നമ്മുടെ ശരീരത്തിലെ കോശങ്ങളുടെ നോര്‍മല്‍ രൂപം മാറി ചിലതിന് അബ്‌നോര്‍മല്‍ രൂപം വരുന്നതും ഇത് വളരുന്നതുമാണ് ക്യാന്‍സര്‍. ഇത്തരം കോശങ്ങള്‍ നമ്മുടെ ശരീരത്തില്‍ തന്നെ ചെറുതായി ഉണ്ടാകാം. ഇവ നമ്മുടെ പ്രതിരോധ കോശങ്ങള്‍ കണ്ടെത്തി നശിപ്പിയ്ക്കുന്നു. എന്നാല്‍ പ്രതിരോധശേഷിയ്ക്ക് നശിപ്പിയ്ക്കാന്‍ സാധിയ്ക്കാതെ വളര്‍ന്നു വരുന്നതാണ് ക്യാന്‍സര്‍ കോശങ്ങള്‍. തുടക്കത്തിലെ ഇതിന്റെ ലക്ഷണങ്ങള്‍ കണ്ടെത്തിയാല്‍ തന്നെ ചികിത്സ തേടിയാൽ കാര്യങ്ങള്‍ നമ്മുടെ കയ്യില്‍ നില്‍ക്കും. ക്യാന്‍സര്‍ ശരീരത്തെ ബാധിച്ചാല്‍ തിരിച്ചറിയാന്‍ സഹായിക്കുന്ന ചില തുടക്ക ലക്ഷണങ്ങള്‍ ഉണ്ട്. അവ ഏതൊക്കെയാണെന്ന് നോക്കാം.
ശരീരഭാരം കുറയുന്നതും അമിതമായ ക്ഷീണവും ലക്ഷണങ്ങളാണ്. പ്രത്യേകിച്ചും കാരണങ്ങളില്ലാതെ ഉണ്ടാകുന്നത്. ഒരു മാസത്തില്‍ തന്നെ വ്യായാമമോ, ഭക്ഷണ നിയന്ത്രണമോ മറ്റ് കാരണങ്ങളോ ഇല്ലാതെ നാലഞ്ച് കിലോ കുറയുന്നുവെങ്കിലും, ശരീരം പെട്ടെന്ന് വല്ലാതെ മെലിയുന്നുവെങ്കിലും ശ്രദ്ധിയ്ക്കുക. ക്യാന്‍സര്‍ കോശങ്ങള്‍, വളര്‍ച്ചയ്ക്ക് ശരീരത്തിലെ കൊഴുപ്പ് ഉപയോഗിയ്ക്കുന്നതാണ് ഇതിന് കാരണമാകുന്നത്.
ഇതു പോലെ അകാരണമായ ക്ഷീണം, എപ്പോഴും കിടക്കണം എന്ന തോന്നലുണ്ടാകുന്നത്. ഇതിനും പ്രത്യേകിച്ച് മറ്റു കാരണങ്ങളില്ലെങ്കില്‍ ഡോക്ടറെ കാണുക തന്നെ വേണം. ക്യാന്‍സര്‍ കോശങ്ങള്‍ പെട്ടെന്നാണ് പെരുകുക. ഒന്നില്‍ നിന്നും പത്താകാം, പത്തില്‍ നിന്നും ആയിരമാകാം. ഇതിനായി ഊര്‍ജം ആവശ്യമായി വരുന്നു. ക്യാന്‍സര്‍ കോശങ്ങള്‍ ഊര്‍ജം വലിച്ചെടുക്കുന്നു. ഇത് ബാക്കിയുള്ള അവയവങ്ങളുടെ സ്വാഭാവിക പ്രവര്‍ത്തനത്തെ ബാധിയ്ക്കുന്നു. അത്കൊണ്ടാണ് ക്ഷീണം അനുഭവപ്പെടുന്നത്.
ഇടവിട്ട് വരുന്ന പനിയും മറ്റൊരു ക്യാന്‍സര്‍ ലക്ഷണമാണ്. പനി വന്ന് മാറി വീണ്ടും വരിക, പ്രത്യേകിച്ചും മറ്റ് ഇന്‍ഫെക്ഷനുകളോ കോള്‍ഡോ ഇല്ലാതെ തന്നെ പനി വരിക, ഇതു പോലെ രാത്രി പനി വരിക, വല്ലാതെ വിയര്‍ക്കുക എന്നിവയെല്ലാം ക്യാന്‍സര്‍ സാധ്യതയാണ്. ശരീരത്തിന്റെ ഏതെങ്കിലും ഭാഗത്ത് വിട്ടുമാറാതെ വരുന്ന വേദനയും ചില സമയങ്ങളിൽ ക്യാന്‍സര്‍ കാരണമാകും. പ്രത്യേകിച്ചും രാത്രികളില്‍ വല്ലാതെ വേദന വന്നാല്‍. കാരണം ക്യാന്‍സര്‍ കോശങ്ങള്‍ പെട്ടെന്ന് പെറ്റു പെരുകുമ്പോള്‍ അത് നാഡികളെ ബാധിയ്ക്കും. ഇതാണ് വേദനയുണ്ടാക്കുന്നത്. ഇതു പോലെ ക്യാന്‍സര്‍ കോശങ്ങള്‍ ശരീരത്തില്‍ പെരുകുമ്പോള്‍ രാസവസ്തുക്കളുണ്ടാകും. ഇതും വേദനയുണ്ടാക്കും. ചിലപ്പോള്‍ ക്യാന്‍സര്‍ കോശങ്ങള്‍ ഒരിടത്ത് നിന്നും മറ്റൊരിടത്തേയ്ക്ക് പടരുമ്പോള്‍ വേദനയുണ്ടാകും. ചിലപ്പോള്‍ ക്യാന്‍സറുകള്‍ വളരുമ്പോള്‍ ഇത് അവയവങ്ങളെ ഞെരുക്കുന്നു. ഇതും വേദനയുണ്ടാക്കുന്നു.
