മുമ്പ് പ്രായമായ ആളുകളിൽ മാത്രം കണ്ടുവന്നിരുന്ന ഒരു ആരോഗ്യപ്രശ്നമായിരുന്നു കൊളസ്ട്രോൾ. എന്നാൽ ഇപ്പോഴുള്ള നമ്മുടെ ജീവിതശൈലി മാറ്റങ്ങൾ കാരണം ചെറുപ്പക്കാരായ യുവതി യുവാക്കളിൽ സാധാരണയായി കണ്ടുവരുന്ന പ്രധാന രോഗലക്ഷണങ്ങളിൽ ഒന്നായി മാറി കഴിഞ്ഞിരിക്കുന്നു കൊളസ്ട്രോൾ.
എല്ലാത്തരം കൊളസ്ട്രോളും ശരീരത്തിന് മോശം വരുത്തുന്നതല്ല. HDL അഥവാ നല്ല കൊളസ്ട്രോൾ ഒരാളുടെ ആരോഗ്യത്തിന് നല്ലതാണ്. എന്നാൽ ലോ ഡെൻസിറ്റി ലിപ്പോപ്രോട്ടീൻ (LDL) അഥവാ മോശം കൊളസ്ട്രോൾ രക്തത്തിൽ ഉയരുന്നത് മൂലം ഹൃദ്രോഗമുണ്ടാകാനുള്ള സാധ്യത വർദ്ധിക്കുന്നു. ഒരാളുടെ ശരീരം ആരോഗ്യത്തോടെ നിലനിർത്തണമെങ്കിൽ LDL കൊളസ്ട്രോൾ താഴ്ന്ന നിലയിലായിരിക്കണം. മധ്യവയസ്സിലെത്തിയവരിലെ കൊളസ്ട്രോൾ നില ഉയരുന്നത് മാത്രമാണ് ഹൃദ്രോഗത്തിലേക്ക് നയിക്കുന്നത് എന്നും, 20 നും 30 നും ഇടയിൽ പ്രായമുള്ള യുവാക്കളൊന്നും തന്നെ ഇക്കാര്യത്തിൽ ഭയപ്പെടേണ്ടതില്ല എന്നുമായിരുന്നു ഇതുവരെയുള്ള പഠനങ്ങളിൽ പറഞ്ഞിരുന്നത്. എന്നാൽ അമേരിക്കൻ കോളേജ് ഓഫ് കാർഡിയോളജി നടത്തിയ പുതിയ പഠനങ്ങൾ ഇതിനു വിപരീതമായ ഫലങ്ങളെ ചൂണ്ടിക്കാണിക്കുന്നു. കൗമാരപ്രായത്തിലോ, ഇരുപതുകളിലോ എൽഡിഎൽ കൊളസ്ട്രോളിൻ്റെ അളവ് ശരീരത്തിൽ ഉയരുന്നത് വഴി കാലക്രമേണ ഹൃദ്രോഗമുണ്ടാകാനുള്ള സാധ്യത കൂടുതലായി മാറുമെന്ന് ഈ പഠനത്തിൽ പറയുന്നു.
അതുകൊണ്ടുതന്നെ ഇത്തരത്തിൽ ഹൃദ്രോഗലക്ഷണങ്ങളെ പ്രതിരോധിക്കാനും ഉയർന്ന കൊളസ്ട്രോളിനെതിരെ പ്രതിരോധ നടപടികൾ സ്വീകരിക്കാനുമായി ചെറുപ്പത്തിൽത്തന്നെ ആവശ്യമായ നടപടികൾ സ്വീകരിക്കേണ്ടത് പ്രധാനമാണ്. ഉയർന്ന കൊളസ്ട്രോൾ സാധ്യതയെ പ്രതിരോധിക്കാൻ ശ്രദ്ധിക്കേണ്ട കാര്യങ്ങൾ എന്തൊക്കെയെന്ന് നോക്കാം.
1.വ്യായാമം ശീലമാക്കാം
എല്ലാ ദിവസവും കുറഞ്ഞത് 30 മിനിറ്റ് നേരമെങ്കിലും മിതമായതും ഊർജ്ജസ്വലവുമായ വ്യായമ പ്രവർത്തനങ്ങൾ നടത്തുകയും നമ്മുടെ ശരീരത്തിൽ നിന്ന് അധിക കൊഴുപ്പുകളെ ചൊരിഞ്ഞു കളയുകയും ചെയ്യുക. ശരീരത്തിലെ അമിതമായ കൊളസ്ട്രോൾ നിലയെ ഒഴിവാക്കിക്കൊണ്ട് നിയന്ത്രിച്ചുനിർത്താൻ ഏറ്റവും നല്ല മാർഗമാണ് വ്യായാമം.
