ലോകജനസംഖ്യയുടെ ഭൂരിഭാഗം ആളുകളെയും ബാധിക്കുന്ന ഒരു പ്രധാന ആരോഗ്യപ്രശ്നമാണ് പ്രമേഹം. രക്തത്തിലെ പഞ്ചസാരയുടെ അളവ് അനിയന്ത്രിതമായ വര്‍ദ്ധിക്കുന്നത് മൂലമുണ്ടാകുന്ന രോഗമാണ് പ്രമേഹം. ഈ രോഗാവസ്ഥ നമ്മുടെ ശരീരത്തിൽ മറ്റനേകം ആരോഗ്യ പ്രശ്നങ്ങളുണ്ടാക്കുന്നതിന് വഴിയൊരുക്കി കൊടുക്കും. ശരീരത്തിലെ പാൻക്രിയാസ് ഗ്രന്ധികൾ ഉല്‍പ്പാദിപ്പിക്കുന്ന ഇൻസുലിൻ എന്ന ഹോർമോണിൻ്റ ഉൽപ്പാദനത്തിൽ എന്തെങ്കിലും പ്രശ്നം നേരിടുമ്പോൾ അതായത് ഇതിൻറെ ഉൽപാദനത്തിൽ കുറവ് വരുമ്പോൾ രക്തത്തിലെ ഗ്ലൂക്കോസിന്റെ അളവ് കൂടുന്നു. ഇതാണ് പ്രമേഹത്തിലേക്ക് നയിക്കുന്നത്. ഒരു തവണ വന്നു കഴിഞ്ഞാൽ ജീവിതകാലം മുഴുവനും ഇത് വരുത്തിവയ്ക്കുന്ന അനാരോഗ്യതകൾ അനുഭവിക്കേണ്ടതായി വരും.
പ്രമേഹ രോഗത്തെ കീഴടക്കാനുള്ള ആദ്യ മാര്‍ഗ്ഗം അത് ആരംഭത്തില്‍ തന്നെ തിരിച്ചറിയുക, അതിന് ആവശ്യമായ മുന്‍കരുതലുകൾ എടുക്കുക എന്നതുമാണ്. സാധാരണയായി പ്രമേഹം രണ്ടു തരമുണ്ട് എന്ന് കണക്കാക്കപ്പെടുന്നു. ടൈപ്പ് 1, ടെപ്പ് 2 എന്നിങ്ങനെ അത് അറിയപ്പെടുന്നു. ടൈപ്പ് 1 പ്രമേഹമെന്നത് ശരീരത്തിൽ ഇൻസുലിൻ ഉൽപ്പാദിപ്പിക്കപ്പെടാത്ത അവസ്ഥയാണ്. ഈയൊരു അവസ്ഥ നേരിടുന്നവർ ദിവസവും ഒരു ഡോസ് ഇൻസുലിൻ എടുക്കേണ്ടതായി വരും. ടൈപ്പ് 2 പ്രമേഹം എന്ന രണ്ടാമത്തെ അവസ്ഥ അത്രത്തോളം ഭീകരമല്ലാത്തതും എന്നാൽ കൂടുതൽ ആളുകളിൽ കണ്ടുവരുന്നതുമാണ്. ശരീരത്തിൽ ആവശ്യത്തിനുള്ള ഇൻസുലിൻ ഉൽപ്പാദിപ്പിക്കാത്തതോ അല്ലെങ്കിൽ ഉത്പാദിപ്പിക്കപ്പെട്ട ഇൻസുലിൻ ശരീരം വേണ്ട വിധം ഉപയോഗിക്കാത്തതോ ആണ് ടൈപ്പ് 2 പ്രമേഹത്തിനു കാരണം. ഏതു പ്രായക്കാരെയും ബാധിക്കുന്ന വളരെ സാധാരണമായ ഒന്നാണ് ടൈപ്പ് 2 പ്രമേഹം. അതുകൊണ്ടുതന്നെ ഇന്ന് ലോകത്തെ ഏറ്റവും കൂടുതൽ ആളുകൾ നേരിടുന്ന ആരോഗ്യ പ്രശ്നങ്ങളിൽ ഒന്നായി മാറിക്കൊണ്ടിരിക്കുകയാണ് ടൈപ്പ് 2 പ്രമേഹം.
ടൈപ്പ് 2 പ്രമേഹം ഒരു തവണ വന്നു കഴിഞ്ഞാൽ പിന്നീട് വിട്ടുമാറാത്ത ഒരു അവസ്ഥയായി മാറും. ഇതു മൂലമുണ്ടാകുന്ന രക്തത്തിലെ പഞ്ചസാരയുടെ അളവ് ഉയരുന്നത് നിയന്ത്രിക്കാൻ മരുന്നുകൾ കഴിക്കേണ്ടതായി വരും. അതല്ലെങ്കിൽ ഇത്തരത്തിൽ രക്തത്തിൽ ഗ്ലൂക്കോസ് നില ഉയർന്നു കൊണ്ട് ശരീരത്തിന്റെ വിവിധ പ്രവർത്തനങ്ങളെ ബാധിക്കുന്നതിനു കാരണമാകും. പ്രമേഹത്തിന്റെ ലക്ഷണങ്ങൾ സാവധാനത്തിലാണ് പ്രത്യക്ഷപ്പെടാൻ തുടങ്ങുക. ഓരോ വ്യക്തികളിലും വ്യത്യസ്തമായ രീതിയിൽ അനുഭവപ്പെടാറുണ്ടെങ്കിലും സാധാരണഗതിയിൽ ഏതൊരാളിലും ഉണ്ടാകാൻ സാധ്യതയുള്ള ലക്ഷണങ്ങൾ 3 ഗണങ്ങളിൽ പെടുന്നു. അവ പോളിഡിപ്സിയ, പോളിയൂറിയ, പോളിഫാഗിയ എന്നറിയപ്പെടുന്നു. ഇവയെ കുറിച്ച് കൂടുതൽ അറിയാം.