മറ്റൊന്ന് മറുകുകളാണ്. ശരീരത്തിലെ മറുകുകള്‍ പെട്ടെന്ന് വലുതാകുക, കട്ടി കൂടുക, രക്തം വരിക, ഇവയുടെ ചുറ്റുപാടും ആകൃതിയൊക്കാത്തതാകുക എന്നിവയെല്ലാമുണ്ടെങ്കില്‍ ഇത്തരം മറുക് സ്‌കിന്‍ ക്യാന്‍സര്‍ കാരണമാണോ എന്നത് ശ്രദ്ധിയ്ക്കുക.
അത്പോലെ ആമാശത്തെയോ, കുടലിനേയോ, പാന്‍ക്രിയാസിനേയോ ബാധിച്ച ക്യാന്‍സറാണെങ്കിൽ വിശപ്പ് കുറയും. മല വിസര്‍ജനത്തില്‍ നിറ വ്യത്യാസമുണ്ടാകാം. മലത്തില്‍ രക്തമുണ്ടാകാം, ഇരുണ്ട നിറമാകാം. ദഹനത്തില്‍ വ്യത്യാസം വരുന്നതും ക്യാന്‍സര്‍ സാധ്യത കൂടിയാകാം. പ്രത്യേകിച്ചും ഇവയെല്ലാം വിട്ടുമാറാതെ വരികയാണെങ്കില്‍.
വിട്ടുമാറാതെ നില്‍ക്കുന്ന ചുമ മറ്റൊരു ലക്ഷണമാണ്. പ്രത്യേകിച്ചും ഒരു പ്രായം കഴിഞ്ഞവര്‍ക്ക് ചുമ വിട്ടുമാറാതെയിരിയ്ക്കുന്നുവെങ്കില്‍ ശ്രദ്ധ വേണം. ചുമയ്‌ക്കൊപ്പം രക്തമുണ്ടാകുക, രാത്രി ഉറങ്ങാന്‍ പോലും സാധിയ്ക്കാതെ വരുന്ന രീതിയില്‍ ചുമയ്ക്കുക എന്നിവയെല്ലാം ക്യാന്‍സര്‍ ലക്ഷണമാകാം.
ഇതു പോലെ ശരീരത്തില്‍ കഴലകള്‍ പ്രത്യക്ഷപ്പെട്ടാല്‍ ശ്രദ്ധ വേണം. ഇതിന് പല കാരണങ്ങളുമുണ്ടാകാം. കഴുത്തിലും മറ്റും കഴല വരുന്നത് ലിംഫ് നോഡുകള്‍ക്കുണ്ടാകുന്ന പ്രശ്‌നം കാരണമാകാം. രക്താര്‍ബുദത്തിനും ലിംഫോമയ്ക്കുമെല്ലാം ഇത്തരം ലക്ഷണങ്ങളുണ്ടാകാം. കഴലയ്ക്ക് വേദനയുണ്ടെങ്കിലും ശ്രദ്ധിയ്ക്കുക. ഇതിന്റെ കാരണം കണ്ടെത്തുക
മാറിടത്തില്‍ മുഴകളുണ്ടാകുന്നത് സ്തനാര്‍ബുദ സാധ്യത കൂടിയാണ്. ക്യാന്‍സറല്ലാതെയും മുഴകളുണ്ടാകാം. മുലക്കണ്ണുകളില്‍ ഡിസ്ചാര്‍ജ്, രാത്രികളില്‍ വരുന്ന വേദന, തടിപ്പ്, വരണ്ട ചര്‍മം, തൊലി പൊളിഞ്ഞു പോകുക, കക്ഷത്തിലെ മുഴ എന്നിവയെല്ലാം ക്യാന്‍സര്‍ സാധ്യത കൂടിയാകാം. ഇതല്ലെങ്കിലും പ്രശ്‌നങ്ങളുണ്ടാകാം. ഇത്തരം വ്യത്യാസങ്ങള്‍ കണ്ടാല്‍,ഇത് തുടര്‍ന്ന് പോകുകകയാണെങ്കില്‍ ഡോക്ടറെ കണ്ട് രോഗനിര്‍ണയം വരുത്തേണ്ടത് അത്യാവശ്യമാണ്.
കണ്ടെത്താന്‍ വൈകുന്നതാണ് പലപ്പോഴും ക്യാന്‍സര്‍ ഗുരുതരമാക്കുന്നത്. തുടക്കത്തില്‍ കണ്ടെത്തിയാല്‍ പൂര്‍ണമായും ചികിത്സിച്ചു മാറ്റാന്‍ സാധിയ്ക്കുന്നതാണ് ക്യാന്‍സര്‍ എന്നത്.
