ഏറ്റവും വൈവിധ്യമാർന്ന പച്ചക്കറികളിൽ ഒന്നാണ് കാരറ്റ്. നിങ്ങൾക്ക് അവയെ പച്ചയ്ക്കോ വേവിച്ചതോ ആവി കയറ്റിയോ സലാഡുകളിലും ഡെസേർട്ടുകളിലുമൊക്കെ ചേർത്തോ കഴിക്കാം. വിറ്റാമിൻ എ, വിറ്റാമിൻ സി, കെ, ബി 6, ബയോട്ടിൻ, പൊട്ടാസ്യം എന്നിവ ഉൾപ്പെടെയുള്ള അധിക പോഷകങ്ങളും അടങ്ങിയതാണ് ഈ ആരോഗ്യദായകമായ പച്ചക്കറി. മികച്ച കാഴ്ചശക്തി, ആരോഗ്യമുള്ള ഹൃദയം, വായയുടെ ആരോഗ്യം, പ്രതിരോധശേഷി വർദ്ധിപ്പിക്കൽ, തിളങ്ങുന്ന ചർമ്മം, തിളക്കമുള്ള മുടി എന്നിവ മുതൽ കാരറ്റിന്റെ സമ്പന്നമായ പോഷക ഗുണങ്ങൾ നിങ്ങൾക്ക് ഒട്ടേറെ അത്ഭുതകരമായ ആരോഗ്യപരമായ ആനുകൂല്യങ്ങൾ നൽകുന്നു.
ആരോഗ്യമുള്ള കണ്ണുകൾ: നിങ്ങളുടെ കാഴ്ചശക്തി മികച്ചതാക്കുന്നതിന് ഈ അത്ഭുതകരമായ പച്ചക്കറി നിങ്ങളുടെ പതിവ് ഭക്ഷണക്രമത്തിൽ ഉൾപ്പെടുത്തുക. ബീറ്റാ കരോട്ടിൻ, ല്യൂട്ടിൻ, സിയാക്‌സാന്തിൻ എന്ന് തുടങ്ങിയ പോഷക ഗുണങ്ങളുടെ സമ്പന്നമായ ഉറവിടമാണ് കാരറ്റ്. ഇവയെല്ലാം കണ്ണിന്റെ ആരോഗ്യം വളരെയധികം മെച്ചപ്പെടുത്തുവാൻ സഹായിക്കുന്നു. കാരറ്റിലെ ആന്റിഓക്‌സിഡന്റുകൾ ബീറ്റാ കരോട്ടിന്റെ അഭാവം മൂലം ഉണ്ടാകുന്ന മാക്യുലർ ഡീജനറേഷൻ, അന്ധത തുടങ്ങിയ കാഴ്ച സംബന്ധമായ പ്രശ്‌നങ്ങളെ ചികിത്സിക്കാൻ സഹായിക്കുന്നു, മാത്രമല്ല വാർദ്ധക്യത്തിൽ കാഴ്ച നഷ്ടപ്പെടാതിരിക്കാനും ഇത് സഹായിക്കുന്നു.
ഹൃദയത്തിന്റെ ആരോഗ്യത്തിന് ഗുണകരം: ആരോഗ്യമുള്ള ഹൃദയത്തിനുള്ള ഫലപ്രദമായ ഭക്ഷണങ്ങളിൽ പ്രധാനമാണ് കാരറ്റ്. കാരറ്റ് ജ്യൂസ് ഓക്സിഡേഷൻ മൂലമുണ്ടാകുന്ന നാശത്തെ നിർവീര്യമാക്കുകയും ഹൃദ്രോഗ സാധ്യതയെ പ്രതിരോധിക്കുകയും ചെയ്യുന്നുവെന്ന് തെളിവുകൾ വ്യക്തമാക്കുന്നു. പിത്തരസം ഉൽ‌പാദിപ്പിക്കുന്നതിലൂടെ കാരറ്റ് കൊളസ്ട്രോൾ കുറയ്ക്കുകയും ശരീരത്തിൽ അടിഞ്ഞുകൂടുന്ന കൊഴുപ്പ് ആഗിരണം ചെയ്യുകയും ചെയ്യുന്നു. ഓറഞ്ച് നിറത്തിലുള്ള പച്ചക്കറികൾ കൂടുതൽ കഴിക്കുന്ന സ്ത്രീകളിൽ ഹൃദ്രോഗ സാധ്യത കുറയുന്നുവെന്ന് സമീപകാല ഗവേഷണങ്ങൾ പറയുന്നു.
