന്നതുവരെ, അത് തിരിച്ചറിയാൻ പോലും കഴിയില്ല. എന്നിരുന്നാലും, ചിലപ്പോൾ നാം ശ്രദ്ധിക്കാതെ പോകുന്ന ചില പ്രകടമായ ആദ്യകാല ലക്ഷണങ്ങൾ ഉണ്ട്. ഈ ലക്ഷണങ്ങൾ തിരിച്ചറിയുന്നത് മാരകമായ രോഗബാധയ്ക്ക് സാധ്യതയുള്ളവർക്ക് അത്യന്താപേക്ഷിതമാണ്. കൂടാതെ, കൃത്യസമയത്ത് ശരിയായ ചികിത്സ ലഭിക്കാൻ അത് സഹായിക്കും.
ജലദോഷമോ പനിയോ മൂലം ഒരാൾക്ക് ചുമ ഉണ്ടാകാം. എന്നാൽ രണ്ട് അവസ്ഥകളിലും ചുമ പത്ത് ദിവസത്തിൽ കൂടുതൽ നീണ്ടുനിൽക്കില്ല. ശ്വാസകോശ അർബുദം ബാധിച്ചവരിൽ, ചുമ പതിവായി കാണപ്പെടും. വർഷം മുഴുവനും ഒരു കാരണവുമില്ലാതെ അവർക്ക് തുടർച്ചയായി ചുമ ഉണ്ടായേക്കാം. ശ്വാസനാളത്തിലേക്കും ശ്വാസകോശത്തിലേക്കും പുറത്ത് നിന്നുള്ള കണങ്ങൾ കടക്കുന്നത് തടയാനുള്ള ഒരു മാർഗമാണ് ചുമയെങ്കിലും, വിട്ടുമാറാത്ത ചുമയാണ് ശ്വാസകോശ ക്യാൻസറിന്റെ ഒരു പ്രധാന ലക്ഷണം.
ക്യാൻസർ കോശങ്ങൾ ശ്വാസകോശത്തിൽ അതിവേഗം പെരുകാൻ തുടങ്ങുമ്പോൾ, അവ ശ്വാസനാളത്തിന്റെ പ്രവർത്തനം തടസ്സപ്പെടുത്തുകയോ ഇടുങ്ങിയതാക്കുകയോ ചെയ്യുന്നു, അങ്ങനെ ശ്വാസകോശത്തിലേക്കുള്ള വായുവിന്റെ പ്രവാഹം കുറയുന്നു. ഇത് ശരീരത്തിന്റെ എല്ലാ ഭാഗങ്ങളിലേക്കും കൊണ്ടുപോകുന്നതിന് ആവശ്യമായ വായു ശ്വസിക്കുന്നതിൽ ബുദ്ധിമുട്ട് സൃഷ്ടിക്കുന്നു. തന്മൂലം വ്യക്തിക്ക് ശ്വാസതടസ്സം സൃഷ്ടിക്കുന്നു. ഒന്ന് രണ്ട് പടികൾ കയറി നടന്നാൽ പോലും ആ വ്യക്തിക്ക് ശ്വാസം കിട്ടാതെ ബുദ്ധിമുട്ട് അനുഭവപ്പെട്ടേക്കാം. ഇതും ശ്വാസകോശ ക്യാൻസറിന്റെ പ്രധാന ലക്ഷണങ്ങളിൽ ഉൾപ്പെട്ടേക്കാം.
ജലദോഷമോ മറ്റ് രോഗങ്ങളോ ഇല്ലാതെ ശബ്ദത്തിന് മാറ്റങ്ങൾ ഉണ്ടെങ്കിൽ ശ്രദ്ധിക്കുക, തൊണ്ട അടഞ്ഞതു പോലുള്ള ശബ്ദം കൂടുതൽ കാലത്തേയ്ക്ക് ഉണ്ടെങ്കിൽ അതൊരു രോഗ ലക്ഷണമാകാം. അതിനാൽ, ശബ്ദത്തിൽ എന്തെങ്കിലും മാറ്റങ്ങൾ കണ്ടാൽ, എത്രയും വേഗം ഡോക്ടറെ സമീപിക്കുന്നത് നല്ലതാണ്. എന്നിരുന്നാലും, ശബ്ദം മാറാനുള്ള ഒരേയൊരു കാരണം ശ്വാസകോശ അർബുദം മാത്രമല്ല. അതിനാൽ, പരിഭ്രാന്തരാകരുത്, സ്ഥിരീകരണത്തിനായി ശരിയായ രോഗനിർണയം നടത്തുക.
