മലബന്ധം ഒരു ചെറിയ പ്രശ്നമല്ല. മാനസികമായും ശാരീരികമായും പ്രയാസമുണ്ടാക്കുന്ന ഒന്നാണ് അത്. ചിലരിൽ ഈ അവസ്ഥ ദീർഘകാലം നിലനിൽക്കാറുണ്ട്. മിക്കവരിലും ഭക്ഷണ രീതി തന്നെയാണ് അതിെൻറ കാരണവും. പലരും ഇത് മറികടക്കാൻ പല മരുന്നുകളും ഉപയോഗിക്കാറുണ്ടെങ്കിലും അതിൽ മിക്കതും ഫലപ്രദമാകാറില്ല എന്നതാണ് സത്യം. ഇത് അസാധാരണമായ ഒരു അസുഖമൊന്നുമല്ല, തികച്ചും സാധാരണമായ ഒരു ശാരീരികാവസ്ഥയാണ്. എന്നാൽ അവഗണിച്ചാൽ പല തരത്തിലുള്ള അസുഖങ്ങളിലെയ്ക്കും ഇത് വഴി വെയ്ക്കും.
ആരോഗ്യ വിദഗ്ധരുടെ അഭിപ്രായ പ്രകാരം ആഴ്ചയിൽ മൂന്നോ, അതിൽ കുറവോ മാത്രമേ മലവിസർജ്ജനം നടക്കുന്നുള്ളൂ എങ്കിൽ അതിനെ മലബന്ധം എന്ന് നിർവചിക്കാം. എന്നാൽ ഇന്ത്യയിലെ അവസ്ഥയിൽ ഇതിന് മറ്റൊരു നിർവചനമാണുള്ളത്. ഇവിടെ എത്രതവണ മല വിസർജ്ജനം നടക്കുന്നു എന്ന കണക്ക് ആരോഗ്യവിദഗ്ധർ കണക്കിലെടുക്കുന്നില്ല. പകരം ഇതുമായി ബന്ധശപ്പട്ടുണ്ടാകുന്ന അസ്വസ്ഥതകളും അസുഖങ്ങളുമാണ് കൂടുതൽ കാര്യമായി എടുക്കുന്നത്. വിട്ടുമാറാത്ത മലബന്ധം ബാധിച്ച രോഗികളിൽ ഉണ്ടാകുന്ന അവസ്ഥ എന്നിവയാണ് കൂടുതലായി പരിഗണിയ്ക്കുന്നത്.
ഒരാൾക്ക് മലബന്ധം അനുഭവപ്പെടാൻ നിരവധി കാരണങ്ങളുണ്ട്. ഹൈപ്പോതൈറോയിഡിസം, കോശജ്വലന മലവിസർജ്ജനം, മരുന്നുകൾ, വേദനസംഹാരികൾ, ആൻറി ഡിപ്രസൻറുകൾ മറ്റ് ഘടകങ്ങൾ എന്നിവ മൂലം ഇത് സംഭവിക്കാം. ചില ഭക്ഷണങ്ങൾ ഗ്യാസ്ട്രൈറ്റിസ്, വയറുവേദന അല്ലെങ്കിൽ മറ്റ് അസ്വസ്ഥതകൾ എന്നിവ ഉണ്ടാക്കാം. എന്നാൽ നമ്മളിൽ മിക്കവർക്കും ഈ പ്രശ്നം സംഭവിക്കുന്നത് നമ്മൾ കഴിക്കുന്ന ഭക്ഷണം കാരണമാണ് എന്നതാണ് യാഥാർഥ്യം. നമ്മുടെ ഭക്ഷണത്തിലെ സാധനങ്ങളും ഭക്ഷണരീതിയും വിവേകപൂർവ്വം മാറ്റുകയാണെങ്കിൽ, ദഹന പ്രക്രിയ സുഖമമാക്കി അതുവഴി മലബന്ധം ഒഴിവാക്കാൻ കഴിയും.
മലബന്ധം ലഘൂകരിക്കുന്നതിനുള്ള ചില നുറുങ്ങ് വിദ്യകൾ ഉണ്ട്. അവ എന്തൊക്കെയാണെന്ന് നോക്കാം.
