പനിയായിട്ട് ബ്ലഡ് ടെസ്റ്റ ചെയ്ത റിസൾട്ട് വന്നു, എലിപ്പനിയാണ്…….
മഴക്കാലരോഗങ്ങൾ പടികടന്നെത്തി. പലപ്പോഴും രോഗം പൊട്ടിപ്പുറപ്പെട്ട് വളരെപ്പെട്ടന്ന് പകരുകയാണ് ചെയ്യുന്നത്. നല്ല രീതിയിലുള്ള മുൻ കരുതൽ എടുത്താൽ മാത്രമേ ഇതിനെ തടയാനാവൂ.കുട്ടികളും മുതിര്‍ന്നവരും ഒരുപോലെ ശ്രദ്ധിക്കേണ്ട കാലം കൂടിയാണ് മഴക്കാലം. ഡെങ്കിപ്പനി, എലിപ്പനി, ചിക്കുന്‍ഗുനിയ, വൈറല്‍ പനി, കോളറ, മലമ്പനി, മന്ത്, വയറിളക്ക രോഗങ്ങള്‍, ടൈഫോയിഡ്, മഞ്ഞപ്പിത്തം തുടങ്ങിയ പലതരം രോഗങ്ങള്‍ മഴക്കാലത്ത് പിടിപെടാം. ഇക്കൂട്ടത്തിൽ വളരെയധികം സൂക്ഷിക്കേണ്ട അസുഖമാണ് എലിപ്പനി.
എലിമൂത്രത്താല്‍ അശുദ്ധമായ ജലം, മണ്ണ്, ഫലവര്‍ക്ഷങ്ങള്‍, ആഹാരം എന്നിവയിലൂടെ രോഗാണുക്കള്‍ മനുഷ്യശരീരത്തില്‍ പ്രവേശിക്കുന്നു. മലിന ജലത്തില്‍ കുളിക്കുകയോ ചെളിയിലും വെള്ളക്കെട്ടുകളിലും പണിയെടുക്കുകയോ രോഗാണു കലര്‍ന്ന ആഹാരം, വെള്ളം എന്നിവ ഉപയോഗിക്കുകയോ ചെയ്യുന്നവര്‍ക്ക് രോധബാധയ്ക്ക് സാധ്യതയുണ്ട്.
ലെപ്റ്റോ സ്പൈറോസിസ് ബാക്ടീരിയ കന്നുകാലികള്‍, പന്നി, കുതിര, പട്ടി, പലതരത്തിലുള്ള കരണ്ടു മുറിക്കുന്ന എലി, അണ്ണാന്‍ തുടങ്ങിയ ജീവികള്‍ എന്നിവകളില്‍ കാണപ്പെടുന്നു.എലി, കാര്‍ന്നുതിന്നുന്ന മറ്റു ജീവികള്‍, വളര്‍ത്തുമൃഗങ്ങള്‍, കുറുക്കന്‍ എന്നിവയില്‍ ഈ രോഗാണുക്കളെ കണ്ടെത്തിയിട്ടുണ്ട്. കേരളത്തില്‍ എലികളിലാണ് ഈ രോഗാണുക്കളെ കൂടുതലായി കണ്ടുവരുന്നത്.
രോഗം ബാധിച്ച ജീവിയുടെ മൂത്രം കലരുന്ന ജലം, മണ്ണ് എന്നിവ വഴിയാണ് മനുഷ്യരില്‍ ഈ രോഗമെത്തുന്നത്. പഴകിയ ആഹാരം, വേവിക്കാത്ത ആഹാരം എന്നിവ കഴിക്കുന്നതും, ജന്തുക്കളുടെ കണ്ണുകള്‍, മൂക്ക് എന്നിവ തൊടുന്നതും വഴി മനുഷ്യരില്‍ രോഗം പരക്കാം. എന്നാല്‍ ഒരു മനുഷ്യനില്‍ നിന്ന് മറ്റൊരാളിലേക്ക് രോഗം പകര്‍ന്നതായി വെളിപ്പെട്ടിട്ടില്ല.
