നീരിറക്കം, തലനീരിറങ്ങുക എന്ന അവസ്ഥയെക്കുറിച്ച് പലപ്പോഴും പലരും പരാതിപ്പെടുന്നതു കാണാം. ശരീരത്തിന് അസ്വസ്ഥതയും ശരീര ഭാഗങ്ങളില്‍ വേദനയുമുണ്ടാക്കുന്ന പ്രത്യേക അവസ്ഥയാണിത്. ആയുര്‍വേദ പ്രകാരം കഫദോഷമാണ് നീര്‍ക്കെട്ടിന് കാരണമാകുന്നത്. നീര്‍ക്കെട്ട് ഏതു ഭാഗത്താണോ ഉണ്ടാകുന്നത്, ആ ഭാഗത്ത് രോഗമുണ്ടാകുന്നു. കാരണം നീര്‍ക്കെട്ടുണ്ടാകുമ്പോള്‍ ആ ഭാഗത്തേയ്ക്കുള്ള രക്തയോട്ടവും ഓക്‌സിജന്‍ സഞ്ചാരവും നിലയ്ക്കുകയാണ് ചെയ്യുന്നത്. ശിരസില്‍ നിന്നും താഴേയ്ക്കാണ് നീര്‍സഞ്ചാരമുണ്ടാകുന്നത്. ശരീരത്തിന്റെ പല ഭാഗത്തുമുണ്ടാകുന്ന നീര്‍ക്കെട്ടുകള്‍ പല തരം പ്രശ്‌നങ്ങളാണ് വരുത്തുന്നത്.
ശിരസിലാണ്‌ നീര്‍ക്കെട്ടെങ്കില്‍ തലവേദന, തലചുറ്റല്‍, കണ്ണിന് രോഗം, അട്രോഫി, ബ്രെയിന്‍ ട്യൂമര്‍, ഡിമെന്‍ഷ്യ തുടങ്ങിയ പല രോഗങ്ങളുമുണ്ടാകാം. ഇത് ബ്രെയിനിലാണെങ്കില്‍ മോട്ടോര്‍ ന്യൂറോണ്‍ഡിസീസ്, കോര്‍ട്ടിക്കല്‍ അട്രോഫി, ഡിമെന്‍ഷ്യ, ട്യമര്‍ തുടങ്ങിയ അവസ്ഥകളുണ്ടാകാം. ഇത് തൊണ്ടയിലെങ്കില്‍ തൈറോയ്ഡ്, ഫാരിന്‍ജൈറ്റിസ്, ലാരിന്‍ജൈറ്റിസ്, ടോണ്‍സിലൈറ്റിസ്, കൂര്‍ക്കംവലി, ശ്വാസ തടസം തുടങ്ങിയ അവസ്ഥകളും ഉണ്ടാകാം.
രക്തത്തിലാണ് നീര്‍ക്കെട്ടെങ്കില്‍ ചുട്ടുപുകച്ചില്‍, ചര്‍മരോഗം, ഉറക്കക്കുറവ്, മാനസിക സുഖക്കുറവ്, കരുവാളിപ്പ് തുടങ്ങിയ അസ്വസ്ഥതകളുണ്ടാകാം. ശ്വാസകോശത്തിലെങ്കില്‍ നടക്കുമ്പോള്‍ കിതപ്പ്, ഹൃദയ പ്രശ്‌നങ്ങള്‍, ഹൈപ്പര്‍ ടെന്‍ഷന്‍ എന്നിവയുണ്ടാകാം. ഇത് കരളില്‍ ഉണ്ടാവുകയാണെങ്കിൽ ഫാറ്റി ലിവര്‍, ലിവര്‍ സിറോസിസ്, പ്രമേഹം എന്നിവയാകും ഫലം. ആമാശയത്തിലാണെങ്കിൽ ഗ്യാസ്, വയര്‍ വീര്‍ക്കുക, വിശപ്പ് കുറവ്, അള്‍സര്‍ തുടങ്ങിയ അവസ്ഥകളുണ്ടാകും. ഇത് സന്ധികളില്‍ എത്തുമ്പോള്‍ സന്ധിവേദന, വാതം തുടങ്ങിയ പല അവസ്ഥകൾക്കും കരണമാകാം.
നീരിറക്കം ഒഴിവാക്കാന്‍ ശ്രമിയ്ക്കുക. ഉദാഹരണത്തിന് നല്ല ചൂടില്‍ നിന്നും വന്ന് ഉടന്‍ കുളിക്കുന്നത്, കുളിച്ച ഉടനെ വെയിലത്ത് പോകുന്നത്, ജോലി ചെയ്ത ശേഷം ഉടന്‍ ശരീരത്തില്‍ തണുത്ത വെള്ളം ഒഴിയ്ക്കുന്നത് തുടങ്ങിയവയെല്ലാം കഴിവതും ഒഴിവാക്കുക. ഇതെല്ലാം മസിലിന് സ്‌ട്രെസുണ്ടാക്കുന്നു ഇത് വേദനയും നീര്‍ക്കെട്ടും ഉണ്ടാക്കുന്നു. ഇത്തരക്കാര്‍ മധുരവും എരിവും പ്രിസര്‍വേറ്റീവുകളും അടങ്ങിയ ഭക്ഷണം ഒഴിവാക്കുക, യോഗ, സ്വിമ്മിംഗ്, വാക്കിംഗ്, ഡീപ് ബ്രീത്തിംഗ് (ശ്വാസം മാക്‌സിമം ഉള്ളിലേയ്‌ക്കെടുക്കുക, പിന്നീട് പതുക്കെ പുറന്തള്ളുക) എന്നിവയെല്ലാം നീരിറക്കത്തിന് പരിഹാരമായി ഉപയോഗിയ്ക്കാം.
നീരിറക്കിത്തിന് കാരണങ്ങള്‍ പലതാണ്. അന്തരീക്ഷം പ്രധാനപ്പെട്ട കാരണമാണ്. ഈര്‍പ്പം നിറഞ്ഞ അന്തരീക്ഷം ഈ അവസ്ഥയുണ്ടാക്കുന്നു. വ്യായാമം ചെയ്യുന്നത് നീരിറക്കം കുറയ്ക്കാന്‍ ഏറെ നല്ലതാണ്. വ്യായാമത്തിലൂടെ വിയര്‍പ്പ് പുറന്തളളുന്നത് ഗുണം നല്‍കും. പകലുറക്കം ഒഴിവാക്കുക, ചൂടുവെള്ളം കുടിയ്ക്കുക, ആരോഗ്യകരമായ ആഹാരം, മസാലകള്‍ കുറയ്ക്കുക എന്നിവയെല്ലാം തന്നെ ശരീരത്തിന് പ്രതിരോധം നല്‍കി നീരിറക്കം തടയാന്‍ സഹായിക്കുമെന്ന് വിവിധ പഠനങ്ങളിൽ പറയുന്നു.
കഠിനമായ നീരിറക്കം ഒരു പക്ഷെ സൈനസൈറ്റിസിനും കാരണമായേക്കാം അതിനാൽ അസ്സഹനീയമായ വേദനയാണെങ്കിൽ വൈദ്യസഹായം തേടേണ്ടതാണ്.