1.വെള്ളം
ആവശ്യത്തിന് വെള്ളം കുടിക്കുന്നുണ്ട് എന്ന് ഉറപ്പാക്കുക. മലബന്ധം ലഘൂകരിക്കുന്നതിനുള്ള ആദ്യപടിയാണ് ഇത്. ദിവസം മുഴുവൻ ധാരാളം വെള്ളം കുടിക്കണം. ഉയർന്ന ഫൈബർ ഭക്ഷണം കഴിക്കുന്ന ആളാണെങ്കിൽ പ്രത്യേകിച്ചും. ഒരു ഗ്ലാസ് ചൂടുവെള്ളം കുടിച്ചു കൊണ്ട് എല്ലാ ദിവസവും ആരംഭിക്കുക. നന്നായി ജലാംശം ഉള്ള ശരീരം മലവിസർജ്ജനത്തെ നല്ല രീതിയിൽ സ്വാധീനിക്കുകയും അത് സുഗമവും പതിവായി നല്ല അളവിൽ ആക്കുകയും ചെയ്യും.
2.തൈര്
തൈരും പ്രോബയോടിക്കുകളും ധാരാളം കഴിക്കുക. തൈര്, യോഗർട്ട്, പ്രോബയോട്ടിക് പാൽ, ബട്ടർ മിൽക്ക് തുടങ്ങിയവയിൽ ആരോഗ്യകരമായ ബാക്ടീരിയകൾ അടങ്ങിയിട്ടുണ്ട്. ആരോഗ്യകരമായ മൈക്രോബയോം അല്ലെങ്കിൽ കുടലിലെ നല്ല അവസ്ഥ നിലനിർത്താൻ 2-3 കപ്പ് ഫുൾ തൈര് സഹായിക്കും. എന്നാൽ ഇത് കഴിക്കും മുമ്പ് അലർജിക്ക് കാരണമാകാൻ സാധ്യത ഉണ്ടോ എന്ന് പരിശോധിയ്ക്കേണ്ടത് ആവശ്യമാണ്.
3.അധികം പഴുക്കാത്ത വാഴപ്പഴം
അധികം പഴുക്കാത്ത വാഴപ്പഴം വേവിച്ച് കഴിക്കുന്നത് വയറിന് വളരെ നല്ലതാണ്. ഉപ്പ്, കുരുമുളകുപൊടി, കറുവപ്പട്ട എന്നിവയെല്ലാം ചേർത്ത് പഴം കഷ്ണങ്ങളാക്കി കഴിക്കാം. അല്ലെങ്കിൽ വെറുതെ കഴിക്കുകയും ചെയ്യാം. വേണമെങ്കിൽ അൽപം അളവിൽ മാത്രം മധുരം ചേർക്കുകയും ആവാം. പഴുക്കാത്ത പഴങ്ങളിൽ നല്ല അളവിൽ നാരുകളുണ്ട് എന്നതു തന്നെയാണ് ഇതിനെ വയറിന് നല്ല ആഹാരമാക്കി നിർത്തുന്നത്.
4.തവിട് അടങ്ങിയ ഗോതമ്പുകൊണ്ടുള്ള ഭക്ഷണം
പല രീതിയിൽ തവിടടങ്ങിയ ഗാതമ്പ് ഉപയോഗിച്ച് ഭക്ഷണം തയാറാക്കി കഴിക്കാം. ഒന്നുകിൽ കഞ്ഞി ഉണ്ടാക്കാം. അതല്ലെങ്കിൽ അൽപം മധുരം ചേർത്തോ അല്ലാതെയോ കഴിക്കാം. ഇതിൽ ഫൈബർ ഘടകങ്ങൾ ധാരാളമായി അടങ്ങിയിട്ടുണ്ട്. അതിനാൽ ശരിയായ ദഹനത്തിന് ഇത് സഹായിക്കുകയും മലബന്ധം ഒഴിവാക്കാൻ കാരമണാവുകയും ചെയ്യും. കുടലിലെ വസ്തുക്കൾ നീക്കം ചെയ്യാൻ ഇത് സഹായിക്കും. പ്രഭാതഭക്ഷണത്തിൽ ഈ വിഭവം ഉൾപെടുത്തിയാൽ അത് വയറിന് വളരെ നല്ലതാണ്. മാത്രമല്ല പോഷകത്തിന്റെ അളവ് നല്ല രീതിയിൽ ഉണ്ടെങ്കിലും ശരീരഭാരം കുറയ്ക്കാനും ഇത് സഹായിക്കും.
