പ്രമേഹം കണ്ണിലേക്കെത്തുമ്പോൾ

ഇന്ന് കേരള ത്തിൽ വളരെ സാധാരണമായിക്കൊണ്ടിരിക്കുന്ന ഒരു രോഗമാണ് ഡയെബറ്റിസ്(Diabetics) അഥവാ പ്രമേഹം. കേരളത്തിലെ ജനങ്ങളിൽ ഏകദേശം 20 ശതമാനം പേർക്ക് പ്രമേഹം ഉണ്ടെന്ന് പഠനങ്ങൾ തെളിയിക്കുന്നു. ഇതുകൊണ്ടുതന്നെ, കേരളം, ഇന്ന് പ്രമേഹരോഗത്തിന്റെ കാര്യത്തിൽ ‘ഇന്ത്യയുടെ തലസ്ഥാനം’ എന്നാണ് അറിയപ്പെടുന്നത്. ഡയബെറ്റിസ്(Diabetics) രോഗം അനിയന്ത്രിതമായി ഏറെക്കാലം നിൽക്കുമ്പോൾ അത് രോഗിയുടെ കിഡ്‌നി, നാഡികൾ, കണ്ണുകൾ എന്നീ അവയവങ്ങളെ ബാധിച്ചേക്കാം. ഇത്തരത്തിൽ ഈ രോഗം കണ്ണുകളെ ബാധിക്കുന്ന അവസ്ഥയാണ് ഡയബെറ്റിക് റെറ്റിനോപ്പതി(Diabetic retinopathy).

എങ്ങനെയാണ് പ്രമേഹം കണ്ണുകളെ ബാധിക്കുന്നത്?

കണ്ണുകളിലെ നാഡീപടലമായ ‘റെറ്റിന’യെയാണ് പ്രമേഹ രോഗം പ്രധാനമായും ബാധിക്കുന്നത്. പ്രമേഹ രോഗത്തിന്റെ നിയന്ത്രണം, ഈ രോഗം ബാധിച്ച ശേഷമുള്ള കാലയളവ് എന്നീ കാര്യങ്ങളാണ് ഒരു രോഗിയിൽ ‘ഡയബെറ്റിക് റെറ്റിനോപ്പതി'(Diabetic retinopathy) എന്ന രോഗാവസ്ഥ വരാനുള്ള പ്രവണത നിശ്ചയിക്കുന്നത്. ഇതുപോലെത്തന്നെ പ്രമേഹത്തിനൊപ്പം ഉയർന്ന രക്തസമ്മർദ്ദം, പൊണ്ണത്തടി, ഉയർന്ന കൊളസ്‌ട്രോൾ എന്നീ രോഗങ്ങൾ ഉള്ളവരിലും ഡയബെറ്റിക് റെറ്റിനോപ്പതി(Diabetic retinopathy) വരാനുള്ള സാധ്യത കൂടുതലാണ്.

സാധാരണ പത്തു വർഷത്തിലേറെക്കാലം പ്രമേഹ രോഗമുള്ള എൺപതു ശതമാനം രോഗികളിലും രോഗം റെറ്റിനയെ ബാധിക്കുന്നതായി കാണാറുണ്ട്. അതുപോലെ പ്രമേഹം കിഡ്‌നിയെ ബാധിച്ചവരിലും ഗർഭാവസ്ഥയിൽ പ്രമേഹം ഉള്ള സ്ത്രീകളിലും റെറ്റിനോപ്പതി കൂടുതലായി കാണപ്പെടുന്നു. പ്രമേഹം മറ്റെല്ലാ അവയവങ്ങളേയും ബാധിക്കുന്നതുപോലെ കണ്ണുകളിലെയും ചെറിയ രക്തക്കുഴലുകളെയാണ് പ്രധാനമായി ബാധിക്കുന്നത്. ഇത് രക്തക്കുഴലുകളിൽ നേരിയ ചോർച്ചകളും ചിലയിടങ്ങളിൽ അടവുകളും ഉണ്ടാക്കുന്നു. രക്തക്കുഴലുകളിലെ അടവുകൾ കാരണം റെറ്റിനയിലേക്കുള്ള രക്തയോട്ടം കുറയുകയും റെറ്റിനയിലേക്കെത്തുന്ന ഓക്‌സിജന്റെ അളവ് കുറയുകയും ചെയ്യുന്നു. രക്തക്കുഴലുകളുടെ ബലക്കുറവ് കാരണം ഇവ എളുപ്പത്തിൽ പൊട്ടി രക്തസ്രാവമുണ്ടാകുന്നു. നീർക്കെട്ടുണ്ടാകാനും സാധ്യതയുണ്ട്. ഈ ഭാഗങ്ങളിൽ കൊഴുപ്പ് അടിഞ്ഞുകൂടാനുള്ള സാധ്യതയും വളരെ കൂടുതലാണ്.

