നമ്മളിൽ പലരും വ്യത്യസ്തമായ പാചക രീതികൾ ഇഷ്ടപ്പെടുന്നവരാണ്. കാരണം ഏതൊരു ഭക്ഷ്യ ഉൽപ്പന്നം ആയാലും അത് വ്യത്യസ്തമായ രീതിയിൽ പാചകം ചെയ്തെടുക്കുമ്പോൾ അതിന്റെ രുചിയും കൂടുതൽ വ്യത്യസ്തമായി മാറുന്നു. പലരീതിയിലും പാകം ചെയ്തു രുചി പരീക്ഷിക്കാൻ നമുക്കെല്ലാം പണ്ടേ അല്പം താല്പര്യം കൂടുതലാണ്. ഇന്ന് മൈക്രോവേവ് ഓവനുകൾ പോലുള്ള സാങ്കേതിക വിദ്യകൾ ഉള്ളതുകൊണ്ടു തന്നെ ഇത്തരം കാര്യങ്ങൾ ചെയ്യുക എന്നത് കൂടുതൽ എളുപ്പകരമായി മാറിയിരിക്കുന്നു. ഭക്ഷ്യോല്പന്നങ്ങൾ വറുക്കാനും ബേക്ക് ചെയ്തെടുക്കാനും ഒക്കെ ഇന്ന് ഇത്തരം വിദ്യകളുപയോഗിച്ച് ഞൊടിയിടയിൽ കഴിയും. എന്നാൽ ഇതിൽ നിന്നെല്ലാം വ്യത്യസ്തമായതും അധികമാരും ചിന്തിക്കാത്തതും കൂടുതൽ ആരോഗ്യകരവുമായ ഒരു പാചക രീതിയുണ്ട്. ആ രീതി എന്താണെന്ന് നോക്കാം.
പരമ്പരാഗതമായി ശീലമാക്കി വന്നിരുന്നതും ഇപ്പോൾ അധികം പ്രസിദ്ധമല്ലാത്തതുമായ ഒരു രീതിയാണ് മണലിൽ ഭക്ഷ്യോല്പന്നങ്ങൾ വറുത്തെടുക്കുന്നത്. മറ്റുള്ളവയിൽ നിന്നും വ്യത്യസ്തമായതും ഭക്ഷണത്തിന് പ്രത്യേക രുചി സമ്മാനിക്കുന്നതും സർവ്വോപരി ആരോഗ്യകരമായതുമായ ഒരു പാചകരീതിയാണ് ഇത്. പ്രധാനമായും തെരുവോര ഭക്ഷണ കച്ചവടക്കാരൊക്കെ ഇപ്പോഴും ഈ രീതി വ്യാപകമായി ഉപയോഗിച്ചു വരുന്നുണ്ട്.
പണ്ടത്തെ ആളുകൾ ശീലമാക്കിയ ഒരു ഫുഡ് റോസ്റ്റിങ് രീതി അഥവാ ഭക്ഷണം വറുത്തെടുക്കുന്ന രീതിയാണ് ഇത്. ശുദ്ധമായ മണൽ ഉപയോഗിച്ചാണ് ഇത് ചെയ്യുന്നത്. മണൽ ഉയർന്ന ഊഷ്മാവിൽ ചൂടാക്കിയ ശേഷം ഭക്ഷണ ഇനങ്ങൾ ഇതിലേക്ക് ചേർത്ത് അതിൻറെ ചൂടിൽ വറുത്തെടുക്കുന്നു. പാകമായി കഴിഞ്ഞാൽ മണലിൽ നിന്ന് ഭക്ഷണം പൂർണമായും അരിച്ചെടുത്ത്, ഇത് കഴിക്കാവുന്നതാണ്. ധാന്യങ്ങൾ, നട്ട്സ്, തിനകൾ, കൂടാതെ ചില ലഘുഭക്ഷണങ്ങൾ, പയർവർഗ്ഗങ്ങൾ തുടങ്ങിയവയൊക്കെ ഇത്തരത്തിൽ മണലിൽ വറുത്ത് എടുക്കാറുണ്ട്.