5.ഉണക്കിയെടുത്ത പ്ലം പഴം
സലാഡുകൾ, ധാന്യങ്ങൾ, സ്മൂത്തികൾ, പായസങ്ങൾ എന്നിവയിൽ അൽപ്പം ഉണക്കിയെടുത്ത പ്ലം പഴങ്ങൾ ചേർത്താൽ അത് വളരെയേറെ ഗുണങ്ങൾ നൽകും. സമൃദ്ധമായ പോഷകാഹാരവും ഉയർന്ന ഫൈബർ അടങ്ങിയതും ആണ് പ്ലം പഴങ്ങൾ. സ്വാഭാവിക പോഷക സമ്പുഷ്ടതയ്ക്കും പ്ലം പേരു കേട്ട ഒന്നാണ്. കഴിക്കുന്ന മിക്ക വിഭവങ്ങളിലും ചേർക്കാവുന്ന ഒന്നുകൂടിയാണ് ഈ ഘടകം എന്നതിനാൽ സാധ്യതയും കൂടുന്നു. മലബന്ധം ലഘൂകരിക്കാൻ മികച്ച മാർഗങ്ങളിൽ ഒന്ന് കൂടിയാണിത്.
6. ദിവസവും ഒരു ആപ്പിൾ
ആപ്പിളിൽ ഫൈബർ അടങ്ങിയിട്ടുണ്ട്. പക്ഷേ പലരും ആപ്പിൾ തൊലി കളഞ്ഞ് കഴിക്കുന്നതാണ് കാണാറുള്ളത്. അങ്ങനെ കഴിക്കരുത്. പെക്റ്റിൻ എന്ന ഘടകം അടങ്ങിയിരിക്കുന്ന ആപ്പിൾ തൊലി വളരെ നല്ലതാണ്. കുടലിൽ, പെക്റ്റിൻ ബാക്ടീരിയകൾ വേഗത്തിൽ പുളിപ്പിച്ച് ഷോർട്ട് ചെയിൻ ഫാറ്റി ആസിഡുകൾ ഉണ്ടാക്കുന്നു. ഇത് വൻകുടലിലെ വിസർജ്യ വസ്തുക്കളുടെ കട്ടി കുറയ്ക്കുകയും കുടലിലെ തടസ്സങ്ങൾ കുറയ്ക്കുകയും ചെയ്യുന്നു. ദൈനംദിന ഭക്ഷണത്തിൽ ഉൾപ്പെടുത്താവുന്ന മറ്റ് പഴങ്ങളാണ് പിയേഴ്സ്, അത്തിപ്പഴം, കിവി പഴങ്ങൾ, അവോക്കാഡോ മുതലായവ. ഇവയെല്ലാം പോഷക സാന്ദ്രതയുള്ളതും കലോറി കുറവുള്ളതും നാരുകളാൽ സമ്പുഷ്ടവുമാണ്.
7. പാലും നെയ്യും
രാത്രി ഉറങ്ങുന്നതിന് മുമ്പ് ഒരു കപ്പ് ചൂടുള്ള പാലിൽ ഒന്നോ രണ്ടോ ടീസ്പൂൺ നെയ്യ് ചേർത്ത് കഴിക്കുന്നത് മലബന്ധം ഒഴിവാക്കാനുള്ള ഫലപ്രദവും മികച്ചതുമായ ഒരു മാർഗമാണ്. വാതം, പിത്തം എന്നിവക്കെതിരെയും ഇവ പ്രവർത്തിക്കും. പക്ഷേ കഫത്തിന്റെ പ്രശ്നങ്ങൾ ഉള്ളവർ ഇത് ഒഴിവാക്കുന്നതാകും നല്ലത്.
ഉയർന്ന ഫൈബർ അടങ്ങിയ ഭക്ഷണം വയറിന് വളരെ നല്ലതാണ്. അത് ദഹന പ്രക്രിയ സുഖമമാക്കുകയും മലവിസർജ്ജനം ഉത്തേജിപ്പിക്കുകയും ചെയ്യും. എന്നിരുന്നാലും, ചില ആളുകളിൽ, ഉയർന്ന ഫൈബർ ഭക്ഷണക്രമം മലബന്ധം വഷളാക്കാറുമുണ്ട്. അതിനാൽ ഡോക്ടറുമായി ആലോചിക്കാതെ ഇത്തരത്തിലുള്ള തിരഞ്ഞെടുപ്പുകൾ വേണ്ട എന്നതാണ് വിദഗ്ധ അഭിപ്രായം.
