കൊളസ്‌ട്രോള്‍ ഇന്നത്തെ കാലത്ത് പലരേയും അലട്ടുന്ന ഒന്നാണ്. ഇത് വേണ്ട രീതിയില്‍ നിയന്ത്രിച്ചു നിര്‍ത്തിയില്ലെങ്കില്‍ ഹൃദയത്തിലേയ്ക്കുള്ള രക്തപ്രവാഹം തന്നെ തടസപ്പെടുത്തി ഹാര്‍ട്ട് അറ്റാക്ക് സാധ്യത വര്‍ദ്ധിപ്പിയ്ക്കുന്ന ഒന്നാണ്. കൊളസ്‌ട്രോളിന് ജീവിതശൈലിയും ഒരു പരിധി വരെ പാരമ്പര്യവുമെല്ലാം കാരണമായി വരുന്നു. മാത്രമല്ല, വ്യായമക്കറുവ്, സ്‌ട്രെസ് എന്നിവയും ഇതില്‍ പെടും. ഭക്ഷണം ഒരു പ്രധാന ഘടകമാണ്. വറുത്തതും പൊരിച്ചതും അനാരോഗ്യകരമായ ചില ഭക്ഷണങ്ങളുമെല്ലാം തന്നെ ആരോഗ്യത്തെ ബാധിയ്ക്കുന്നവയാണ്. ഭക്ഷണങ്ങളുടെ കാര്യത്തില്‍ പ്രത്യേക ശ്രദ്ധ തന്നെ വേണമെന്നു വേണം, പറയുവാന്‍. ചില ഭക്ഷണങ്ങള്‍ കൊളസ്‌ട്രോള്‍ വര്‍ദ്ധിപ്പിയ്ക്കും, ചിലത് കുറയ്ക്കും. കുറയ്ക്കുന്ന ചില ഭക്ഷണങ്ങള്‍ തന്നെ ചില പ്രത്യേക രീതിയില്‍ കഴിച്ചാല്‍ മാത്രമേ ഗുണം ലഭിയ്ക്കൂ.
നമ്മുടെ ഭക്ഷണത്തില്‍ 20 ശതമാനം മാത്രമാണ് കൊഴുപ്പായി എത്തുന്നത്. ബാക്കി 80 ശതമാനവും ലിവര്‍ തന്നെ ഉല്‍പാദിപ്പിയ്ക്കുന്നു. ശരീരത്തില്‍ കാര്‍ബോഹൈഡ്രേറ്റുകള്‍ കൂടുതല്‍ എത്തുമ്പോള്‍ ഇവ ഊര്‍ജമാക്കി മാറ്റാതെ ഫാറ്റാക്കി മാറ്റി ശരീരത്തില്‍ സംഭരിയ്ക്കപ്പെടുന്നു. അതായത് പ്രമേഹത്തിന് മാത്രമല്ല, കൊളസ്‌ട്രോളിനും കാര്‍ബോഹൈഡ്രേറ്റ് കാരണമാകുന്നുവെന്നര്‍ത്ഥം. കൊളസ്‌ട്രോള്‍ കുറയണമെങ്കില്‍ പെട്ടെന്നു തന്നെ ശരീരത്തില്‍ അലിഞ്ഞു ചേരാത്ത, അതായത് പെട്ടെന്നു തന്നെ ദഹനം നടക്കാത്ത രീതിയിലെ ഭക്ഷണം കഴിയ്ക്കണം.