ദേശീയ ഗവേഷണ കേന്ദ്രം നടത്തിയ പഠനം പറയുന്നത് മറ്റു പാചക രീതികളിൽ നിന്ന് വ്യത്യസ്തമായി പരമ്പരാഗതമായ ഈ ഇന്ത്യൻ പാചകരീതി ഭക്ഷണത്തിലടങ്ങിയിരിക്കുന്ന പോഷകാഹാര നിലയെ നഷ്ടപ്പെടുത്താതെ നിലനിർത്തുന്നുവെന്നാണ്. മണലിലെ താപനില ഭക്ഷണത്തെ കൂടുതൽ ക്രിസ്പി ആക്കുന്നു. കൂടാതെ ഇവയ്ക്ക് മെച്ചപ്പെട്ട സൗരഭ്യവും സ്വാദുമെല്ലാം നൽകുന്നു. പോഷകാഹാരത്തെ സംബന്ധിച്ചിടത്തോളം, മണലിൽ വറുത്ത് എടുക്കുമ്പോൾ കാർബോഹൈഡ്രേറ്റ്, പ്രോട്ടീൻ ദഹനക്ഷമത, ബീറ്റ- ഗ്ലൂക്കൻ, ഭക്ഷണ നാരുകൾ, ധാതുക്കൾ, ആന്റിഓക്‌സിഡന്റുകൾ എന്നിവയുടെ അളവ് വർദ്ധിക്കപ്പെടുന്നു എന്നാണ് പഠനങ്ങൾ സൂചിപ്പിക്കുന്നത്. ഈ പ്രക്രിയ ധാന്യങ്ങളിലും പയർവർഗ്ഗങ്ങളിലും അന്തർലീനമായ പോഷകങ്ങളുടെ അളവ് ഉയർത്തുന്നു. മണലിൽ വറുത്ത ഭക്ഷ്യവസ്തുക്കൾ പ്രീബയോട്ടിക് ഡയറ്ററി ഫൈബറായി പ്രവർത്തിക്കുകയും ഉപഭോക്താക്കൾക്ക് ആരോഗ്യഗുണങ്ങൾ നൽകുകയും ചെയ്യുന്നു. പാക്ക് ചെയ്തുവരുന്ന ഏതൊരു ധാന്യ ഉൽപന്നങ്ങളെക്കാളും കൂടുതൽ പോഷകഗുണങ്ങൾ ഇതിൽ നിന്നും ലഭിക്കുമെന്ന് പഠനം ചൂണ്ടിക്കാണിക്കുന്നു.
പഫ്ഡ് റൈസ്, അരി, കടല, നിലക്കടല, നട്സുകൾ തുടങ്ങിയ ഭക്ഷണങ്ങളാണ് മണലിൽ വറുത്തെടുത്ത് വളരെയധികം രുചിയോടെ കഴിക്കാൻ സാധിക്കുക. കേക്ക്, പച്ചക്കറികൾ, മാംസം, മത്സ്യം, മുട്ട എന്നിവയടങ്ങുന്ന ഭക്ഷണങ്ങളും പാകം ചെയ്യാനായി വേണമെങ്കിൽ മണൽ ഉപയോഗിക്കാൻ കഴിയും. ആധുനിക രീതിയിൽ ഇത് ചെയ്യാനായി ശുദ്ധീകരിച്ച മണലിനോടൊപ്പം ഒരു കാസ്റ്റഡ് – ഇരുമ്പ് കടായി കൂടി ആവശ്യമാണ്. ഉയർന്ന തീയിൽ ചൂടാക്കിയ മണലിൽ കടായി വെച്ചുകൊണ്ട് വ്യത്യസ്ത വിഭവങ്ങൾ തയ്യാറാക്കാൻ കഴിയും. മസാല ചായ പോലുള്ള രുചിയേറിയ പാനീയങ്ങളും ഈ രീതിയിൽ തയ്യാറാക്കാവുന്നതേയുള്ളൂ.
അല്പം സമയം എടുക്കുന്ന പാചകരീതി ആണെങ്കിൽ പോലും ഏറ്റവും ചിലവ് കുറഞ്ഞ രീതിയിൽ എണ്ണ രഹിതവും പോഷകസമൃദ്ധമായ ഭക്ഷണങ്ങൾ ഈ രീതിയിൽ പാചകം ചെയ്തെടുക്കാം. അതുകൊണ്ടുതന്നെ ഈയൊരു പാചകരീതി ഇടയ്ക്കൊക്കെ പരീക്ഷിക്കുന്നത് മികച്ചതായിരിക്കും.