ഡയബെറ്റിക് റെറ്റിനോപ്പതി(Diabetic retinopathy) രണ്ട് തരം

ഡയബെറ്റിക് റെറ്റിനോപ്പതിയെ അതിന്റെ തീവ്രതയനുസരിച്ച് പ്രധാനമായി രണ്ടായി തരംതിരിക്കാം. രോഗത്തിന്റെ തുടക്കമായ, തീവ്രത കുറഞ്ഞ, എൻ.പി.ഡി.ആർ (NPRD)എന്ന അവസ്ഥയും കൂടുതൽ അപകടകാരിയായ പി.ഡി.ആർ (PRD)എന്ന അവസ്ഥയും.

പ്രാരംഭഘട്ടമായ എൻ.പി.ഡി.ആറിൽ സാധാരണ അവസ്ഥയിൽ നിന്നുള്ള ചെറിയ വ്യതിയാനങ്ങൾ കണ്ണിന്റെ നാഡീപടലത്തിൽ കണ്ടുതുടങ്ങുന്നു. റെറ്റിനയിൽ ചെറിയ പൊട്ടുകൾ പോലെ രക്തം പ്രത്യക്ഷപ്പെടുക, പലയിടത്തും കൊഴുപ്പടിയുക എന്നീ വ്യത്യാസങ്ങൾ ഈ ഘട്ടത്തിലാണ് ആരംഭിക്കുന്നത്. ഈ വ്യത്യാസങ്ങൾക്കൊപ്പം രക്തക്കുഴലുകളിൽ ചെറിയ പൊട്ടലുകളും ഞരമ്പുകളിൽ പലയിടത്തായി നീർക്കെട്ടും ഉണ്ടായേക്കാം. എൻ.പി.ഡി.ആർ എന്ന ഈ അവസ്ഥയുടെ ആരംഭത്തിൽ പലപ്പോഴും രോഗിയുടെ കാഴ്ചശക്തി സാധാരണനിലയിൽ തന്നെയായിരിക്കും. കുറച്ചുകൂടി കഴിയുമ്പോൾ റെറ്റിനയിൽ കാഴ്ചയുടെ കേന്ദ്രമായ ‘മാക്കുല’യിലെ കൊഴുപ്പടിയൽ, നീർക്കെട്ട്, രക്തയോട്ടം എന്നീ കാരണങ്ങളാൽ കാഴ്ചശക്തി കുറയാൻ സാധ്യതയുണ്ട്.

കൂടുതൽ അപകടകാരിയായ പി.ഡി.ആർ അവസ്ഥയിൽ ‘റെറ്റിന’യിൽ സാധാരണയല്ലാത്ത ശക്തി കുറഞ്ഞ രക്തക്കുഴലുകൾ ധാരാളമായി വളരുന്നു. ‘റെറ്റിന’യിലെ രക്തയോട്ടക്കുറവിനെ നേരിടാനായി റെറ്റിനയിൽ നിന്നുതന്നെ വളരുന്ന ഇത്തരം രക്തക്കുഴലുകൾ, വളരെ ബലം കുറഞ്ഞവയും എളുപ്പത്തിൽ പൊട്ടിപ്പോകുന്നവയുമാണ്. ഈ രക്തക്കുഴലുകൾ പൊട്ടി, കണ്ണിനുള്ളിലേക്ക് രക്തസ്രാവമുണ്ടാകാനുള്ള സാധ്യത വളരെ കൂടുതലാണ്. മാത്രമല്ല, ഈ രക്തക്കുഴലുകൾ കാലം ചെല്ലുമ്പോൾ റെറ്റിനയിൽ പലയിടങ്ങളിലും വലിവുകളുണ്ടാക്കുന്ന രീതിയിലുള്ള ബാൻഡുകളായി മാറുകയും റെറ്റിന ഇളകി വിട്ടുപോകുന്ന അവസ്ഥ ഉണ്ടാവുകയുംചെയ്യുന്നു. ഇതെല്ലാം കാരണം പി.ഡി.ആർ അവസ്ഥയിൽ രോഗിക്ക് കാഴ്ച തീരെ കുറഞ്ഞുപോകാനും ഒരുപക്ഷേ പൂർണ്ണമായും നഷ്ടപ്പെട്ടുപോകാനുമുള്ള സാധ്യത വളരെ കൂടുതലാണ്. ഈ അവസ്ഥയിൽ നഷ്ടപ്പെടുന്ന കാഴ്ച വീണ്ടുകിട്ടാനുള്ള സാധ്യത തീരെ കുറവുമാണ്.