നാം പൊതുവേ പ്രാതലിന് ഇഡ്ഢലി, ദോശ, അപ്പം തുടങ്ങിയവ കഴിയ്ക്കുന്നവരാണ്. ഇവ ആരോഗ്യത്തിന് പൊതുവേ നല്ലതാണെന്നു കരുതുമ്പോഴും കൊളസ്‌ട്രോള്‍ പ്രശ്‌നത്തിന് അത്ര നല്ലതല്ലെന്നു വേണം, പറയുവാന്‍. ഇവ വെളുത്ത അരി കൊണ്ടുണ്ടാക്കുന്നുവയാണ്. കാര്‍ബോഹൈഡ്രേറ്റ് തോത് കൂടുതലാണ്. ഇവ പെട്ടെന്നു തന്നെ രക്തത്തിലെ ഗ്ലൂക്കോസ് തോത് വര്‍ദ്ധിപ്പിയ്ക്കും. പ്രമേഹത്തിനും കൊളസ്‌ട്രോളിനും ഇത് നല്ലതല്ല. മാത്രമല്ല, പെട്ടെന്നു തന്നെ വിശക്കുകയും ചെയ്യും. കൊളസ്‌ട്രോള്‍ ഉള്ളവര്‍ക്ക് ഗോതമ്പു ഭക്ഷണം നല്ലതാണ്. ചപ്പാത്തി, ആവിയില്‍ തയ്യാറാക്കുന്ന ഗോതമ്പു വിഭവങ്ങള്‍ എന്നിവ ഗുണം നല്‍കും. ഇതുപോലെ ഓട്‌സ് നല്ലതാണ്. എന്നാല്‍ ഓട്‌സ് കഴിയ്ക്കുന്ന രീതിയിലും കാര്യമുണ്ട്. ഓട്‌സ് കാച്ചിക്കഴിയ്ക്കുന്നത് പെട്ടെന്നു തന്നെ ശരീരത്തില്‍ ഗ്ലൈസമിക് ഇന്‍ഡെക്‌സ് കൂട്ടും . ഇത് പെട്ടെന്നു ദഹിയ്ക്കും. ഇതിനാല്‍ ഓട്‌സ് കൊണ്ട് പുട്ടോ, ഉപ്പുമാവോ കഴിയ്ക്കുന്നതാണു നല്ലത്.
നട്‌സില്‍ ബദാം കുതിര്‍ത്ത് തൊലി കളയാതെ ഇട നേരത്ത്, അതായത് രാവിലെ 11 മണിക്കു കഴിയ്ക്കുന്നത് നല്ലതാണ്. ചിലര്‍ക്ക് ഇട നേരത്ത് ചായ ശീലമുണ്ട്. ചായ പാല്‍ ചേ്ര്‍ക്കാതെ കഴിയ്ക്കാം. നാരങ്ങാനീരു ചേര്‍ത്തു കട്ടന്‍ ചായയോ ഗ്രീന്‍ ടീയോ കഴിയ്ക്കാം. ഇതല്ലെങ്കില്‍ ഒലീവ് ഓയില്‍ ചേര്‍ത്ത് സാലഡുകള്‍ കഴിയ്ക്കാം. ചായക്ക് പകരം മോരും വെള്ളം നല്ലൊരു വഴിയാണ്. ഗ്രീന്‍ ടീയില്‍ തേന്‍ ചേര്‍ത്താലും അത്ര നല്ലതല്ല. തേനും കാര്‍ബോഹൈഡ്രേറ്റാണ്.
ഉച്ചയ്ക്ക് അരി ഭക്ഷണം കഴിയ്ക്കണമെങ്കില്‍ തവിടു കളയാത്ത അരി കഴിയ്ക്കാം. കുത്തരി നല്ലതാണ്. ചമ്പാവരിയല്ല കുത്തരി. റെഡ് റൈസ് ആണിത്. ചുവന്ന നിറത്തിലെ അരിയാണിത്. ഇതിന്റെ കഞ്ഞി വെള്ളത്തിന് ചുവന്ന നിറമായിരിയ്ക്കും. ഈ ചോറിന് സാധാരണ അരിയുടെ രുചിയും കാണില്ല. എന്നാല്‍ ആരോഗ്യകരമാണ്. ചോറിന് ഒപ്പം പയര്‍ വര്‍ഗങ്ങളും കഴിക്കുക. ബീന്‍സ്, പയര്‍ വര്‍ഗങ്ങള്‍ നല്ലതാണ്. അത്യാവശ്യം ചിക്കന്‍, മീന്‍ എന്നിവയും കഴിയ്ക്കാം. എന്നാൽ ഷെല്‍ ഫിഷസ്, അതായത് ഞണ്ട്, ചെമ്മീന്‍ എന്നിവ കുറക്കുക. പകരം ചെറിയ മീനുകള്‍ ഉപയോഗിയ്ക്കാം. ശേഷം ഒരു കപ്പ് മോര് കുടിയ്ക്കാം.