ഏകദേശം 5-15 ദിവസത്തിനുള്ളില്‍ രോഗ ലക്ഷണങ്ങള്‍ ഉണ്ടാകും. കടുത്ത പനി, തലവേദന, മസിലുകളുടെ വേദന, വിറയല്‍, കടുത്ത ക്ഷീണം ഇവയാണ് ആദ്യ ലക്ഷണങ്ങള്‍. ഹൃദയത്തെ ബാധിച്ചാല്‍ നെഞ്ച് വേദന, ശ്വാസം മുട്ടല്‍, വൃക്കകളെ ബാധിച്ചാല്‍ മൂത്രത്തിന്റെ അളവ് കുറയുക, രക്തത്തിന്റെ നിറം വരിക, കാലിലും മുഖത്തും നീരുണ്ടാകുക. കരളിനെ ബാധിക്കുന്നവര്‍ക്ക് മഞ്ഞപിത്തം പോലെയുള്ള ലക്ഷണങ്ങള്‍ കാണാം.
“വീൽസ് സിൻഡ്രോം” എന്ന അവസ്ഥ വളരെ അപകടകരവും, ചികിത്സ കൃത്യമായി കിട്ടിയാൽ പോലും ഒരു വലിയ ശതമാനം പേരിൽ മാരകവും ആണ്. മേൽപ്പറഞ്ഞ ലക്ഷണങ്ങളുമായി തുടങ്ങുന്ന രോഗം, ക്രമേണ മറ്റ് അവയവങ്ങളെ ബാധിച്ചു തുടങ്ങുന്നു. രക്തസ്രാവം, മഞ്ഞപ്പിത്തം, വൃക്കരോഗം എന്നിവയാണ് വീൽസ് സിൻഡ്രോമിൽ കൂടുതലായി കാണുക. ഇവയ്ക്കുപുറമേ തലച്ചോറിന്റെ ആവരണത്തെ ബാധിക്കുന്ന മെനിഞ്ചൈറ്റിസ്, ഹൃദയമിടിപ്പിലെ വ്യതിയാനങ്ങൾ, താഴ്ന്ന രക്തസമ്മർദ്ദം, ശ്വാസതടസ്സം എന്നിവയും കാണപ്പെടുന്നു. കൂടുതൽ അവയവങ്ങളെ ബാധിക്കുന്നത് അസുഖത്തിന്റെ മാരകശേഷി കൂട്ടുന്നു. വൃക്കരോഗത്തിനു ചികിൽസയായി ഡയാലിസിസ് വേണ്ടിവന്നേക്കാം. മറ്റു പല പനികളിൽ കാണുന്നതുപോലെ എലിപ്പനിയിലും പ്ലേറ്റ‍്‍ലെറ്റ് കൗണ്ട് കുറയുന്നു. ഇതും രക്തസ്രാവത്തിനു കാരണമാകുന്നു.
സമയത്ത് കണ്ടെത്തുകയും ചികിത്സ നല്‍കുകയും ചെയ്തില്ലെങ്കില്‍ ഹൃദയം, കരള്‍, വൃക്കകള്‍ തുടങ്ങിയ അവയവങ്ങളെ സാരമായി ബാധിക്കാം. മരണം വരെ സംഭവിക്കാംവെളളത്തില്‍ മുങ്ങി കിടന്ന ഭക്ഷണ വസ്തുക്കള്‍ ഉപയോഗിക്കരുത്. അതോടൊപ്പം ഭക്ഷണ വസ്തുക്കള്‍ നല്ലതുപോലെ വേവിച്ചും, കുടിവെള്ളം ഒരു മിനിട്ട് എങ്കിലും തിളപ്പിച്ചും വേണം ഉപയോഗിക്കാന്‍.
എലികളും മറ്റും ഒളിച്ചിരിക്കാന്‍ സാധ്യതയുള്ള സ്ഥലങ്ങള്‍ വൃത്തിയാക്കണം. എലികളെ കൊല്ലാനായി എലിക്കെണികള്‍ പോലുള്ള മാര്‍ഗ്ഗങ്ങള്‍ സ്വീകരിക്കണം. എലിവിഷം ഈ സമയത്ത് അപകടകരമാണ് ഒഴിവാക്കുക. വീട്ടിലും പരിസരത്തും, ഒഴുക്കില്ലാതെ കെട്ടികിടക്കുന്ന വെള്ളത്തില്‍ കഴിവതും ഇറങ്ങരുത്. പ്രത്യേകിച്ച് കുട്ടികളും മറ്റും ഇത്തരം വെള്ളത്തില്‍ ഇറങ്ങി കളിക്കാന്‍ സാധ്യതയുണ്ട്.