ചികിത്സ

പ്രമേഹ രോഗികളിൽ രക്തത്തിലെ പഞ്ചസാരയുടെ അളവ് സാധാരണ നിലയിൽത്തന്നെ നിലനിർത്തുകയാണെങ്കിൽ രോഗം കണ്ണിനേയും മറ്റവയവങ്ങളെയും ബാധിക്കാനുള്ള സാധ്യത കുറയുന്നു. പ്രമേഹം ഉള്ള രോഗി പ്രമേഹരോഗ വിദഗ്ധനെ സമീപിച്ച് അദ്ദേഹത്തിന്റെ നിർദ്ദേശപ്രകാരം പ്രമേഹം നിയന്ത്രിച്ചു നിർത്തുന്നതിനൊപ്പം എല്ലാവർഷവും തന്റെ കണ്ണുകൾ പരിശോധനയ്ക്കു വിധേയമാക്കേണ്ടതും അത്യാവശ്യമാണ്. ആദ്യത്തെ നേത്രപരിശോധനയ്ക്കുശേഷം രോഗത്തിന്റെ തീവ്രതയനുസരിച്ച് പ്രാരംഭഘട്ടങ്ങളിൽ, ആറ് മാസത്തില്‍ ഒരിക്കലോ നാലു മാസത്തിൽ ഒരിക്കലോ നേത്രരോഗവിദഗ്ദ്ധന്റെ നിർദ്ദേശപ്രകാരം കണ്ണുകൾ പരിശോധിപ്പിക്കണം. കാഴ്ചക്കുറവ് അനുഭവപ്പെട്ടു തുടങ്ങുന്ന അവസ്ഥയിൽ ഒരുപക്ഷേ കണ്ണിലെ രക്തക്കുഴലിനെക്കുറിച്ച് കൂടുതൽ അറിയുന്നതിനായി ‘റെറ്റിന’യുടെ ‘ആൻജിയോഗ്രാം’ (Angiogram)ടെസ്റ്റ് ചെയ്തു നോക്കാം. കാഴ്ചയുടെ കേന്ദ്രബിന്ദുവായ ‘ഫോവിയ’യിലേക്കുള്ള രക്തയോട്ടക്കുറവ്, റെറ്റിനയിലെ നീർക്കെട്ട് രക്തക്കുഴലുകളിലെ ചോർച്ച, അടവ് എന്നിവയെപ്പറ്റി കൂടുതൽ മനസ്സിലാക്കാനും ചികിത്സ നിർദ്ദേശിക്കാനും റെറ്റിനയുടെ ആൻജിയോഗ്രാം വളരെ സഹായകമാണ്. ഈ ടെസ്റ്റിന്റെ അടിസ്ഥാനത്തിൽ ചിലപ്പോൾ കണ്ണിൽ ലേസർ ഉപയോഗിച്ചോ, മറ്റു ചിലപ്പോൾ കുത്തിവെയ്പ്പ് ഉപയോഗിച്ചോ ചികിത്സിക്കേണ്ടത് ആവശ്യമാകാം.

ഈ ഘട്ടങ്ങളിൽ രോഗം കൂടുതൽ വഷളാകും മുൻപ് ചികിത്സ നൽകേണ്ടത് അത്യാവശ്യമാണ്. എങ്കിൽ മാത്രമേ രോഗിയുടെ കാഴ്ച ആ നിലയ്‌ക്കെങ്കിലും നിലനിർത്തി കൊണ്ടുപോകാൻ സാധിക്കുകയുള്ളൂ. കൂടുതൽ വഷളായ പി.ഡി.ആർ ഘട്ടത്തിൽ ചിലപ്പോൾ കണ്ണിനുള്ളിലേക്ക് രക്തസ്രാവം ഉണ്ടായ അവസ്ഥയിലോ റെറ്റിന വിട്ടുപോയ അവസ്ഥയിലോ ആകും രോഗി ഡോക്ടറെ സമീപിക്കുന്നത്. ഈ അവസ്ഥയിൽ രോഗിക്ക് ശസ്ത്രക്രിയ ആവശ്യമായി വന്നേക്കാം. കർശനമായ പ്രമേഹ നിയന്ത്രണവും കൃത്യമായ നേത്രപരിശോധനയും ആവശ്യമെങ്കിൽ ചികിത്സയും ചെയ്യുകയാണെങ്കിൽ പ്രമേഹരോഗികളിലും ഏറെക്കാലം കാഴ്ച കാത്തു സൂക്ഷിക്കാൻ സാധിക്കും.

Diabetic eye disease comprises a group of eye conditions that affect people with diabetes