ആരോഗ്യമുള്ള പല്ലുകളും മോണകളും: സാലഡുകളിൽ കാരറ്റ് ഉൾപ്പെടുത്തി കഴിക്കുന്നത് നിങ്ങളെ സംതൃപ്തരാക്കുക മാത്രമല്ല, മോണകളെയും പല്ലുകളെയും ദോഷകരമായ ബാക്ടീരിയകളിൽ നിന്ന് സംരക്ഷിക്കാനും സഹായിക്കുന്നു. കാരറ്റിലെ അവശ്യ പോഷകങ്ങളുടെ സാന്നിധ്യം പല്ലുകൾ നശിക്കുന്നത് തടയുന്നതിനും കറ നീക്കം ചെയ്യുന്നതിനും ഭക്ഷണത്തിനു ശേഷം ഫലകം രൂപപ്പെടുന്നതിൽ നിന്ന് രക്ഷപ്പെടുന്നതിനും സഹായിക്കുന്നു. കൂടാതെ, വായയിലെ മോശം അണുക്കളെ നീക്കം ചെയ്ത് വായയുടെ നല്ല ശുചിത്വം പാലിക്കുന്നതിനും ഇത് വളരെയേറെ ഗുണം ചെയ്യുന്നു.
ക്യാൻസറിനെ പ്രതിരോധിക്കുന്നു: കാരറ്റിലെ കരോട്ടിനോയിഡുകൾ രക്താർബുദത്തിനെതിരെ പോരാടുന്നതിനും ക്യാൻസർ വരാനുള്ള സാധ്യത കുറയ്ക്കുന്നതിനും സഹായിക്കുന്നുവെന്ന് നിരവധി പഠനങ്ങൾ തെളിയിച്ചിട്ടുണ്ട്. ഒരു പഠനമനുസരിച്ച്, സ്തനാർബുദത്തിന്റെ കുടുംബചരിത്രമുള്ള സ്ത്രീകൾ ദിവസവും കാരറ്റ് ജ്യൂസുകൾ കുടിച്ചതിലൂടെ, ഏതെങ്കിലും തരത്തിലുള്ള കാൻസർ കോശങ്ങൾ ഉണ്ടാകുന്നതിനെതിരെ ടിഷ്യുകൾ സംരക്ഷിക്കാൻ അവരെ സഹായിച്ചു എന്ന് വെളിപ്പെട്ടിട്ടുണ്ട്.
ആരോഗ്യമുള്ള മുടിയും ചർമ്മവും: ഒരു ദിവസം ഒരു കാരറ്റ് വീതം കഴിക്കുന്നത് ചർമ്മത്തെ മൃദുവായും ആരോഗ്യത്തോടെയും നിലനിർത്തും, കാരണം ഇത് നിർജ്ജലീകരണം തടയുന്നു. അതിലൂടെ ചർമ്മത്തെ ഫലപ്രദമായി സംരക്ഷിക്കുന്നു. കാരറ്റിന്റെ സമ്പന്നമായ പോഷക ഗുണങ്ങൾ നിങ്ങളുടെ ചർമ്മകോശങ്ങളെ ദോഷകരമായ അൾട്രാവയലറ്റ് രശ്മികളിൽ നിന്ന് സംരക്ഷിക്കുന്നു. ചർമ്മത്തെ കൂടുതൽ യുവത്വവും തിളക്കവും ഉള്ളതാക്കാൻ ഇത് കൊണ്ട് വീട്ടിൽ തന്നെ ഒരു ഫേഷ്യൽ മാസ്ക് തയ്യാറാക്കി നിങ്ങൾക്ക് ഉപയോഗിക്കാം. കൂടാതെ, കാരറ്റിലെ പോഷകങ്ങൾ മുടി കൊഴിച്ചിലിനെ പ്രതിരോധിക്കാനും മുടിയുടെ കോശങ്ങളെ പുനഃസ്ഥാപിക്കാനും സഹായിക്കുന്നു.