ആഹാര പദാര്‍ത്ഥങ്ങള്‍ മൂടിവയ്ക്കുക, ആഹാര പദാര്‍ത്ഥങ്ങളുടെ അവശിഷ്ടങ്ങള്‍ വീട്ടുപരിസരങ്ങളില്‍ അലക്ഷ്യമായി വലിച്ചെറിയാതിരിക്കുക, തിളപ്പിച്ചാറ്റിയ വെള്ളം മാത്രം കുടിക്കുവാന്‍ ഉപയോഗിക്കുക എന്നിവയാണ് രോഗം പടരാതിരിക്കുന്നതിനുള്ള പ്രതിരോധ നടപടികള്‍. വെള്ളത്തില്‍ കലര്‍ന്നിട്ടുള്ള അണുക്കളെ നശിപ്പിക്കാന്‍ ബ്ലീച്ചിംഗ് പൗഡര്‍ ഉപയോഗിക്കാം. പാടത്ത് പണിയെടുക്കുന്നവരും മലിനജലവുമായി സമ്പര്‍ക്കമുള്ള ജോലി ചെയ്യുന്നവരും, ഇറച്ചിവെട്ട്, കൈതകൃഷി തുടങ്ങിവ ജോലികളില്‍ ഏര്‍പ്പെടുന്നവരും കയ്യുറകള്‍, ബൂട്ട് തുടങ്ങിയവ ഉപയോഗിക്കണം.
പ്രായമേറിയവരിലും ശരീരത്തിന്റെ പ്രതിരോധശേഷി കുറഞ്ഞവരിലുമാണ് എലിപ്പനി കൂടുതൽ സങ്കീർണമാകുന്നത്. ശ്വാസകോശ രക്തസ്രാവം, വൃക്കസ്തംഭനം, ഹൃദയപ്രവർത്തനങ്ങളെ ബാധിക്കുന്ന മയോകാർഡൈറ്റിസ് തുടങ്ങിയ സങ്കീർണതകളാണ് പ്രധാനമായും മരണകാരണമാകുന്നത്. ഗുരുതരമായ എലിപ്പനി ബാധയെത്തുടർന്ന് മരണനിരക്ക് ഉയരാം.
രോഗനിർണ്ണയം രക്തപരിശോധനയിലൂടെ സാധ്യമാണ്. അതോടൊപ്പം സങ്കീർണ്ണതകൾ നിർണ്ണയിക്കാനായുള്ള ലബോറട്ടറി പരിശോധനകൾ, ഇ സി ജി, അൾട്രാസൗണ്ട് സ്കാൻ, സി ടി സ്കാൻ എന്നിവയും വേണ്ടിവന്നേക്കാം.
എലിപ്പനി ശരീരത്തിലെ ആന്തരാവയവങ്ങളെ ബാധിച്ചതിനുശേഷം ആന്റിബയോട്ടിക്കുകൾ ഫലപ്രദമാകണമെന്നില്ല. പെനിസിലിൻ ആണ് എലിപ്പനിക്കെതിരായ ഏറ്റവും ഫലപ്രദമായ ആന്റിബയോട്ടിക്. കൂടാതെ ഡോക്സിസൈക്ലിൻ, സിഫാലോസ്പോറിനുകൾ, ക്വിനലോണുകൾ, അസിത്രോമൈസിൻ തുടങ്ങിയ ആന്റിബയോട്ടിക്കുകളും ഫലപ്രദമാണ്. സംസ്ഥാനത്തെ എല്ലാ ആശുപത്രികളിലും എലിപ്പനി ചികിത്സയ്ക്കുള്ള മരുന്നുകൾ ലഭ്യമാണ്.
