ഒരു ദിവസത്തെ ഏറ്റവും പ്രധാന ഭക്ഷണം ഏതാണെന്ന് ചോദിച്ചാല്‍ രാവിലെയുള്ള ഭക്ഷണം, അതായത് ബ്രേക്ഫാസ്റ്റ് എന്നത് തന്നെയാണ് ഉത്തരം. ഏറെ നേരത്തെ ഇടവേളയ്ക്ക് ശേഷം ശരീരത്തിന് ലഭിയ്ക്കുന്ന ഭക്ഷണം, ദിവസത്തേയ്ക്കുള്ള മുഴുവന്‍ ഊര്‍ജവും നല്‍കുന്ന ഭക്ഷണം എന്നിങ്ങനെ പോകുന്നു, പ്രഭാത ഭക്ഷണത്തിന്റെ മഹത്വം. ഒരു കാരണവശാലും ഒഴിവാക്കരുതാത്ത ഭക്ഷണം തന്നെയാണിത്. പ്രാതല്‍ ഒഴിവാക്കുന്നത് പല തരത്തിലെ ആരോഗ്യ പ്രശ്‌നങ്ങളും വരുത്തുന്ന ഒന്നും കൂടിയാണ്.
എന്നാല്‍ പ്രാതല്‍ കഴിച്ചത് കൊണ്ടു മാത്രമായില്ല, ഇത് പോഷകസമൃദ്ധവുമാകാന്‍ ശ്രദ്ധിയ്‌ക്കേണ്ടത് അത്യാവശ്യമാണ്. വിശപ്പു മാറാന്‍ എന്തെങ്കിലും കഴിയ്ക്കുക, അല്ലെങ്കില്‍ വയറു നിറയെ കഴിയ്ക്കുക എന്നതായിരിയ്ക്കരുത് പ്രഭാത ഭക്ഷണത്തിന്റെ നിര്‍വചനം. മറിച്ച് ശരീരത്തിന് ആകെ ആവശ്യമായ പോഷകങ്ങള്‍ നല്‍കുക എന്നതായിരിയ്ക്കണം ഇത്. ഇതിനാല്‍ തന്നെ ശരീരത്തിന് ആവശ്യമായ പോഷകങ്ങള്‍ അടങ്ങിയ ഭക്ഷണങ്ങള്‍ പ്രാതലില്‍ ഉള്‍പ്പെടുത്തുക.
എന്തെല്ലാമാണ് നാം പ്രധാനമായും പ്രാതലിൽ ഉൾപെടുത്തേണ്ടത്
പ്രോട്ടീന്‍ ഭക്ഷണത്തില്‍ ഉള്‍പ്പെടുത്തേണ്ടത് പ്രധാനമാണ്. പ്രത്യേകിച്ചും പ്രാതലിന്. ഇത് തടി കുറയ്ക്കാന്‍ സഹായിക്കുന്ന പ്രധാനപ്പെട്ട ഒന്നാണ്. പെട്ടെന്ന് വയര്‍ നിറഞ്ഞതായ തോന്നലും നല്‍കും. ഇതിനാല്‍ തന്നെ പ്രോട്ടീന്‍ അടങ്ങിയ വിഭവങ്ങള്‍ പ്രാതലില്‍ ഉള്‍പ്പെടുത്തുക. മുട്ട നല്ലൊരു പ്രോട്ടീന്‍ ഭക്ഷണമാണ്. ഇത് എണ്ണ ചേര്‍ത്ത് തയ്യാറാക്കാത്തതാണ് കൂടുതല്‍ നല്ലത്. കാല്‍സ്യം, പ്രോട്ടീന്‍, വൈറ്റമിനുകള്‍ എന്നിവയെല്ലാം ഇതില്‍ അടങ്ങിയിട്ടുണ്ട്. മുഴുങ്ങിയ മുട്ട, പോച്ച്ഡ് എഗ് എന്നിവ ഏറെ നല്ലതാണ്.