2.ചില ഭക്ഷണങ്ങൾ ഒഴിവാക്കുക
പൂരിത കൊഴുപ്പുകളും ട്രാൻസ് ഫാറ്റുകളും നമ്മുടെആരോഗ്യത്തിന് ദോഷകരമായി ഭവിക്കുന്നതാണ്. ഇത് ശരീരത്തിൽ എൽഡിഎൽ അളവ് വർദ്ധിപ്പിക്കുന്നതിന് കാരണമാകുന്നു. മോണോസാച്ചുറേറ്റഡ് കൊഴുപ്പുകളും, ഒമേഗ 3 ഫാറ്റി ആസിഡുകൾ പോലുള്ള പോളിഅൺസാച്ചുറേറ്റഡ് കൊഴുപ്പുകളും അടങ്ങിയ ഭക്ഷണക്രമങ്ങൾ HDL കൊഴുപ്പുകളെ വർദ്ധിപ്പിക്കുന്നു. ഇത് നമ്മുടെ ഹൃദയാരോഗ്യത്തിന് ഗുണം ചെയ്യുന്നു. ശരീരത്തിലെ LDL കൊളസ്ട്രോളിൻ്റെ അളവ് കുറയ്ക്കാനും ഇത്തരം ഭക്ഷണങ്ങൾ സഹായിക്കുന്നു. വറുത്തതും പൊരിച്ചതുമായ ഭക്ഷണങ്ങൾ കഴിവതും ഒഴിവാക്കിക്കൊണ്ട് മത്സ്യം, ഒലിവ്, നട്സുകൾ, വിത്ത്, തുടങ്ങിയ ആരോഗ്യകരമായ കൊഴുപ്പുകൾ നൽകുന്ന ഭക്ഷണങ്ങൾ കൂടുതലും കഴിക്കുക.
3.ഫൈബർ അടങ്ങിയ ഭക്ഷണങ്ങൾ കഴിക്കുക
കൊളസ്ട്രോൾ നിയന്ത്രണത്തിൽ കൊണ്ടുവരണമെങ്കിൽ ഭക്ഷണശീലത്തിൽ ശ്രദ്ധ നൽകേണ്ടതുണ്ട്. ഫൈബർ ധാരാളം അടങ്ങിയ ഭക്ഷണങ്ങൾ ആഹാരക്രമത്തിൽ ഉൾപ്പെടുത്തുക. പഴങ്ങൾ, പച്ചക്കറികൾ, ധാന്യങ്ങൾ, നട്സുകൾ, വിത്തുകൾ തുടങ്ങിയവയെല്ലാം നാരുകളാൽ സമൃദ്ധമാണ്. എൽഡിഎൽ കൊളസ്ട്രോളിൻ്റെ അളവ് കുറയ്ക്കുന്ന ഡയബറി സമ്പുഷ്ടമായ ഡയറ്റിൽ ഉൾപ്പെടുന്ന ഭക്ഷണങ്ങൾ ആണിവയൊക്കെ. ദിവസവും കുറഞ്ഞത് അഞ്ച് പഴങ്ങളും പച്ചക്കറികളും കഴിക്കുക, ധാന്യങ്ങൾ, നട്സ്, വിത്തുകൾ എന്നിവ ഭക്ഷണത്തിൽ ഉൾപ്പെടുത്തുകയും ചെയ്യുക.
4.പുകവലി ഉപേക്ഷിക്കുക
പുകവലി ശ്വാസകോശത്തിൻ്റെ ആരോഗ്യത്തെ മാത്രം ബാധിക്കുന്നതല്ല. ഈയൊരു ദുശ്ശീലം നമ്മുടെ ശരീരത്തിലെ എച്ച്ഡിഎൽ നില കുറച്ചുകൊണ്ട് ആരോഗ്യ പ്രശ്നങ്ങൾ സൃഷ്ടിക്കാൻ വഴിയൊരുക്കുന്നതാണെന്ന് പഠനങ്ങൾ തെളിയിച്ചിട്ടുണ്ട്. അമിതമായി പുകവലിക്കുന്ന ആളുകളുടെ ഹൃദയ ധമനികൾ അടഞ്ഞുപോകാനുള്ള സാധ്യത കൂടുതലാണ്. ഇത് രക്തപ്രവാഹത്തിന് തടസ്സം സൃഷ്ടിച്ച് ഹൃദ്രോഗങ്ങളുടെ ഉയർന്ന അപകടസാധ്യത നൽകുന്നു. പുകവലി ഉപേക്ഷിക്കുന്നത് വഴി ക്രമേണ ഇത്തരം ആരോഗ്യ പ്രശ്‌നങ്ങളെല്ലാം കുറയ്ക്കാൻ സാധിക്കും.
നിയന്ത്രിച്ചാൽ നിയന്ത്രണ വിധേയമാകുന്ന ഒരു ആരോഗ്യ പ്രശ്നമാണ് കൊളസ്ട്രോൾ. അത് കൊണ്ട് ജീവിത ശൈലിയിൽ അല്പസ്വല്പ മാറ്റങ്ങൾ വരുത്തിയാൽ കൊളസ്ട്രോളിനെ നമുക്ക് തന്നെ സ്വയം പിടിച്ചുകെട്ടാം.
