മുലയൂട്ടുന്ന അമ്മമാർ നോമ്പ് എടുക്കുന്നതിനെക്കുറിച്ച് പലർക്കും പല അഭിപ്രായങ്ങളുണ്ടാകും. “നീ നോമ്പ് എടുത്താൽ കുഞ്ഞിന് പാൽ ഉണ്ടാവില്ല” എന്ന് ആരോടെങ്കിലും കേൾക്കുമ്പോൾ തന്നെ പേടിയാകും. സത്യത്തിൽ നമ്മൾ വിചാരിക്കുന്ന പോലെ നോമ്പ് എടുത്ത ഉടനെ മുലപ്പാൽ വറ്റിപ്പോകില്ല എന്നതാണ് സത്യം. നമ്മുടെ ശരീരം കുഞ്ഞിന് വേണ്ട പാൽ ഉൽപ്പാദിപ്പിക്കാൻ എപ്പോഴും ശ്രമിച്ചുകൊണ്ടിരിക്കും. ഒരു ദിവസം നോമ്പ് എടുത്തതുകൊണ്ട് പാലിന്റെ ഗുണനിലവാരത്തിലൊന്നും വലിയ മാറ്റം വരില്ല, പക്ഷേ അമ്മമാരുടെ ആരോഗ്യത്തിന്റെ കാര്യത്തിൽ കുറച്ച് ശ്രദ്ധ വേണം.
ശരിക്കുമുള്ള പ്രശ്നം പാൽ ഇല്ലാതാകുന്നതല്ല, പകരം അമ്മയ്ക്ക് ഉണ്ടാകുന്ന ക്ഷീണമാണ്. പകൽ മുഴുവൻ വെള്ളം കുടിക്കാത്തതുകൊണ്ട് ശരീരം ആകെ തളരാൻ സാധ്യതയുണ്ട്. അതുകൊണ്ട് തന്നെ നോമ്പ് തുറന്നു കഴിഞ്ഞാൽ പിന്നെ കിട്ടുന്ന സമയം മാക്സിമം വെള്ളം കുടിക്കാൻ ശ്രദ്ധിക്കണം. വെള്ളം കുടി കുറഞ്ഞാൽ അത് പാലിന്റെ അളവിനെ പതുക്കെ ബാധിച്ചേക്കാം. അതുകൊണ്ട് ഇഫ്താർ മുതൽ സുഹൂർ വരെ ഇടയ്ക്കിടെ വെള്ളം കുടിച്ചു കൊണ്ടിരിക്കണം. അതുപോലെ അത്താഴത്തിന് നല്ല പോഷകമുള്ള ഭക്ഷണങ്ങൾ കഴിക്കാനും മറക്കരുത്.
കുഞ്ഞിന്റെ കാര്യം നോക്കുകയാണെങ്കിൽ, കുഞ്ഞ് സാധാരണ പോലെ മൂത്രം ഒഴിക്കുന്നുണ്ടോ എന്നും കളിക്കുന്നുണ്ടോ എന്നും നോക്കിയാൽ മതി. കുഞ്ഞിന് പാൽ കിട്ടുന്നില്ലെന്ന് തോന്നുകയോ, അല്ലെങ്കിൽ അമ്മയ്ക്ക് അമിതമായ തലകറക്കമോ ക്ഷീണമോ അനുഭവപ്പെടുകയോ ചെയ്താൽ ഒട്ടും മടിക്കേണ്ട, നോമ്പ് ഒഴിവാക്കുന്നതാണ് നല്ലത്. കാരണം അമ്മയുടെയും കുഞ്ഞിന്റെയും ആരോഗ്യത്തിനാണ് നമ്മൾ ഒന്നാം സ്ഥാനം നൽകേണ്ടത്. സന്തോഷത്തോടെയും ആരോഗ്യത്തോടെയും നോമ്പ് നോൽക്കാൻ ഈ കാര്യങ്ങൾ ഒന്ന് ശ്രദ്ധിച്ചാൽ മാത്രം മതി!
