ഒരു കുഞ്ഞ് ജനിച്ച് കഴിഞ്ഞാല്‍ പിന്നെ കുഞ്ഞിനെ ചുറ്റിപ്പറ്റിയായിരിയ്ക്കും മാതാപിതാക്കളുടെ ജീവിതം. കുഞ്ഞിനെ കണ്ണിലെ കൃഷ്ണമണിയായി വളര്‍ത്താന്‍ ഉള്ള വഴികള്‍ ഇവര്‍ തേടും. അതിൽ ഏറെ പ്രധാനമാണ് കുഞ്ഞിന്റെ ആരോഗ്യമെന്നത്. പ്രത്യേകിച്ചും കുഞ്ഞുങ്ങള്‍ക്ക് പ്രതിരോധശേഷി കുറവായതിനാല്‍ ആരോഗ്യ കാര്യത്തില്‍ പ്രത്യേക ശ്രദ്ധ വയ്‌ക്കേണ്ടതുമുണ്ട്. കുഞ്ഞിന് നല്‍കുന്ന ഭക്ഷണം മുതല്‍ ഉറക്കുന്നതു വരെയുള്ള പല കാര്യങ്ങളിലും മാതാപിതാക്കള്‍ക്ക് പല സംശയങ്ങളുമുണ്ടാകും. പ്രത്യേകിച്ചും ഇപ്പോഴത്തെ ന്യൂക്ലിയര്‍ കുടുംബ രീതികളില്‍.
നവജാത ശിശുവിന് ഏറ്റവും നല്ല ഭക്ഷണം മുലപ്പാല്‍ തന്നെയാണ്. ആറു മാസം വരെ മുലപ്പാല്‍ മാത്രം മതിയെന്നാണ് ആരോഗ്യ വിദഗ്ധരുടെ അഭിപ്രായവും. എന്നാല്‍ ചിലപ്പോഴെങ്കിലും അമ്മമാര്‍ക്ക് ആവശ്യത്തിന് പാല്‍ ഇല്ലാത്തതിനാല്‍ മറ്റു സപ്ലിമെന്റുകളും നല്‍കാറുണ്ട്. മറ്റു ചിലർ ചെറു ചൂടുവെള്ളവും നൽകാറുണ്ട്. നവജാത ശിശുവിന് മാത്രമല്ല, അല്‍പ മാസങ്ങള്‍ കഴിഞ്ഞ കുഞ്ഞിനും വെള്ളം നല്‍കണമോ അതോ പാല്‍ മാത്രം മതിയോ എന്ന സംശയം പല മാതാപിതാക്കള്‍ക്കുമുണ്ട്.
നവജാത ശിശുക്കള്‍ക്ക് യാതൊരു കാരണവശാലും വെള്ളം കൊടുക്കേണ്ടതില്ല. ജനിച്ച് ഏതാനും മാസങ്ങള്‍ കഴിയും വരെ ഇവരുടെ ശരീരം വെളളം ഉള്‍ക്കൊളളുന്ന വിധത്തിലുള്ളതല്ല. വെളളം കൊടുത്താല്‍ പോഷക നഷ്ടവും വാട്ടര്‍ ഇന്‍ടോക്‌സിക്കേഷനുമുണ്ടാകും. കാരണം ഇവരുടെ വയര്‍ ചെറുതാണ്. കിഡ്‌നികള്‍ പൂര്‍ണ വികാസം പ്രാപിക്കാത്തതുമാണ്. ഒരു കുഞ്ഞിന്റെ വയറിന് 1-2 ടീസ്പൂണ്‍ വെള്ളം ഉള്‍ക്കൊള്ളാനേ ശേഷിയുളളൂ. ഇതിനാല്‍ വെള്ളം കൊടുത്താൽ വൈറ്റമിനുകള്‍, ധാതുക്കള്‍, ഫാറ്റ്, കലോറി എന്നിവയെല്ലാം തന്നെ കുഞ്ഞിന് ലഭിയ്ക്കുന്നത് തടയുകയാണ് ചെയ്യുന്നത്. ഇത് കുഞ്ഞിന് ആരോഗ്യ പ്രശ്‌നങ്ങളുണ്ടാക്കും.
ആറ് മാസത്തിന് ശേഷം മാത്രം കുഞ്ഞുങ്ങള്‍ക്ക് വെള്ളം കൊടുത്തു തുടങ്ങാം. ഇതും വേണമെങ്കില്‍ മാത്രം. കുഞ്ഞുങ്ങള്‍ക്ക് സാധാരണ ഗതിയില്‍ മുലപ്പാലിലൂടെ വെള്ളമെന്ന ആവശ്യം പൂര്‍ത്തിയായിക്കിട്ടുന്നു. വെള്ളം തിളപ്പിച്ചാറ്റിയതു വേണം നല്‍കാന്‍. ഇതു പോലെ ഈ പ്രായത്തില്‍ ദാഹം തോന്നുന്നുവെങ്കില്‍ കുഞ്ഞ് തന്നെ ഇത് പ്രകടമാക്കും. വെള്ളം നിറച്ച ബോട്ടില്‍ നല്‍കിയാല്‍ കുടിയ്ക്കാന്‍ ശ്രമിയ്ക്കുക, ഇത് എടുത്തു മാറ്റിയാല്‍ കരയുക തുടങ്ങിയവ കുഞ്ഞുങ്ങൾ പ്രകടമാക്കും.
9-12 മാസങ്ങളാകുമ്പോള്‍ മുലപ്പാൽ കൂടാതെ വെള്ളം, നേര്‍പ്പിച്ച ജ്യൂസ്, സൂപ്പ് എന്നിവ നല്‍കാം. ജ്യൂസുകള്‍ നേര്‍പ്പിച്ചു വേണം, നല്‍കാന്‍. കുഞ്ഞിന് പൊടി കലക്കിയ പാലാണ് നല്‍കുന്നതെങ്കില്‍ ഇതില്‍ ആവശ്യത്തിന് വെള്ളം ചേര്‍ത്തിളക്കിയാണ് സാധാരണ കൊടുക്കേണ്ടത്. ഇതിലും കൂടുതല്‍ വെള്ളം നല്‍കേണ്ടതില്ല.
കുഞ്ഞുങ്ങൾക്ക് 6 മാസം വരെ മുലപ്പാലിനോളം വരില്ല മറ്റൊന്നും. അതിനാൽ തന്നെ 6 മാസത്തിന് മുൻപ് മുലപ്പാൽ അല്ലാതെ മറ്റെന്ത് നൽകുകയാണെങ്കിലും ഡോക്ടറുടെ ഉപദേശ പ്രകാരം വേണമെന്നത് പ്രധാനമാണ്.