ശരീര വേദന ഒരു പൊതു ആരോഗ്യ പ്രശ്നമാണ്, നമ്മുടെ ദൈനംദിന പ്രവർത്തനത്തെ ബാധിക്കുന്നതുവരെ മിക്ക ആളുകളും പലപ്പോഴും ഈ വേദന അവഗണിക്കുന്നു. ശരീരത്തിന് വേദന അനുഭവപ്പെടാൻ നിരവധി കാരണങ്ങളുണ്ട്; ഇത് വളരെ നേരം ഇരുന്നതിന് ശേഷമോ കഠിനമായ വ്യായാമത്തിന് ശേഷമോ ആകാം. എന്നാൽ ഇവ അപൂർവമായ കേസുകളാണ്, മാത്രമല്ല ചിലപ്പോൾ ശരീരം മുഴുവൻ വേദനയുണ്ടാകാം. എന്നാൽ ശ്വാസകോശ അർബുദം ബാധിച്ചവർക്ക് പ്രത്യേകിച്ച് നെഞ്ചിലോ തോളിലോ പുറകിലോ വേദന അനുഭവപ്പെടാം. ഇത്തരക്കാരുടെ സ്ഥിരം ആരോഗ്യപ്രശ്നമാണ് ശരീര വേദന.
ഒരു ചെറിയ കാലയളവിനുള്ളിൽ വിശദീകരിക്കാനാകാത്ത വിധം ശരീരത്തിന് ഭാരക്കുറവ് 4 കിലോയോ അതിൽ കൂടുതലോ കുറയുന്നത് ഒരു അടിസ്ഥാന ആരോഗ്യ പ്രശ്‌നത്തിന്റെ സൂചനയായിരിക്കാം, അതിലൊന്ന് ശ്വാസകോശ അർബുദമാകാം. കാൻസർ കോശങ്ങളുടെ വളർച്ച വിശപ്പില്ലായ്മയ്ക്കും ശരീരഭാരത്തിൽ മാറ്റത്തിനും ഇടയാക്കും. ഏതെങ്കിലും തരത്തിലുള്ള ക്യാൻസർ ബാധിക്കുമ്പോൾ, കഴിക്കുന്ന ഭക്ഷണം ഉൽപ്പാദിപ്പിക്കുന്ന ഊർജ്ജം ക്യാൻസർ കോശങ്ങൾ കഴിക്കുന്നു, ഇത് ക്ഷീണത്തിനും ശരീരഭാരം കുറയ്ക്കാനും ഇടയാക്കുന്നു. ശരീരഭാരത്തിലെ മാറ്റം അവഗണിക്കാൻ പാടില്ലാത്ത ഒരു പ്രധാന രോഗ ലക്ഷണമാണ്.
ആർക്കും എപ്പോൾ വേണമെങ്കിലും പിടിപെടാവുന്ന ഒരു രോഗാവസ്ഥയാണ് ക്യാൻസർ. അതിനാൽ ശരീരത്തിൽ തുടർച്ചയായി കാണുന്ന രോഗ ലക്ഷണങ്ങൾ അവഗണിക്കാതെ വൈദ്യ സഹായം തേടുന്നതാണ് നല്ലത്. ഒരുപക്ഷെ നേരത്തെയുള്ള രോഗ നിർണയങ്ങൾ ഇത്തരം മഹാവ്യാധികളിൽ നിന്ന് നമ്മെ രക്ഷിച്ചേക്കാം.
