നമ്മുടെ പൂർവ്വികർ വെള്ളം സൂക്ഷിക്കാൻ ചെമ്പ് പാത്രങ്ങൾ ഉപയോഗിക്കുമായിരുന്നു എന്ന് എത്ര പേർക്ക് അറിയാം. ഒരു ചെമ്പ് പാത്രത്തിൽ സൂക്ഷിക്കുന്ന കുടിവെള്ളം ആരോഗ്യത്തിന് ഗുണകരമാണെന്ന് പറയപ്പെടുന്നു. ആയുർ‌വേദം പറയുന്നത് പ്രകാരം, ഒരു ചെമ്പ് പാത്രത്തിൽ അല്ലെങ്കിൽ ഗ്ലാസിൽ സൂക്ഷിച്ചിരിക്കുന്ന വെള്ളം നാം കുടിച്ചാൽ, അത് നമ്മുടെ ശരീരത്തിലെ മൂന്ന് ദോഷങ്ങളെയും (അതായത് വാത, കഫ, പിത്ത ദോഷങ്ങളെ) സുഖപ്പെടുത്തും എന്നാണ്. ഒരു ചെമ്പ് പാത്രത്തിൽ വെള്ളം സൂക്ഷിക്കുന്നത് വെള്ളത്തിന്റെ പ്രകൃതിദത്ത ശുദ്ധീകരണ പ്രക്രിയ സൃഷ്ടിക്കുമെന്ന് വിശ്വസിക്കപ്പെടുന്നു. ആർ‌ഒ പ്യൂരിഫയറുകളും, വാട്ടർ ഫിൽ‌ട്ടറുകളും ഇപ്പോൾ വളരെയധികം പ്രചാരം നേടിയിരിക്കുന്നത് കാരണം, വെള്ളം സംഭരിക്കുന്നതിനുള്ള പഴയ രീതികളിൽ നിന്നും നമ്മൾ വളരെയധികം മുൻപോട്ട് പോയിരിക്കുന്നു. എന്നാൽ, പഴയ രീതികളെ പൂർണ്ണമായും അവഗണിക്കുന്നത് ശരിയല്ല.
മനുഷ്യശരീരത്തിന്റെ 70 ശതമാനവും വെള്ളം കൊണ്ടാണ് നിർമ്മിച്ചിരിക്കുന്നത്. ജീവൻ നിലനിർത്താൻ നമുക്ക് ആവശ്യമായ ഏറ്റവും പ്രധാനപ്പെട്ട ഘടകമാണ് വെള്ളം. ഒരു ചെമ്പ് പാത്രത്തിൽ വെള്ളം സൂക്ഷിക്കുന്നത് വെള്ളത്തിലുള്ള ശരീരത്തിന് ഹാനികരമായ എല്ലാ സൂക്ഷ്മാണുക്കളെയും, പൂപ്പൽ, ഫംഗസ്, ആൽഗ, ബാക്ടീരിയ എന്നിവയെയും നശിപ്പിക്കും, ഇത് വെള്ളം കുടിക്കാൻ തികച്ചും അനുയോജ്യമാക്കുന്നു. ഒരു രാത്രി മുഴുവനും, അല്ലെങ്കിൽ നാല് മണിക്കൂർ നേരം ഒരു ചെമ്പ് പാത്രത്തിൽ വെള്ളം സംഭരിക്കുകയാണെങ്കിൽ, ചെമ്പ് അയോണുകൾ ആ വെള്ളത്തിൽ ചെറിയ അളവിൽ അലിഞ്ഞു ചേരുന്നു, ഈ പ്രക്രിയയെ ഒളിഗോഡൈനാമിക് ഇഫക്റ്റ് എന്ന് വിളിക്കുന്നു. ആന്റിമൈക്രോബയൽ, ആന്റിഓക്‌സിഡന്റ്, ആൻറി കാർസിനോജെനിക്, ആൻറി-ഇൻഫ്ലമേറ്ററി എന്നിവ ഉൾപ്പെടെയുള്ള ഗുണങ്ങൾ ചെമ്പിലുണ്ട്. ഇത് വിഷവസ്തുക്കളെയും നിർവീര്യമാക്കും. മനുഷ്യന്റെ ആരോഗ്യത്തിന് അത്യാവശ്യമായ ഒരു ധാതുവാണ് ചെമ്പ്. ചെമ്പ് പാത്രത്തിൽ വെള്ളം സൂക്ഷിക്കുന്നതിലൂടെ ലഭിക്കുന്ന ആരോഗ്യ ഗുണങ്ങൾ എന്തൊക്കെയെന്ന് നോക്കാം.
1.ആരോഗ്യമുള്ള ഹൃദയം
രക്തസമ്മർദ്ദം, അമിതമായ ഹൃദയമിടിപ്പ്, മോശം കൊളസ്ട്രോൾ എന്നിവ നിയന്ത്രിക്കാൻ ചെമ്പ് സഹായിക്കുന്നതിനാൽ, ഹൃദ്രോഗത്തിനുള്ള സാധ്യത കുറയ്ക്കും. ഹൃദയത്തിന്റെ ആരോഗ്യം സംരക്ഷിയ്ക്കുന്ന ഒന്നു കൂടിയാണ് ചെമ്പു പാത്രത്തിലെ വെള്ളം കുടിക്കൽ. പലരേയും അലട്ടുന്ന ഹൃദയാരോഗ്യത്തെ തകര്‍ക്കുന്ന കൊളസ്‌ട്രോള്‍ പ്രശ്‌നങ്ങള്‍ക്കുള്ള പ്രധാനപ്പെട്ട ഒരു വഴിയാണ് ചെമ്പു പാത്രത്തിലെ വെള്ളം കുടിയ്ക്കുന്നത്. ഇതു നല്ല രീതിയില്‍ രക്തപ്രവാഹത്തിന് സഹായിക്കും. രക്തക്കുഴലുകളിലെ ബ്ലോക്ക് മാറാനും ഇതേറെ നല്ലതാണ്. ബിപി പ്രശ്‌നങ്ങള്‍ പരിഹരിയ്ക്കാനുള്ള നല്ലൊരു വഴിയാണ് ചെമ്പു പാത്രത്തിലെ വെള്ളം കുടിയ്ക്കുന്നത്. ഇതും ഹൃദയത്തിനു നല്ലതാണ്.
