ചുവന്ന രക്താണുക്കളില്‍ ഹീമോഗ്ലോബിന്‍ അടങ്ങിയിട്ടുണ്ട്, ഇത് ഓക്‌സിജന്‍ വഹിക്കുന്ന പ്രോട്ടീനാണ്, ഇത് രക്തത്തിന് ചുവപ്പ് നിറം നല്‍കുന്നു. ചുവന്ന രക്താണുക്കള്‍ സ്വാഭാവികമായി വിഘടിക്കുകയും മഞ്ഞകലര്‍ന്ന പിഗ്മെന്റായ ബിലിറുബിന്‍ രൂപപ്പെടുകയും ചെയ്യുന്നു. സാധാരണയായി, കരള്‍ രക്തത്തില്‍ നിന്ന് ബിലിറുബിന്‍ നീക്കം ചെയ്യുകയും മൂത്രത്തിലൂടെയോ മലത്തിലൂടെയോ ശരീരത്തില്‍ നിന്ന് പുറത്തുവിടുകയും ചെയ്യുന്നു. കരള്‍ ഇത് നീക്കം ചെയ്യുന്നതില്‍ പരാജയപ്പെടുമ്പോള്‍, ശരീരത്തില്‍ ബിലിറുബിന്റെ അളവ് വര്‍ദ്ധിക്കുകയും മഞ്ഞപ്പിത്തം ഉണ്ടാകുകയും ചെയ്യുന്നു.
നവജാത ശിശുക്കളിലും മഞ്ഞപ്പിത്തം കൂടുതലായി കണ്ടുവരുന്നു. നവജാത ശിശുക്കളിലെ മഞ്ഞപ്പിത്തം വളരെയധികം ശ്രദ്ധ നല്‍കേണ്ട ഒന്നാണ്. ജനിച്ച് 3 ദിവസത്തിന് ശേഷമാണ് കുഞ്ഞുങ്ങളില്‍ പൊതുവെ ഈ അസുഖത്തിന്റെ ലക്ഷണങ്ങള്‍ കാണുന്നത്. 2 മുതല്‍ 3 ആഴ്ച വരെ ഇത് തുടരാന്‍ സാധ്യതയുണ്ട്. നവജാത ശിശുക്കളില്‍ സാധാരണയായി കണ്ടുവരുന്ന മഞ്ഞപ്പിത്തത്തിന്റെ ലക്ഷണങ്ങള്‍ ഇവയാണ്.
1.സാധാരണയായി മുഖത്ത് നിന്ന് തുടങ്ങുന്ന മഞ്ഞ നിറത്തിലുള്ള ചര്‍മ്മം പിന്നീട് നെഞ്ചിലേക്കും വയറിലേക്കും വ്യാപിക്കുന്നു.
2.കണ്ണുകളുടെ വെളുത്ത സ്ഥലത്ത്, വായയ്ക്കുള്ളില്‍, പാദങ്ങളില്‍, കൈപ്പത്തികളില്‍ മഞ്ഞ നിറത്തിലുള്ള പിഗ്മെന്റേഷന്‍ പടരുന്നു.
3.വിരല്‍ ഉപയോഗിച്ച് ചര്‍മ്മത്തില്‍ സമ്മര്‍ദ്ദം ചെലുത്തുമ്പോള്‍ മഞ്ഞ പിഗ്മെന്റേഷന്‍ വര്‍ദ്ധിക്കുന്നു.
4.കടും മഞ്ഞ നിറത്തിലുള്ള മൂത്രവും മലവും.
5.മുഴുവന്‍ സമയവും ഉറങ്ങുന്നു.
കുഞ്ഞുങ്ങള്‍ ജനിക്കുമ്പോള്‍ ചുവന്ന രക്താണുക്കള്‍ അവരുടെ ശരീരത്തില്‍ വളരെ കൂടുതലായിരിക്കും. ഇത് അധിക ബിലിറുബിനെ പുറന്തള്ളുന്നത് തടയുന്നു. നവജാതശിശുവിന്റെ കരള്‍ ബിലിറുബിന്‍ പ്രോസസ്സ് ചെയ്യാനും രക്തത്തില്‍ നിന്ന് നീക്കം ചെയ്യാനും പാകമാകാത്തതിനാല്‍ കുഞ്ഞിന് മഞ്ഞപ്പിത്തം ഉണ്ടാകുന്നു. അധിക ബിലിറുബിന്‍ ചര്‍മ്മത്തില്‍ സ്ഥിരതാമസമാക്കുകയും മഞ്ഞപ്പിത്ത സമയത്ത് മഞ്ഞനിറം പ്രത്യക്ഷപ്പെടുകയും ചെയ്യുന്നു. ഇത് കൂടാതെയുള്ള മറ്റ് ചില കാരണങ്ങളില്‍ ഇവ ഉള്‍പ്പെടുന്നു.
