ആരോഗ്യമുള്ള ശരീരത്തിന്, പ്രത്യേകിച്ച് എല്ലുകളുടെ ആരോഗ്യത്തിനും ബലത്തിനും കാൽസ്യം അത്യാവശ്യമാണ്. ശരീരത്തിലെ കാൽസ്യത്തിന്റെ പ്രധാന സംഭരണ ഇടമാണ് അസ്ഥികൾ. കൂടാതെ മൊത്തത്തിലുള്ള ആരോഗ്യത്തിന് കാൽസ്യം ശരീരത്തിന് വളരെ പ്രധാനമാണ്, കാൽസ്യത്തിന്റെ അഭാവം ഒന്നിലധികം രോഗങ്ങളെ വിളിച്ചുവരുത്തുമെന്ന കാര്യത്തിൽ സംശയമില്ല. അതിനാൽ, ദൈനംദിന ഉപഭോഗം നിറവേറ്റുന്നതിനായി ദിനചര്യയിൽ ആവശ്യത്തിന് കാൽസ്യം അടങ്ങിയ ഭക്ഷണങ്ങൾ ഉൾപ്പെടുത്തുവാൻ ശ്രമിക്കേണ്ടതുണ്ട്. എന്നാൽ എല്ലാ പോഷകങ്ങളും സംബന്ധിച്ച ഏറ്റവും പ്രധാന കാര്യം, അവ ശരിയായ അളവിൽ, ശരിയായ സമയത്ത്, കഴിക്കുന്നതിൽ ഉറച്ചു നിൽക്കുന്നുവെന്ന് ഉറപ്പാക്കുക എന്നതാണ്.
ഏതാണ്ട് എല്ലാ പ്രായത്തിലുമുള്ള ആളുകളുടെ വളർച്ചയ്ക്ക് കാൽസ്യം വളരെ പ്രധാനമാണ്. കാൽസ്യം അടങ്ങിയ ഭക്ഷണം കഴിക്കുന്നത് കുറവാണെങ്കിൽ, അത് കുട്ടിക്കാലത്ത് ശരീരത്തിന്റെ വളർച്ച മന്ദഗതിയിലാക്കിയേക്കാം, കൊച്ചുകുട്ടികളിൽ ഇത് റിക്കറ്റിന് കാരണമായേക്കാം, കൂടാതെ ചെറുപ്പക്കാരായ സ്ത്രീകളിലോ മുലയൂട്ടുന്ന സ്ത്രീകളിലോ ഓസ്റ്റിയോമലാസിയയ്ക്ക് കാരണമാകാം. കൂടാതെ കാത്സ്യത്തിന്റെ കുറവ് പ്രായമായ രോഗികളിൽ അസ്ഥിക്ഷയം അഥവാ ഓസ്റ്റിയോപൊറോസിസിന് കാരണമായേക്കാം. അതിനാൽ, ആളുകളുടെ ശരീരത്തിന്റെ പൊതു ക്ഷേമത്തിൽ കാൽസ്യത്തിന് വളരെ നിർണായക പങ്കുണ്ട്.
എന്നാൽ കാൽസ്യം അമിതമായി കഴിക്കുന്നത് ശരീരത്തിന് പല വിധത്തിൽ ദോഷം ചെയ്യും. രക്തത്തിലെ കാൽസ്യത്തിന്റെ അളവ് സാധാരണ നിലയേക്കാൾ മുകളിലാവുമ്പോൾ, ഈ അവസ്ഥയെ ഹൈപ്പർകാൽസെമിയ എന്ന് വിളിക്കുന്നു. കാൽസ്യം അസ്ഥികൾക്ക് പ്രധാനമാണ്, എന്നാൽ അധിക അളവ് എല്ലുകളെ ദുർബലപ്പെടുത്തും. ഇവ കൂടാതെയുള്ള മറ്റ് പാർശ്വഫലങ്ങൾ എന്തൊക്കെയാണെന്ന് നോക്കാം.
1. കാൽസ്യം അമിതമായി കഴിക്കുന്നതിന്റെ ഏറ്റവും സാധാരണമായ പാർശ്വഫലങ്ങളിൽ ഒന്നാണ് മലബന്ധം.
2. അധിക കാൽസ്യം വൃക്കകളെ അത് അരിച്ചെടുക്കുന്നതിന് കഠിനമായി പ്രവർത്തിപ്പിക്കുന്നു. ഇത് അമിതമായ ദാഹത്തിനും ഇടയ്ക്കിടെ മൂത്രമൊഴിക്കുന്നതിനും കാരണമാകും.
3. അമിതമായി കാൽസ്യം കഴിക്കുകയാണെങ്കിൽ അസ്ഥി വേദനയും പേശി ബലഹീനതയും അനുഭവപ്പെടുന്നത് സാധാരണമാണ്.
4. അടിക്കടിയുള്ള തലവേദനയും ക്ഷീണവും കാൽസ്യത്തിന്റെ അമിതോപയോഗത്തിന്റെ അനന്തരഫലമാണ്.
5. ഹൈപ്പർകാൽസെമിയ മസ്തിഷ്കം എങ്ങനെ പ്രവർത്തിക്കുന്നു എന്നതിനെ പോലും തടസ്സപ്പെടുത്തുന്നു, ഇത് ആശയക്കുഴപ്പം, അലസത, ക്ഷീണം എന്നിവയ്ക്ക് കാരണമാകുന്നു.
6. അപൂർവ്വമായി, കഠിനമായ ഹൈപ്പർകാൽസെമിയ ഹൃദയത്തിന്റെ പ്രവർത്തനത്തെ തടസ്സപ്പെടുത്തുന്നു, ഇത് ഹൃദയമിടിപ്പിലെ വർദ്ധനവ്, ബോധക്ഷയം, ഹൃദയ താളം തെറ്റുന്നതിന്റെ സൂചനകൾ, മറ്റ് ഹൃദയ പ്രശ്നങ്ങൾ എന്നിവയ്ക്ക് കാരണമാകും.
പലർക്കും ഹൈപ്പർകാൽസെമിയയുടെ വ്യക്തമായ ലക്ഷണങ്ങൾ തിരിച്ചറിയില്ല, എന്നാൽ മേൽപ്പറഞ്ഞ ഈ ലക്ഷണങ്ങൾ ശരീരത്തിൽ കാൽസ്യം അളവ് ഉയർന്നതായിരിക്കുമെന്നതിനെ സൂചിപ്പിക്കുന്നു. അതിനാൽ മേൽപ്പറഞ്ഞ ലക്ഷണങ്ങൾ കണ്ടാൽ വൈദ്യ സഹായം തേടുന്നത് നല്ലതാണ്.