2.ചർമ്മത്തിലെ നേർത്ത വരകളും ചുളിവുകളും കുറയ്ക്കുന്നു
കാലക്രമേണ, ചർമ്മത്തിൽ ഉണ്ടാകുന്ന നേർത്ത വരകൾ, മുഖത്തെ ചുളിവുകൾ എന്നിവ പരിഹരിക്കുന്നതിന് പ്രകൃതിദത്ത പരിഹാരമായി ചെമ്പ് ഉപയോഗിക്കുന്നു. ഫ്രീ റാഡിക്കലുകളെ ചെറുക്കാൻ സഹായിക്കുന്ന ആന്റിഓക്‌സിഡന്റും കോശ രൂപീകരണ ഗുണങ്ങളും ഇതിന് ഉണ്ട്. പുതിയതും ആരോഗ്യകരവുമായ ചർമ്മകോശങ്ങൾ ഉത്പാദിപ്പിക്കുന്നതിനും ചെമ്പ് സഹായിക്കും. വിളര്‍ച്ച പ്രശ്‌നങ്ങളുള്ളവര്‍ ചെമ്പു പാത്രത്തിലെ വെള്ളം കുടിയ്ക്കുന്നത് നല്ലതാണ്. ചെമ്പ് അയേണ്‍ ഉല്‍പാദനത്തിനു സഹായിക്കുന്നു. ഇത് ശരീരത്തിലെ ഹീമോഗ്ലോബിന്‍ തോതു വര്‍ദ്ധിപ്പിയ്ക്കുന്നു.
3.ദഹനവ്യവസ്ഥയെ സഹായിക്കുന്നു
ചെമ്പ് കലർന്ന വെള്ളം ശരീരത്തിലെ ദോഷകരമായ ബാക്ടീരിയകളെ നശിപ്പിക്കുകയും വീക്കം കുറയ്ക്കുകയും ചെയ്യും. ചെമ്പ് ദഹനത്തെ സഹായിക്കുകയും അൾസർ, അണുബാധ എന്നിവ ഭേദമാക്കുകയും ചെയ്യും. കൂടാതെ, ചെമ്പ് ശരീരം വൃത്തിയാക്കുകയും ശരീരത്തിലെ ദുഷിപ്പുകളെ എളുപ്പം നീക്കം ചെയ്യുവാൻ സഹായിക്കുകയും ചെയ്യുന്നു.
4.ശരീരഭാരം കുറയ്ക്കാൻ സഹായിക്കുന്നു
ശരീരത്തിലെ കൊഴുപ്പ് ഇല്ലാതാക്കാൻ ചെമ്പ് സഹായിക്കുന്നു, ഇത് ദഹനവ്യവസ്ഥയെ മികച്ചതാക്കാൻ സഹായിക്കുന്നു. ടോക്‌സിനുകള്‍ നീക്കിയും ദഹനം മെച്ചപ്പെടുത്തിയുമാണ് ഇത് സഹായിക്കുന്നത്‌. ചെമ്പിന്റെ ഗുണങ്ങള്‍ വെള്ളത്തിലൂടെ ശരീരത്തിലേയ്ക്കിറങ്ങിയാണ് ഇതു സാധ്യമാകുന്നത്.
5.ക്യാൻസറിനുള്ള സാധ്യത ലഘൂകരിക്കുന്നു
ചെമ്പിൽ അടങ്ങിയ ആൻറി ഓക്സിഡൻറ് ഗുണങ്ങൾ കാരണം, ഫ്രീ റാഡിക്കലുകളെ ചെറുക്കാനും ദോഷകരമായ ഫലങ്ങൾ അകറ്റാനും സഹായിക്കുന്നു. ലിവര്‍, കിഡ്‌നി ആരോഗ്യത്തിനും മികച്ചതാണ് കോപ്പര്‍ കോപ്പയിലെ ഒരു ഗ്ലാസ് വെള്ളം ശീലമാക്കുന്നത്. ടോക്‌സിനുകള്‍ നീക്കുന്നതിലൂടെ ക്യാന്‍സറടക്കമുള്ള പല രോഗങ്ങളില്‍ നിന്നും ശരീരത്തിന് മോചനം ലഭിയ്ക്കുന്നു.
ശരീരത്തിന് ചെമ്പ് ഉത്പാദിപ്പിക്കുവാൻ കഴിയാത്തതിനാൽ, നാം അത് ഭക്ഷണത്തിലൂടെ എടുക്കേണ്ടതുണ്ട്. കടൽ, മാംസം, മുഴു ധാന്യങ്ങൾ, പയറ്, പരിപ്പ്, നട്ട്സ്, വിത്ത്, ചോക്ലേറ്റ്, ധാന്യങ്ങൾ, ഉരുളക്കിഴങ്ങ്, കടല, കടും പച്ച ഇലക്കറികൾ എന്നിവ ഉൾപ്പെടെയുള്ള ഭക്ഷണം ഇതിനായി കഴിക്കാൻ ശ്രമിക്കാം.