1.കുടലിലെ അണുബാധ അല്ലെങ്കില്‍ തടസ്സം
2.മൂത്രനാളിയിലെ അണുബാധ
3.പിത്തരസം അല്ലെങ്കില്‍ പിത്തസഞ്ചിയിലെ തടസ്സം
4.തൈറോയ്ഡ് ഹോര്‍മോണിന്റെ കുറവ് (ഹൈപ്പോതൈറോയിഡിസം)
5.രക്തഗ്രൂപ്പ് പൊരുത്തക്കേട് (അമ്മയ്ക്കും കുഞ്ഞിനും വ്യത്യസ്ത രക്തഗ്രൂപ്പുകള്‍ ഉണ്ട്)
6.റിസസ് ഫാക്ടര്‍ രോഗം (അമ്മയ്ക്ക് നെഗറ്റീവ് രക്തവും കുഞ്ഞിന് പോസിറ്റീവ് രക്തവും ഉള്ള അവസ്ഥ)
7.സങ്കീര്‍ണ്ണമായ പ്രസവ സമയത്ത് ചതവ് അല്ലെങ്കില്‍ മറ്റേതെങ്കിലും പരിക്കുകള്‍
8.ക്രിഗ്ലര്‍-നജ്ജാര്‍ സിന്‍ഡ്രോം അല്ലെങ്കില്‍ ഗില്‍ബെര്‍ട്ട് സിന്‍ഡ്രോം പോലുള്ള ബിലിറുബിന്‍ പ്രോസസ്സ് ചെയ്യുന്ന എന്‍സൈമിനെ ബാധിക്കുന്ന രോഗങ്ങള്‍
9.കരള്‍ രോഗങ്ങള്‍.
നവജാതശിശുക്കള്‍ക്ക് രക്തത്തില്‍ ബിലിറുബിന്റെ അളവ് വളരെ ഉയര്‍ന്നതാണെങ്കില്‍ മാത്രമേ വൈദ്യചികിത്സ ആവശ്യമുള്ളൂ. സാധാരണയായി മഞ്ഞപ്പിത്തം 2 ആഴ്ചയ്ക്കുള്ളില്‍ സ്വയം പരിഹരിക്കപ്പെടും. മഞ്ഞപ്പിത്തം വഷളാകുകയോ 2 ആഴ്ചയില്‍ കൂടുതല്‍ തുടരുകയോ ചെയ്താല്‍, കുഞ്ഞിന്റെ രക്തത്തിലെ ബിലിറുബിന്റെ അളവ് നിര്‍ണ്ണയിക്കാന്‍ ഡോക്ടറിന്റെ നിര്‍ദേശത്തോടെ രക്തപരിശോധന നടത്താം. ഫോട്ടോതെറാപ്പിയും ബ്ലഡ് ട്രാന്‍സ്ഫ്യൂഷനുമാണ് ഇതിനുള്ള ചികിത്സകള്‍.
ഫോട്ടോതെറാപ്പി ചെയ്യുമ്പോ കുഞ്ഞിനെ ഒരു ഡയപ്പറും പ്രത്യേക പരിരക്ഷയുള്ള കണ്ണടകളും മാത്രം ധരിപ്പിച്ചു നീല സ്‌പെക്ട്രത്തിന്റെ വെളിച്ചത്തിനു താഴെ ഒരു പ്രത്യേക കിടക്കയില്‍ കിടത്തും, ഒരു ഫൈബര്‍-ഒപ്റ്റിക് പുതപ്പ് ശിശുവിന് നല്‍കുന്നതാണ്. ഗുരുതരമായ അവസ്ഥയിലാണ് കുഞ്ഞെങ്കില്‍, ട്രാന്‍സ്ഫ്യൂഷന്‍ എന്ന ചികിത്സയാണു സ്വീകരിക്കേണ്ടി വരുക. രക്തബാങ്കില്‍ നിന്ന് കുഞ്ഞിന് ചെറിയ അളവിലുള്ള രക്തം നൽകേണ്ടതായി വരുന്നു.