പ്രാതലിന് ഉള്‍പ്പെടുത്തേണ്ട ഒന്നാണ് ചെറുപയര്‍. പുഴുങ്ങിയ ചെറുപയര്‍ ഏറെ നല്ലതാണ്. ഇത് മുളപ്പിച്ചത് പുഴുങ്ങി അല്‍പം തേങ്ങാ ചേര്‍ത്ത് കഴിയ്ക്കാം. ഇതല്ലെങ്കില്‍ തക്കാളി, സവാള എന്നിവ ചേര്‍ത്ത് സാലഡാക്കി കഴിയ്ക്കാം. ഇതല്ലെങ്കില്‍ പുട്ട് പോലുള്ളവയ്‌ക്കൊപ്പം വേവിച്ച് കഴിയ്ക്കാം. കടലയും നല്ലൊരു ഭക്ഷണമാണ്. ചെറുപയര്‍ ഇഷ്ടമല്ലെങ്കില്‍ കടല കഴിയ്ക്കാം. ഇത്തരം പയര്‍ വര്‍ഗങ്ങള്‍ എന്തെങ്കിലും പ്രാതലിന് ഉള്‍പ്പെടുത്താം. നാം കഴിയ്ക്കുന്ന പ്രാതല്‍ വിഭവങ്ങള്‍ക്കൊപ്പം കറിയായി ഇവ കഴിയ്ക്കാം. ഇതല്ലെങ്കില്‍ ഇത് വേറെയായി കഴിയ്ക്കാം.
നട്‌സ് പ്രാതലിന് ഉള്‍പ്പെടുത്തുന്നത് നല്ലതാണ്. ബദാം, വാള്‍നട്‌സ്, പിസ്ത, നിലക്കടല, ഉണക്കമുന്തിരി, ഈന്തപ്പഴം എന്നിവയില്‍ ഏതെങ്കിലുമെല്ലാം പ്രാതലിനൊപ്പം കഴിയ്ക്കാവുന്ന മികച്ച ഭക്ഷണ വസ്തുക്കളാണ്. നട്‌സ് ശരീരത്തിന് ഊര്‍ജം നല്‍കും, നല്ലൊരു ബ്രെയിന്‍ ഫുഡ് കൂടിയാണ് ഇവ. ഇതിനൊപ്പം ഒരു ഗ്ലാസ് ജ്യൂസ് കൂടി ഉള്‍പ്പെടുത്തുന്നത് നല്ലതായിരിയ്ക്കും. പ്രത്യേകിച്ചും പാനീയമായി കുടിയ്ക്കണം എന്നുള്ളവര്‍. ക്യാരറ്റ്, ബീറ്റ്‌റൂട്ട്, ആപ്പിള്‍ എന്നിവ ചേര്‍ത്തുണ്ടാക്കിയ ജ്യൂസ് ഏറെ നല്ലതാണ്. ഇതല്ലെങ്കില്‍ പാലാകാം. ഇത് മുതിര്‍ന്നവരെങ്കില്‍, തടി കുറയ്ക്കാന്‍ ശ്രമിയ്ക്കുന്നവരെങ്കില്‍ കൊഴുപ്പു നീക്കിയത് ഉപയോഗിയ്ക്കാം. ഇതില്‍ മധുരം ചേര്‍ക്കാതെ കഴിയ്ക്കുന്നതാണ് നല്ലത്.
പഴങ്ങള്‍ ജ്യൂസാക്കി കഴിയ്ക്കുന്നതിനേക്കാള്‍ ഇവ അതേ രൂപത്തില്‍ കഴിയ്ക്കുന്നതാണ് നല്ലത്. നാം നിത്യവും കഴിയ്ക്കുന്ന ഇഡ്ഢലി, ദോശ മുതലായവയ്‌ക്കൊപ്പം ഇവയും ഉള്‍പ്പെടുത്താം. ഇതു പോലെ ഓട്‌സ്, റാഗി പോലുള്ള ധാന്യങ്ങള്‍ കൊണ്ടുള്ള വിഭവങ്ങളും പരീക്ഷിയ്ക്കുന്നത് നല്ലതാണ്. ഏത്തപ്പഴവും പ്രാതലിന് ഉള്‍പ്പെടുത്താവുന്ന നല്ലൊരു വിഭവമാണ്. ഇത് പുഴുങ്ങിയോ പച്ചയ്‌ക്കോ കഴിയ്ക്കാം. സാധാരണ കഴിയ്ക്കുന്ന ഇഡ്ഢലി, ദോശ പോലുള്ളവയുടെ അളവ് കുറച്ച് ബാക്കിയുള്ള പോഷകങ്ങള്‍ ലഭിയ്ക്കുന്ന തരം ഭക്ഷണങ്ങള്‍ കഴിയ്ക്കാം
