ചോറ് ഇഷ്ടപ്പെടുന്നവരില് മലയാളികള് പ്രധാന സ്ഥാനക്കാരാണ്. നമ്മുടെ തനതായ ഭക്ഷണ ശീലങ്ങളില് പ്രധാനപ്പെട്ടതാണ് ചോറുണ്ണുക എന്നത്. രാത്രി അരി ഭക്ഷണം ഒഴിവാക്കുന്നവരാണെങ്കിലും ഉച്ചയ്ക്ക് ഊണ് നിര്ബന്ധമുള്ളവര് പലരുമുണ്ട്. എന്നാല് ചോറ് തടി കൂടുന്നുവെന്ന ഭയത്തിന് പുറമേ ചോറുണ്ടാല് ഉറക്കം വരുന്നുവെന്ന പരാതിയുള്ളവരും ധാരാളമുണ്ട്. ചോറുണ്ടാല് ഉടന് ഉറക്കം വരുന്നതിന് പുറകില് ശാസ്ത്രീയമായ ചില കാരണങ്ങളുമുണ്ടെന്ന് വിവിധ പഠനങ്ങളിൽ പറയുന്നു.
![](https://nammudearogyam.com/wp-content/uploads/2022/03/alfa-1024x848.jpg)
അരിയില് കാര്ബോഹൈഡ്രേറ്റുകള് ധാരാളം അടങ്ങിയിട്ടുണ്ട്. ഇവ നാം കഴിയ്ക്കുമ്പോള് ശരീരത്തില് ഗ്ലൂക്കോസായി മാറുന്നു. ഗ്ലൂക്കോസ് ഇന്സുലിന് ഉല്പാദനം കൂട്ടുന്നു. ഇത് മെലാട്ടനിന്, സൈറാട്ടനിന് തുടങ്ങിയ ഹോര്മോണുകളുടെ ഉല്പാദനം വര്ദ്ധിപ്പിയ്ക്കാന് തലച്ചോറിനെ പ്രേരിപ്പിയ്ക്കുന്നു. ഇത്തരം ഹോര്മോണുകളാണ് ഉറക്കം തൂങ്ങാന് ഇടയാക്കുന്നത്. ഇത് ചിലര്ക്ക് മാത്രം ഉണ്ടാകുന്നതല്ല, ചോറുണ്ടാല് ആര്ക്കും അനുഭവപ്പെടുന്ന ഒന്നു തന്നെയാണ്. ദഹന പ്രക്രിയയെ ശക്തിപ്പെടുത്തുന്ന ഒന്നു കൂടിയാണിത്.
വയര് നിറയെ ചോറുണ്ടാലാണ് ഇത്തരം തോന്നല് ഉണ്ടാകുക. കഴിയ്ക്കുന്ന ചോറിന്റെ അളവ് കുറയ്ക്കുകയെന്നതാണ് പ്രധാനം. കൂടുതല് ചോറുണ്ണുമ്പോള് ശരീരത്തില് നടക്കുന്ന മേല്പ്പറഞ്ഞ പ്രക്രിയകളുടെ ആക്കവും വര്ദ്ധിയ്ക്കുന്നു. ഇത് ക്ഷീണവും ഉറക്കം തൂങ്ങലുമെല്ലാം ഉണ്ടാക്കുന്നു. ഇതിനാല് ചോറുണ്ണുമ്പോള് അളവ് കുറയ്ക്കുകയെന്നത് പ്രധാനമാണ്. 50 ശതമാനം പച്ചക്കറികള്, 25 ശതമാനം പ്രോട്ടീന്, 25 ശതമാനം കാര്ബോഹൈഡ്രേറ്റ് എന്ന തോതില് ഭക്ഷണം കഴിയ്ക്കുക. ഇത് ഊണിന് ശേഷമുള്ള ഉറക്കം തൂങ്ങല് നിയന്ത്രിയ്ക്കാന് സഹായിക്കുന്ന ഒന്നാണ്.
ഇതിന് പകരം ചോറിന്റെ അളവ് കുറച്ച് ചപ്പാത്തി ഭക്ഷണത്തില് ഉള്പ്പെടുത്താം. ചോറും ചപ്പാത്തിയും എന്ന രീതിയിലേക്ക് മാറാം. ഇത് വിശപ്പും കുറയ്ക്കും, ഉറക്കം തൂങ്ങലും അവസാനിപ്പിയ്ക്കും. ആരോഗ്യകരവുമാണ്. ചോറ് വയറു നിറയെ ഉണ്ടാലേ വിശപ്പു മാറൂവെന്ന് പറയുന്നവര് ചോറ് നിയന്ത്രിച്ച് വയര് നിറയാന് ആരോഗ്യകരമായ വഴികള് നോക്കുക. അതിനായി പച്ചക്കറികളും, സാലഡുകളുമെല്ലാം പരീക്ഷിയ്ക്കാം. ഇത് ചോറിന്റെ അളവു കുറയ്ക്കുമെന്ന് മാത്രമല്ല, ഭക്ഷണം കൂടുതല് ആരോഗ്യകരമാക്കാനും സഹായിക്കും.
ചോറുണ്ട് ഉടന് തന്നെ എവിടെയെങ്കിലും ഇരുന്നാല് പെട്ടെന്ന് ഉറക്കം വരും. അത്കൊണ്ട് ഊണ് കഴിഞ്ഞാല് ഉറക്കം തൂങ്ങല് ഒഴിവാക്കാന് അല്പനേരം നടക്കുക. ടിവി കാണാനാണെങ്കിലും വായിക്കാനാണെങ്കിലും ഇരുന്നുള്ള ജോലികള് ചെയ്യാനാണെങ്കിലും. ചോറുണ്ട് ഉടന് അല്പനേരം നടക്കുന്നത് ശരീരത്തിന് നല്ലൊരു വ്യായാമമാകുന്നു. മാത്രമല്ല, ഉറക്കം തൂങ്ങല് ഒഴിവാക്കാനും ഇത് സഹായിക്കുന്നു. ഇതു പോലെ വെള്ള അരിയ്ക്കു പകരം ബ്രൗണ് റൈസോ, മട്ട അരിയോ ഉപയോഗിയ്ക്കുന്നതും ഒരു പരിധി വരെ ഗുണം നല്കുമെന്നും പറയാം.