ഫ്ലാവിവൈറിഡെ വിഭാഗത്തില്‍ പെടുന്ന സിക്ക വൈറസ് മൂലം മനുഷ്യരിലും മൃഗങ്ങളിലും ഉണ്ടാകുന്ന ഒരു രോഗമാണ് സിക്ക വൈറസ് രോഗം. കുരങ്ങുകളില്‍ കണ്ടുവരുന്ന ഈ വൈറസ് സാന്നിധ്യം കൊതുകുകളിലൂടെയാണ് മനുഷ്യരില്‍ കൂടുതലായും എത്തുന്നത്. പല അസുഖങ്ങളുടെയും ലക്ഷണങ്ങൾ പോലെ തുടര്‍ച്ചയായുള്ള പനി തന്നെയാണ് ഈ അസുഖത്തിന്റെയും മുഖ്യ ലക്ഷണം. ഡെങ്കിപ്പനി, ചിക്കന്‍ ഗുനിയ തുടങ്ങിയ രോഗങ്ങളുടെ ഗണത്തില്‍ പെടുത്താവുന്ന ഒന്നാണ് സിക്ക വൈറസ് ബാധയും.
സിക്ക വൈറസ് അണുബാധയുള്ള ഭൂരിഭാഗം പേരിലും രോഗലക്ഷണങ്ങൾ കാണാറില്ല എന്നതാണ് ശ്രദ്ധേയം. ലൈംഗിക ബന്ധങ്ങളിലൂടെയും രക്തം സ്വീകരിക്കുന്നതിലൂടെയും സിക്ക വൈറസ് മറ്റൊരാളിലേക്ക് എത്തുമെന്നത് ഗുരുതരമായ സാഹചര്യമാണ്. സിക്ക വൈറസ് സ്ഥിരീകരിക്കുന്ന മുതിർന്നവരിൽ നാഡീസംബന്ധമായ പ്രശ്നങ്ങളാണ് ഉണ്ടാകുക. പനി, ചുവന്ന പാടുകൾ, പേശി വേദന, സന്ധി വേദന, തലവേദന എന്നിവയാണ് പ്രധാന ലക്ഷണങ്ങൾ. രണ്ട് മുതൽ ഏഴ് ദിവസം വരെ ഈ ലക്ഷണങ്ങൾ നീണ്ട് നിൽക്കുകയും ചെയ്യും.
ഗര്‍ഭിണികളില്‍ സിക്ക വൈറസ് ബാധയുണ്ടായാല്‍ ഇത് ഗര്‍ഭസ്ഥ ശിശുവിന് അംഗവൈകല്യമുള്‍പ്പെടെയുളള പല പ്രശ്‌നങ്ങളും വരുത്താന്‍ സാധ്യതയുണ്ട്. ഇതിനാല്‍ തന്നെയും ഗര്‍ഭിണികള്‍ക്ക് പ്രത്യേക ശ്രദ്ധ ആവശ്യമാണ്. കൊതുകുകളാണ് മനുഷ്യരില്‍ ഇതിന് പ്രധാന കാരണമാകുന്നത് എന്നതിനാല്‍ തന്നെയും കൊതുകില്‍ നിന്നും രക്ഷ നേടാനുളള വഴികള്‍ സ്വീകരിയ്ക്കുകയെന്നത് ഏറെ പ്രധാനമാണ്. മരണം റിപ്പോര്‍ട്ട് ചെയ്യപ്പെട്ടിട്ടില്ലെങ്കിലും മുതിർന്നവരിൽ നാഡികളെ ബാധിക്കുന്ന ഗില്യൻ ബാരി സിൻഡ്രോം എന്ന അവസ്ഥയ്ക്കും ഈ രോഗം കാരണമാകുന്നതായി കണ്ടു വരുന്നു.
ഇതിന് എതിരെ വാക്‌സിനുകള്‍ പരീക്ഷണ ഘട്ടത്തില്‍ മാത്രമാണ്. ഇതിനാല്‍ തന്നെയും കൊതുകുകളെ പ്രതിരോധിയ്ക്കുകയെന്നതാണ് പ്രധാന പരിഹാര വഴി. തണുത്ത കാലാവസ്ഥയേക്കാള്‍ ചൂടുള്ള കാലാവസ്ഥയിലാണ് ഈ രോഗ സാധ്യത കൂടുതല്‍. ഇത് പടര്‍ത്തുന്ന ഈഡിസ് വിഭാഗത്തില്‍ പെട്ട കൊതുകുകള്‍ കൂടുതലായി വളരുന്നത് ചൂടുള്ള കാലാവസ്ഥയിലാണ്. ഇതിന് എതിരെ വാക്‌സിനുകള്‍ പരീക്ഷണ ഘട്ടത്തില്‍ മാത്രമാണ്. ഇതുപോലെ തന്നെ രാവിലെയും വൈകിട്ടും കടിയ്ക്കുന്ന കൊതുകുകളാണിവ എന്നതും ശ്രദ്ധിയ്ക്കുക.
സിക്ക വൈറസ് ബാധയില്‍ പനിയ്‌ക്കൊപ്പം കണ്ണുകള്‍ ചുവക്കുന്നതും പതിവാണ്. ഇതിന്റെ മറ്റു ലക്ഷണങ്ങള്‍ പലതും ഡെങ്കി, ചിക്കന്‍ ഗുനിയ പോലുള്ളവയോട് സാമ്യമുള്ളവയെങ്കിലും കണ്ണുകള്‍ ചുവക്കുന്നത് പോലുള്ള ലക്ഷണങ്ങള്‍ സിക്ക വൈറസ് ബാധയില്‍ ഉണ്ടാകുന്നുണ്ട്. ഇതിന്റെ ലക്ഷണങ്ങള്‍, അതായത് പനിയടക്കമുള്ള മേല്‍പ്പറഞ്ഞ ലക്ഷണങ്ങള്‍ കണ്ടാല്‍ ഉടനടി ചികിത്സ തേടേണ്ടത് പ്രധാനമാണ്. കൃത്യമായ മരുന്ന് ഇതിനായി ഇല്ലെങ്കിലും രോഗലക്ഷണങ്ങള്‍ നിയന്ത്രിച്ചു നിര്‍ത്താന്‍ സഹായിക്കുന്ന ചികിത്സാ രീതികള്‍ ലഭ്യമാണ്.