രാത്രിയില്‍ ഫ്രൂട്‌സ് നല്ലതാണ്. ആറു മണിക്കു ശേഷം കഴിവതും ഭക്ഷണം കഴിയ്ക്കരുത്. ഇത് തടിയും വയറും കുറയ്ക്കാനും നല്ലതാണ്. പപ്പായ, പേരയ്ക്ക എന്നിവയെല്ലാം നല്ലതാണ്. തടിയും കൊള്‌സട്രോളുമായി പരസ്പര ബന്ധമുണ്ട്. തടിയെങ്കില്‍ കൊളസ്‌ട്രോള്‍ കൂടുന്നത് സാധാരണയാണ്. തടി കുറയ്ക്കുകയെന്നത് ലക്ഷ്യമെങ്കില്‍ രാത്രി ആറിനു ശേഷം കഴിവതും ഒന്നും കഴിയ്ക്കാതിരിയ്ക്കുക. ഭക്ഷണ ക്രമീകരണത്തോടൊപ്പം വ്യായാമവും ശീലമാക്കുക. ഇത് ഗുണം നല്‍കും. ഇതു പോലെ കൊളസ്‌ട്രോളിന് പരോക്ഷമായി സഹായിക്കുന്ന ഘടകമാണ് ജീവിത ശൈലിയും സ്‌ട്രെസുമെല്ലാം. മദ്യം കഴിയ്ക്കുന്നത് കൊളസ്‌ട്രോളിന് നല്ലതാണെന്ന് പറയും. എന്നാല്‍ അമിത മദ്യപാനം ദോഷം വരുത്തും. ഇതു പോലെ സ്‌ട്രെസ്, ഉറക്കക്കുറവ് എന്നിവയെല്ലാം തന്നെ കൊളസ്‌ട്രോളിന് കാരണമാകുന്ന ശീലങ്ങളാണ്.
എണ്ണയുടെ ഉപയോഗം കഴിവതും കുറയ്ക്കുക. ആരോഗ്യകരമായ എണ്ണ ഉപയോഗിയ്ക്കാം. ഒലീവ് ഓയില്‍ നല്ലതാണ്. ഇത് നല്ല കൊളസ്‌ട്രോള്‍ വര്‍ദ്ധിപ്പിയ്ക്കും. മോശം കൊളസ്‌ട്രോള്‍ കുറയ്ക്കും. എണ്ണയുടെ ഉപയോഗം മൂന്നു ടീസ്പൂണില്‍ കൂടുതലാകരുത്. തൊലി കളഞ്ഞ ചിക്കന്‍ ഉപയോഗിയ്ക്കാം. മത്സ്യം നല്ലതാണ്. വറുത്തു കഴിയ്ക്കുന്നത് കഴിവതും ഒഴിവാക്കുക. വറുത്തവയില്‍ ട്രാന്‍സ്ഫാറ്റുകള്‍ ധാരാളമുണ്ട്. പഞ്ചസാര, വെളുത്ത അരി, മൈദ എന്നിവ കുറയ്ക്കുക. മൈദ പോലുള്ളവ കഴിച്ചാല്‍ ഫൈബര്‍ ഒപ്പം കഴിയ്ക്കുക. അതായത് നാരുകളുള്ളവ. ഇതു പോലെ കിഴങ്ങു വര്‍ഗങ്ങള്‍ സ്‌റ്റോര്‍ഡ് കാര്‍ബോഹൈഡ്രേറ്റുകളാണ്. ഇത് ഒഴിവാക്കുക. ജ്യൂസ് ഒഴിവാക്കി കഴിവതും പഴ വര്‍ഗങ്ങള്‍ തന്നെ വേണം, കഴിയ്ക്കുവാന്‍.
അമിത കൊളെസ്ട്രോൾ പലപ്പോഴും ഗുരുതര ആരോഗ്യ പ്രശ്നങ്ങൾക്ക് വഴിവെക്കാറുണ്ട്. അതിനാൽ ജീവിതശൈലിയിൽ ചില മാറ്റങ്ങൾ വരുത്തി അമിത കൊളെസ്ട്രോളിനെ നിയന്ത്രിക്കേണ്ടത് അത്യാവശ്യമാണ്. ഇല്ലെങ്കിൽ ഒരുപക്ഷെ അത് നമ്മുടെ ജീവൻ തന്നെ ഭീഷണിയായേക്കാം.