പ്രമേഹ രോഗികളിൽ സാധാരണമായി അനുഭവപ്പെടുന്ന അമിത ദാഹത്തെ വിവരിക്കാൻ ഉപയോഗിക്കുന്ന ഒരു മെഡിക്കൽ പദമാണ് പോളിഡിപ്സിയ. പ്രമേഹ ലക്ഷണമായി ഒരു വ്യക്തിക്ക് അമിതമായ ദാഹമോ തൊണ്ട വരൾച്ചയോ അനുഭവപ്പെടുന്നു. രക്തപ്രവാഹത്തിൽ അമിതമായ ഗ്ലൂക്കോസിന്റെ സാന്നിധ്യം കാരണം, നമ്മുടെ ശരീരത്തിൽ നിന്ന് അവയെ നീക്കം ചെയ്യാൻ നമ്മുടെ വൃക്കകൾ അധികമായി പ്രവർത്തിക്കുന്നത് മൂലമാണ് ഇത് അനുഭവപ്പെടുന്നത്. ഇത് ഒരാൾ മൂത്രമൊഴിക്കുന്നതിന്റെ ആവൃത്തിയും ശരീരത്തിന്റെ ജലത്തിന്റെ ആവശ്യകതയും വർദ്ധിപ്പിക്കുന്നു.
അമിതമായി മൂത്രമൊഴിക്കാൻ തോന്നുന്ന അവസ്ഥയെ നിർവചിക്കാൻ ഉപയോഗിക്കുന്ന ഒരു മെഡിക്കൽ അവസ്ഥയാണ് പോളിയൂറിയ. ഇത് പ്രമേഹത്തിന്റെ മറ്റൊരു ലക്ഷണമായി കണക്കാക്കാം. രക്തത്തിലെ ഉപയോഗ ശൂന്യമായ ഗ്ലൂക്കോസും വിഷവസ്തുക്കളും നീക്കം ചെയ്യുന്നതിനായി വൃക്കകൾ അമിതമായി പ്രവർത്തിക്കാൻ തുടങ്ങും. വൃക്കകൾ അമിതമായ ഗ്ലൂക്കോസ് ഫിൽട്ടർ ചെയ്ത ശേഷം അവ മൂത്രത്തിലൂടെ പുറന്തള്ളുന്നു. രോഗമില്ലാത്ത ഒരാൾ പ്രതിദിനം 1-2 ലിറ്റർ മൂത്രമൊഴിക്കാൻ സാധ്യതയുണ്ട്. എന്നാൽ പോളിയൂറിയയുടെ ലക്ഷണം ഉള്ളവരുടെ കാര്യത്തിൽ, ഇത് ഒരു ദിവസം 3 ലിറ്ററിലധികം മൂത്രമായി വർദ്ധിക്കുന്നു. ഗർഭധാരണം, വൃക്കരോഗം, ഉയർന്ന കാൽസ്യം അളവ്, ഡൈയൂററ്റിക് മരുന്നുകൾ എന്നിവയാണ് പോളിയൂറിയയിലേക്ക് നയിക്കുന്ന മറ്റ് അവസ്ഥകൾ.
അമിതമായ വിശപ്പ് അനുഭവപ്പെടുന്ന അവസ്ഥയാണിത്. ഒരുതവണ കഴിച്ച ഭക്ഷണം ആഗിരണം ചെയ്യുന്നതിലൂടെ ലഭിക്കുന്ന ഗ്ലൂക്കോസിനെ നശിപ്പിക്കാൻ ആവശ്യമായ ഇൻസുലിൻ ഹോർമോണുകൾ ലഭിക്കാതെ വരുമ്പോൾ, അത് മൂലം വ്യക്തിക്ക് വീണ്ടും വിശപ്പ് അനുഭവപ്പെടുന്നു. ഇത്തരത്തിലുണ്ടാകുന്ന അമിതമായ വിശപ്പിനെ പോളിഫാഗിയ എന്ന് വിളിക്കുന്നു. ഈ ലക്ഷണം ഉള്ളവർ എത്രയധികം ഭക്ഷണം കഴിച്ചാലും വിശപ്പ് മാറില്ല. മാത്രമല്ല ഒരു വ്യക്തി എത്രത്തോളം ഭക്ഷണം കഴിക്കുന്നുവോ അത്രത്തോളം രക്തത്തിലെ പഞ്ചസാരയുടെ അളവ് കൂടുകയും ചെയ്യും. ഭക്ഷണം കഴിച്ചതിനു ശേഷവും അവർക്ക് ക്ഷീണവും ബലഹീനതയും അനുഭവപ്പെടും. പോളിഫാഗിയയിലേക്ക് നയിച്ചേക്കാവുന്ന മറ്റ് ചില അവസ്ഥകൾ ഓവർ ആക്ടീവ് തൈറോയ്ഡ് അല്ലെങ്കിൽ ഹൈപ്പർതൈറോയിഡിസം, പ്രീമെൻസ്ട്രൽ സിൻഡ്രോം (PMS) അല്ലെങ്കിൽ സമ്മർദ്ദം എന്നിവയൊക്കെയാണ്.
പ്രമേഹ രോഗത്തെ കീഴടക്കാനുള്ള ആദ്യ മാര്‍ഗ്ഗം അത് ആരംഭത്തില്‍ തന്നെ തിരിച്ചറിയുക, അതിന് ആവശ്യമായ മുന്‍കരുതലുകൾ എടുക്കുക എന്നതുമാണ്.
